Wobydlerjo ćerpja

Donnerstag, 18. Juli 2019 geschrieben von:
We wobłuku swojeje dobrowólneje wojerskeje słužby běch wot januara do měrca tohole lěta na zwučowanišću Zwjazkoweje wobory pola Wuskidźa stacioněrowany. Zo připowědźi general Zorn njedawno, je wutwarić chcyć na centralne wukubłanišćo w Němskej, njeběše za mnje tuž překwapjenka. W běhu štwórć lěta přebywanja w tamnišej kasernje běchu moji ně­hdyši kameradźa stajnje na to tukali. Husto­hdy dožiwich tuž diskusije wo lěpšinach a njelěpšinach tajkeho předewzaća. Zwučowanišćo so bjezdwěla derje za wu­twar hodźi. Za tanki a helikoptery je městnosć perfektna. To česća sej wosebje ameriske jednotki, kotrež tam prawidłownje zwučuja, hdys a hdys tež w nocy. Wěm so hišće derje dopomnić, zo wotućich raz rano w třoch, dokelž honjachu Američenjo w swojich Blackhawk-helikopterach wyše kaserny přez nóc. Tule haru změja woby­dlerjo Wuskidźa w přichodźe najskerje hišće­ husćišo znjesć. Pětr Dźisławk

To a tamne (18.07.19)

Donnerstag, 18. Juli 2019 geschrieben von:

Najnahlišu dróhu swěta maja we Walesu: Ze 37,45 procentami nahłosće je dróha Ffordd Pen Llech w małoměstačku Harlech nowy swětowy rekord nastajiła, kaž Guinnessowa kniha rekordow zdźěla. Dotal bě nowoseelandske město Dunedin z 35 procentami tutón rekord měło. Za nowy rekord přizjewili su so wobydlerjo sami, po tym zo bě so wosobowe awto z přićahnjenymi borzdźidłami po dróze dele sunyło. Zanjesene městačko nadźija so nětko na wjace turistow.

Do pasli zalězła je sej rjedźerka w Kerpenje pola Kölna. Wobydlerjej bydlenja hižo dlěje na to tukaštaj, zo je rjedźerka padušnica. Tuž połožištaj jej bankowku, kotruž sej 52lětna přistajena bjez wahanja do zaka tykny. Přiwołana policija rjedźerku přepytowaše. Nimo bankowki namaka tež wšelake debjenki z druheho bydlenja domu. Padušnicu zajachu.

Paris so njepodwoli

Mittwoch, 17. Juli 2019 geschrieben von:

Paris (dpa/SN). Najebać hroženjow z USA chce Francoska digitalny dawk přesadźić. Tón měri so na internetnych gigantow kaž Google, Amazon, Facebook abo Apple.­ „Francoska njebudźe so při zawjedźenju narodneho dawka nikomu podwolić“, rjekny financny minister Bruno Le Maire dźensa w Parisu do zetkanja financnych ministrow wulkich industrijnych statow G 7. Němsku zastupujetaj financny minister Olaf Scholz (SPD) a šef Zwjazkoweje banki Jens Weidmann.

Nadpady Trumpa zasudźene

Washington (dpa/SN). Wot demokratow wobknježeny Dom reprezentantow USA je werbalne nadpady prezidenta USA Donalda Trumpa přećiwo štyrjom demokratiskim zapósłančam jako rasistiske zasudźił. Za wotpowědnu rezoluciju hłosowaše 240 zapósłancow, mjez nimi štyrjo z rjadow republikanow. Trump bě jemu kritisce nastajenym žonam radźił, zo móhli so do swojich domizniskich krajow wróćić, jeli so jim w USA njelubi. Tři z nich su w USA rodźene.

