W boju přećiwo wulkemu lěsnemu wohenjej na bywšim wojerskim zwučowanišću blisko mecklenburgsko-předpomorskeho Lübtheena­ zasadźeja wot dźensnišeho tež wodomjetaki policije. Z nimi chcedźa šćežki a wusyki krjepić. Płomjenja su so mjeztym­ na 430 hektarow rozpřestrěli. Wobydlerjo štyrjoch wsow dyrbjachu swoje bydlenja wopušćić. Foto: dpa/Jens Büttner

Sakska změje wjace policistow

Dienstag, 02. Juli 2019 geschrieben von:
Zhorjelc (dpa/SN). Sakska dóstanje wjace podpěry ze stron zwjazkoweje policije. Hišće lětsa chcedźa 261 zastojnikow předewšěm do pomjezneje kónčiny pósłać, jědnaćoch wjace hač planowane. W lětach hač do 2024 so jim dalšich přidatnych 250 zwjazkowych policistow přidruži. To je zwjazkowy nutřkowny mi­nister Horst Seehofer (CSU) wčera na zetkanju­ z ministerskim prezidentom Michaelom Kretschmerom a ze sakskim nutřkownym ministrom Rolandom Wöllerom (wobaj CDU) w Zhorjelcu připowědźił. Hłowna přičina je pomjezna kriminalita, kotraž je tež wažna tema we wólbnym boju. Dale so dojednachu, zo nastanje w zhromadnym dźěle z Drježdźan­- skej Techniskej uniwersitu „Technologiski park 4.0“, kotryž ma so předewšěm z digitalizaciju w twarstwje zaběrać. Za to přewostaji Sakska 15 milionow eurow.

Posledni tydźeń schadźowanjow

Dienstag, 02. Juli 2019 geschrieben von:
Drježdźany (dpa/SN). Sakski krajny sejm je dźensa posledni tydźeń posedźenjow w tutej wólbnej dobje zahajił. Na spočatku přednjese ministerski prezident Michael Kretschmer (CDU) knježerstwowu deklaraciju pod hesłom „Wutwarimy Saksku – wěsće, socialnje, swobodnje“. Po tym mějachu w sejmje zastupjene strony składnosć, wuprajić so k přichodej kraja, dwaj měsacaj do wólbow noweho krajneho sejma. W aktualnej hodźinje wobjednawachu škit klimy a kubłanje. Zapósłancy schadźuja so jutře a štwórtk posledni raz do lětnjeje přestawki a do wólbow noweho Sakskeho krajneho sejma.

Naslědnik Junckera dale njejasny

Dienstag, 02. Juli 2019 geschrieben von:

Brüssel (dpa/SN). Zwjazkowa kanclerka Angela Merkel (CDU) chcyše dźensa zhromadnje ze swojimi europskimi kolegami spytać, zwadu wo wodźacy personal Europskeje unije rozrisać. Najebać marathonowe wuradźowanje njejsu so dotal dojednać móhli. Mjez druhim dźe wo naslědnistwo prezidenta komisija EU Jeana-Claudea Junckera. Prezident rady EU Donald Tusk je wuradźowanja na dźensa přestorčił. Wobdźělnicy steja pod časowym ćišćom: Jutře chce so nowy parlament prěni króć schadźować.

Nachwilnje wupadaše wčera za přibliženjom: Po tym móhł Nižozemjan Frans Timmermans Junckera naslědować, načolny kandidat Europskeje ludoweje strony Manfred Weber móhł so z nowym prezidentom parlamenta EU stać. Tomu pak so mnozy spjećowachu. Předewšěm wuchodoeuropske staty Visegrádskeje štyrki su přećiwo Timmermansej. Čěski premier Andrej Babiš rjekny: „Timmermans je wunamakar migraciskich kwotow a je našej kónčinje napřećo negatiwnje nastajeny.“

Podpěraja rozšěrjenje insektow

Dienstag, 02. Juli 2019 geschrieben von:

