To a tamne (22.05.19)

Mittwoch, 22. Mai 2019 geschrieben von:

Přemało mnichow na wideju dla chcedźa w Thailandskej oficialny film wo narodnej hymnje znowa nawjerćeć. Premierminister Prayut Chan-o-cha je widejo skazał, kotryž pokazuje wjace mnichow, kak swoju wěru praktikuja. Film, hakle spočatk meje znowa nahrawany, pokazuje zastupjerjow wšelakich worštow thailandskeho ludu při spěwanju hymny. Buddhistiska organizacija je so na to hóršiła, dokelž­ su na wideju lědma mniša widźeć.

Wjace hač 300 hudźbnikow a skupin je so lětsa za požadanu dowolnosć hudźenja w New-Yorkskej podzemskej železnicy přizjewiło. Něhdźe 70 z nich změje składnosć, swoje hudźbne kmanosće komisiji předstajić. 20 skupin a jednotliwcow přiwozmu potom do kruha něhdźe 350 hudźbnych cyłkow, kotrež smědźa na 30 wuzwolenych podzemskich dwórnišćach koncertować, štož je 7 500 wustupow wob lěto.

Macron potwjerdźa přećelstwo

Dienstag, 21. Mai 2019 geschrieben von:

Paris (dpa/SN). Krótko do wólbow Europskeho parlamenta je francoski prezident Emmanuel Macron wuznam přećelstwa z Němskej wuzběhnył. Europa njemóže so dale wuwiwać, stej-li Němska a Francoska zwadźenej, rjekny prezident Ma­cron w rozmołwje z regionalnymi nowinarjemi w Parisu. Kónc apryla bě wón přiznał, zo stej wobaj krajej we wjacorych naležnosćach rozdźělneho měnjenja. Zwjazkowa kanclerka Angela Merkel (CDU) bě porno tomu zwurazniła, zo ma dobry poćah k Macronej.

Wahl-O-Mat zawrjeny

Köln (dpa/SN). Tak mjenowany Wahl-O-Mat njesmě so najprjedy raz dale wužiwać. Kölnske zarjadniske sudnistwo je Zwjazkowej centrali za politiske kubłanje w Bonnje přikazało, internetny portal k přirunowanju pozicijow wšelakich stron w tuchwilnej formje zawrěć. Sudnistwo wotpowědowaše tak skóržbje strony Volt Deutschland, kotraž njeje mjez stronami portala naličena a ma to za njelěpšinu.

Wjele dešća na zapadźe kraja

Wo mjezystawje financowanja załožby zhonili

Dienstag, 21. Mai 2019 geschrieben von:

Budyšin (SN/MkWj). Rěčne wuwiće Ludoweho nakładnistwa Domowina bě jedne z ćežišćow wčerawšeho wuradźowanja parlamentariskeje přirady Załožby za serbski lud. Na swoje posedźenje w Budyskim Serbskim domje běchu čłonojo rady tuž jednaćelku LND Marku Maćijowu přeprosyli. Při tym dźěše wo to, kak hodźało so spěchowanje serbšćiny z modernymi srědkami zwoprawdźić. K tomu měli wobdźěleni, tež załožba, ze swojimi namjetami přinošować. Přezjedni sej běchu, zo ma nakładnistwo ze swojimi wudźěłkami wulki podźěl na zachowanju serbskeje rěče.

W dalšim dźělu posedźenja zhoni parlamentariska přirada wo mjezystawje jednanjow nastupajo financowanje Załožby za serbski lud, kaž předsyda přirady, zapósłanc CDU w Sakskim krajnym sejmje Marko Šiman, našemu wječornikej zdźěli. Hač do kónca junija chce sakske knježerstwo zapósłancow a zjawnosć wo aktualnym stawje informować.