Za spěšny nowonatwar cyrkwje

Zwjazkowa kanclerka Angela Merkel (CDU) je do zahajenja dźensnišeho posedźenja zwjazkoweho knježerstwa w Berlinje zbožopřeća k swojim 65. narodninam přijała. Wulki kwěćel přepoda jej zwjazkowa justicna ministerka Christine Lambrecht (SPD, nalěwo), po njej gratulowaše dotalna zakitowanska ministerka Ursula von der Leyen (CDU, w pozadku). Foto: dpa/Wolfgang Kumm

Berlin (dpa/SN). Wuzwolenje Ursule von der Leyen za nowu prezidentku Komisije Europskeje unije a powołanje Annegret Kramp-Karrenbauer za nowu zakitowansku ministerku Němskeje stej rozdźělne reakcije zbudźiłoj.

Baltiske staty su němskej politikarce k wuzwolenju do zastojnstwa prezidentki komisije EU gratulowali. Ministerskej prezidentaj Estiskeje a Lettiskeje, Jüri Ratas­ a Krišjānis Kariņš wjeselitaj so na zhromadne dźěło z bywšej zakitowanskej ministerku Němskeje, zo bychu Europu sylnišu a jednotnišu činili. Von der Leyen sej w baltiskich krajach jara waža, dokelž je jej wěstota baltiskich krajow při mjezy k Ruskej jara wažna.

Wjesne kónčiny spěchować

Mittwoch, 17. Juli 2019 geschrieben von:

Naprawy zwjazkoweho knježerstwa za runohódne wuměnjenja žiwjenja

Berlin (dpa/SN). Zwjazkowe knježerstwo je, wotpowědujo koaliciskemu zrěčenju tuchwilneje wólbneje doby, komisiju „Runohódne žiwjenske wuměnjenja“ zasadźiło. Nadawk komisije bě, sprawne rozdźělenje zakładow a móžnosćow za wšěch w Němskej žiwych ludźi přepytować a namjety k sylnjenju runohódnych žiwjenskich wuměnjenjow předpołožić. Při tym měli zaměrne strukturne změny w krajach a komunach w srjedźišću stać. Tole ma přinošk k tomu być, wuludnjenjam regionow runje tak kaž dalšemu rozrostej metropolow zadźěwać.

Komisija bě cyłkownje šěsć dźěłowych skupin zarjadowała. Tak su zadołženje komunow runje tak přepytowali kaž wobłuk hospodarstwo a inowacije abo rumnostne rjadowanje a technisku infrastrukturu. Dalšej skupinje wěnowaštej so dźěłowym móžnosćam a zhromadnosći w towaršnosći.

Hórki přisłód wostanje

Mittwoch, 17. Juli 2019 geschrieben von:
Wuzwolenje Ursule von der Leyen za nowu prezidentku Komisije EU zbudźa we mni hórkej přisłodaj: Runje dźewjeć hłosow z cyłkownje 751 běchu na kóncu rozsudne za jeje wuzwolenje. A te přińdźechu hišće k tomu z rjadow tych, kotřiž su EU napřećo kritisce nastajene, kaž pólska narodnokonserwatiwna PiS. To pokazuje, kak njestabilne wjetšinowe poměry za von der Leyen su. Hněwny pak sym tež na wašnje, kak je von der Leyen do zastojnstwa přišła. Čehodla smy poprawom 26. meje k wólbam Europskeho parlamenta šli. Wšudźe wisachu plakaty z kandidatami. Mějachmy jenož jedyn hłós a sadźich swój křižik cyle wědomje pola jednoho z kandidatow. Na kóncu pak bě wšitko za stareho Frycu. Naraz steješe Ursula­ von der Leyen jako kandidatka, žona, kotraž na žanej lisćinje njesteješe. Sym sej wěsty, zo so mnohim dźe kaž mi: Njewěm,­ hač póńdu za štyri lěta hišće raz wolić. Marko Wjeńka

To a tamne (17.07.19)

Mittwoch, 17. Juli 2019 geschrieben von:

Blido na třěše awta transportował a jenož z ruku dźeržał je 66lětny šofer w porynsko-pfalcowskim Wörrstadće. Zastojnikam bě Smart na wjele wužiwanej zwjazkowej dróze napadnył, dokelž saha­štej duri kamora z koferoweho ruma. Na třěše ležeše blido. Te pak njebě přiwjazane, ale ležeše na přikrywje. Šofer je z lěwej ruku přez wokno dźeržeše. Tón njebě sej ani winy wědomy. „Kak hewak by to činić dyrbjał?“, so wón prašeše. Wón dyrbješe blido dele wzać a pokutu płaćić.

Pjećlětny hólc je so w delnjosakskim Celle pola policije požadał. Zhromadnje ze staršimaj přińdźe na stražu, zo by swoje powołowanske přeće wosobinsce přednjesł. Zastojnicy jemu rewěr pokazachu a rozłožichu, zo ma hišće trochu chwile. Přiwšěm sej jeho mjeno hižo raz napisachu. Ze wšelakimi maličkosćemi wobdarjeny hólc stražu zaso wopušći.

„Zaměrnje za serbsku rěč dźěłać“

Dienstag, 16. Juli 2019 geschrieben von:

Budyšin (SN/JaW). Dźewjeć z cyłkownje 33 zapodatych namjetow ze stron Serbow za dalewuwiwanje plana naprawow Sakskeho statneho knježerstwa k po­zbu­dźowanju a wožiwjenju wužiwanja serbskeje rěče w zjawnosći je sakske knje­žerstwo do noweho 2. plana přewzało. Wo tym informuje zarjad Domowiny. „Doskónčny plan wobsahuje w rubrice namjety šěsć króć Domowinu a trójce Radu za serbske naležnosće Sakskeje“, zdźěli nowinska rěčnica Borbora Felberowa minjeny pjatk.

Domowina wita dalewuwiće plana naprawow z lěta 2012, kotryž bě Sabine von Schorlemer jako tehdyša statna ministerka za wědomosć a wuměłstwo zdźěłała. „Za přewzaće našich nastorkow smy jara dźakowni, byrnjež so njeporadźiło wšitke zapisać. Parujemy na přikład naprawy, kotrež su na dwurěčnosć we wobłukach kaž hospodarstwo, zjawny wosobowy bliskowobchad, póštu a předewzaća w turizmje wusměrjene“, rjekny referent Domowiny za nutřkowne naležnosće Werner Sroka.

DGB: Na ludźi myslić

Dienstag, 16. Juli 2019 geschrieben von:

Berlin (dpa/SN). W debaće wo móžny dawk na wuhlikowy dioksyd žada sej Němski dźěłarniski zwjazk (DGB), na połoženje powołanskich dojězdźowarjow njezabyć. „Hdźež dyrbja ludźo mobilni być, njesměli tole z dawkom poćežować“, rjekny čłonka předsydstwa Annelie Buntenbach Augsburgskim nowinarjam. „Tójšto přistajenych jězdźi wšědnje da­loke puće na dźěło, to měli wobkedź­bować.“ Zwjazkowe knježerstwo chcyło w septembru dawk na CO2 schwalić.

Chłostanje za Bayer znižene

San Francisco (dpa/SN). Koncern Bayer móže w procesu njerodź zaničowanskeho srědka Glyphosat w USA dla z jasnje zniženej chłostanku ličić. Přisłušny sudnik je wčera dotalnu wukazanu sumu 80 milionow dolarow na 25,3 miliony znižił. Po jeho měnjenju njebě postajena suma přiměrjena. Přiwšěm wostanje wusud přećiwo koncernej płaćiwy. Bayer chce najebać to přećiwo wusudej skoržić. W měrcu běchu koncern zasudźili, dokelž Glyphosat pječa rak zawinuje.

Sankcije EU Turkowskej smorže

Serbska debata

Neuheiten LND