Statna kriza so přiwótřa

Dienstag, 21. Mai 2019 geschrieben von:

Wien (dpa/SN). Knježerstwowa kriza w Awstriskej widejoweje afery dla so něšto dnjow do wólbow Europskeho parlamenta dale přiwótřa. Při tym njeje ani wjace wuzamknjene, zo zwjazkowy kancler Sebastian Kurz swoje zastojnstwo zhubi. Wčera wječor bě prawicarska FPÖ připowědźiła, zo wšitcy ministrojo strony knježerstwo wopušća. Strona reagowaše tak na připowědźenje Kurza, nutřkowneho ministra Herberta Kickla (FPÖ) pušćić. Předsydka SPÖ Pamela Rendi-Wagner žadaše sej wčera wotstup cyłeho knježerstwa. Hač k nowowólbam w septembru měło přechodne knježerstwo fachowcow kraj nawjedować.

Mjeztym dyrbi Sebastian Kurz z wotumom njedowěry w parlamenće ličić. Opozicionelna lisćica „Nětko“ je wčera připowědźiła, zo chcyła w parlamenće wotpowědnu próstwu zapodać. Dyrbjałoj-li roznjemdrjena FPÖ a socialdemokratiska SPÖ Kurzej njedowěru wuprajić, by zwjazkowy prezident Alexander Van der Bellen noweho knježerstwoweho šefa powołać dyrbjał.

„Mjeńšiny trjebaja připóznaće“

Dienstag, 21. Mai 2019 geschrieben von:

Politiske strony maja naležnosće mjeńšin we wólbnym programje (2. dźěl)

Berlin (SN/MkWj). Pod kapitlom „Sylny hłós za etniske mjeńšiny“ wěnuje so Lěwica w Němskej we wólbnym boju za wólby Europskeho parlamenta naležnosćam awtochtonych mjeńšin. To wuchadźa z wotmołwy Lěwicy na naprašowanje mjeńšinoweho sekretariata w Berlinje. Mjeńšinowy sekretariat bě so strony prašał, kak steja k narodnym mjeńšinam, k iniciatiwje Minority Safepack, ke kulturnej a rěčnej mnohotnosći w regionach Europy. A strony su sekretariatej wotpowědne wurězki swojich wólbnych programow po­srědkowali.

Köpping: Dobry přikład integracije

Dienstag, 21. Mai 2019 geschrieben von:

Drježdźany (dpa/SN). Sakska ministerka za integraciju Petra Köpping (SPD) ma towaršnostny angažement ćěkancow za móžnosć poradźeneje integracije. „Mam za nimoměry wažne, zo dóstanu ćěkancy šansu, na dobro towaršnosće so zasadźeć“, rjekny Köpping wčera w Drježdźanach. Za to měli so wotpowědne wuměnjenja wutworić.

Dźěłaćerski dobroćelski skutk (AWO) da tuchwilu nastupajo towaršnostny angažement migrantow přepytować, čehodla so ćěkancy dobrowólnje za čestnohamtske dźěło abo dobrowólnu słužbu rozsudźeja. Při tym wobhonja so AWO za ćežemi a wuspěchami. Tež zamołwitych na městnach skutkowanja ćěkancow so praša. Hižo loni zahajene přepytowanje traje hišće lěto.

Prěnje wuslědki su wunjesli, zo ma towaršnostny angažement mjez ćěkancami kaž tež na městnach skutkowanja pozitiwny wohłós, kaž koordinatorka projekta Anne Röder zdźěli. Přepytowanje chcedźa přichodne měsacy wobšěrnje wuhódnoćić. Po tym chce AWO powšitkowne směrnicy zdźěłać, kak móhł ćěkancow za tajke dźěło zdobyć.

To a tamne (21.05.19)

Dienstag, 21. Mai 2019 geschrieben von:

Runje narodźene dźěćo staj staršej w Hamburgu po puću z chorownje domoj w taksiju zabyłoj. Hakle po tym zo bě awto wotjěło, staršej to pytnyštaj. Ani šoferej taksija dźěćko njenapadny, dokelž kruće spaše. Po wobjedowej přestawce jědźeše wón k lětanišću po dalšeho pasa­žěra, a tón ćěšenka wuhlada. Policija móžeše jeho skónčnje dospołnje zadwělowanymaj staršimaj přepodać.

Za wodźidłom wusnjeneho šofera je policija w Nižozemskej lepiła, jako awtopilot elektrojězdźidło typa Tesla po nocy wodźeše. Dokelž jědźeše 50lětny napadnje wusko za dalšim awtom, policija jězdźidło­ přesćahny a spjaceho wuhlada. Z policajskej sirenu jeho wubudźi. Muž bě wopity a dyrbješe jězbnu dowolnosć wotedać. Tesla stajnje zaso na to skedźbnja, zo ma šofer najebać awtomatiski system­ kontrolu wobchować.

Rozmołwny rjad Sakske křesło Katolskeje akademije biskopstwa Drježdźany-Mišno bě z 9. zarjadowanjom minjeny pjatk z hosćom w Smochčanskim Domje biskopa Bena. Tema „Kak swobodnje rozprawjeja naše medije?“ pak njeje telko ludźi wabiła, tak zo wostachu mnohe městna njewobsadźene.

Smochćicy (SN/at). Zo přisydnje so Budyski měšćanosta dr. Robert Böhmer (njestronjan) k připowědźenymaj diskutantomaj na Sakske křesło, bě wot moderatora wuprošena reakcija na jeho witanske słowa. Měšćanosta Böhmer wucha- dźeše z toho, zo wostanje zwuraznjena kritika na adresu etablěrowanych medijow podobna. Tak je so temje, kaž sam rjekny, z pozicije „advocatusa diaboli“ zbližił. Rěčnik to, kiž wědomje městno přećiwneje strony zaběra, zo by přećiwne argumenty skónčnje wuwróćił. Tak mjenowaše „swobodne medije“ a „kwalitny nadawk“ w jednym zwisku, potwjerdźi pak, zo postajeja etablěrowane medije „dale lokalne medialne měnjenje“.

Hesło „měrliwa rewolucija“

Montag, 20. Mai 2019 geschrieben von:

Magdeburg (B/SN). Hesło „Měrliwa (r)ewolucija“ steji lětsa nad čitanskim rjadom w Magdeburgu. Při tym ma so kritisce hladać na podawki před 30 lětami, ale tež na wuwiće hač do dźensnišeho. Prěni přednošk bě 23. januara wo temje „Politiske łamki“ – štó su namrěwcy měrliweje rewolucije“. Přichodne čitanje je 19. junija „Posledni hasnje swěcu? Lóšt na jutře w cyrkwi – wužadanje a přicpěwanje?“ Přednošować budźe teologa a fyzioterapeut z Würzburga dr. Wunibald Müller. Hłowni moderatorojo rjadu su teologa a nawoda krajneje centrale za politiske kubłanje w Magdeburgu Maik Reichel, teologa a wojowar za wobydlerske prawa Frank Richter a fararka w Magdeburgu Waltraut Zachhuber.

Składuja za Notre-Dame

Prezident parlament rozpušćił

Montag, 20. Mai 2019 geschrieben von:

Kijew (dpa/SN). Nowy ukrainski prezident Wolodimir Zelenskij je parlament kraja rozpušćił a nowowólby za dwaj měsacaj wukazał. Bjezposrědnje do toho běchu 41lětneho Zelenskeho jako noweho prezidenta spřisahali. Z nowowólbami su ličili, dokelž nima Zelenskij žanu wjetšinu w parlamenće, zo móhł reformy přesadźić. W swojej narěči připowědźi wón wotwołanje šefa tajneje słužby a generalneho statneho rěčnika. Ministrow knježerstwa wón namołwi wotstupić.

Ćěkancy na kraj přińć směli

Rom (dpa/SN). Přećiwo woli italskeho nutřkowneho ministra Matteja Salvinija su zamołwići přistawneho města Lampedusa 47 migrantam na němskej priwatnej wuchowanskej łodźi „Sea-Watch-3“ dowolili na kraj přińć. „Wjeselimy so, zo ma w Italskej­ wustawa wjace mocy hač minis­ter, kiž mjezynarodne prawo rani“, Sea-Watch internetnje zdźěli. Pomocnu łódź je policija mjeztym sćazała. Salvini bě wuchowanskim łódźam zakazał, jedyn z italskich přistawow wužiwać.

Konferenca wo wuchodźe

Serbska debata

Neuheiten LND