Sakski minister Thomas Schmidt nowy jednanski koncept předstajił

Lipsk (SN/BŠe). Sakski minister za ratarstwo, wobswět a geologiju Thomas Schmidt (CDU) je minjeny štwórtk jednanski koncept za wšelakorosć insektow w swobodnym staće předstajił. Dźewjeć wobłukow wopřijacy koncept wopisuje nowe naprawy, z kotrymiž ma so mnohotnosć překasancow spěchować. Naćisk ministerstwa za wobswět a ratarstwo budźe nětko we wobšěrnym konsultaciskim procesu k programej dalewuwity. „Škit překasancow je dawno fachowe ćežišćo. Dokelž je jich dale a mjenje, je to alarmowacy signal a wuskutkuje so na cyłkowny ekosystem“, Thomas Schmidt zwurazni.

Wšitcy akterojo towaršnosće su namołwjeni. W městach a we wjesnych kónčinach maja na přikład insektam nješkodźace swěcy instalowane a zahrodki kaž tež łuki z wjele kćějacymi rostlinami wuhotowane być. Zdobom měło mortwe drjewo zdźěla w lěsach wostać, žiwe płoty podłu polow spřihotowane a při­brjohi rěkow zwosadźane być. Z najwšelakorišimi naprawami hodźi so tak překasancam přihódny žiwjenski rum wu­tworić.

To a tamne (02.07.19)

Dienstag, 02. Juli 2019 geschrieben von:

Njewšědny napohlad skićeše so njedźelu rano wobydlerjam mexiskeho města Guadalajara: Sylny zliwk bě cyłe město z krupami pokrył. W někotrych dźělach města ležachu wone cyły meter wysoko, awta běchu jenož hišće zdźěla widźeć. Zamołwići mějachu ruce połnej dźěła, krupy z dróhow rumować, rěka w zdźělence města na juhu kraja z 1,5 milionami wobydlerjow.

Had z plasty je w Porynsko-Pfalcy policajsku akciju zawinił. Žona bě wčera w Fußgönheimje kobru z pozběhnjenej hłowu na swojej zahrodźe wuhladała a policiju zawołała. Zo njemóhła kobra ćeknyć, połoži žona šklu na hada a poćeži ju z kamjenjom. Policisća pak nańdźechu jeničce plastowu hrajku w formje hada. „To bě kuriozne zasadźenje“, rěka w zdźělence policije, „w našej kónčinje drje su hady, tajki pad pak hišće njemějachmy.“

Za wupisanje městnow puć runany

Montag, 01. Juli 2019 geschrieben von:

Wutworjenje serwisoweho běrowa za serbsku rěč je kročel bliše. Budyski krajny rada a přisłušna přirjadnica staj minjeny tydźeń wot Domowiny naćisnjenej směrnicy za zarjadnišćo přihłosowałoj a wokrjesnej społnomócnjenej za serbske naležnosće Reginje Krawcowej nadawk dowěriłoj, ze stron krajnoradneho zarjada dalši proces přewodźeć.

Budyšin (SN/at). Na měrcowskim informaciskim zarjadowanju wo lětsa prěni raz napołoženym Serbskim komunalnym programje bě předsydka serbskeje rady Marja Michałkowa jara optimistiska: W programje zakótwjeny serwisowy běrow budźe w meji dźěłać započeć, bě wona tehdy přeswědčena. Mjeztym je julij a puć je skónčnje zrunany za wupisanje personalneju městnow.

Kriza ortodoksneje cyrkwje

Montag, 01. Juli 2019 geschrieben von:

Genf (B/SN). Metropolit rusko-ortodoksneje cyrkwje Hilarion widźi swětowu orto­doksnu cyrkej w ćežkej krizy. Šćěpjenja dla winuje Hilarion ekumeniskeho patriarcha Konstantinopela ze sydłom w Istanbulu, Bartholomäusa I. Wón je swoju poziciju jako čestny nawoda swětoweho zhromadźenstwa ortodoksnych wěriwych na hrački stajił, dokelž je w janua­rje samostatnu ortodoksnu cyrkej na Ukrainje oficialnje připóznał. To je za Hilariona „ilegalne“. Rusko-ortodoksna cyrkej pak wobsteji tež na Ukrainje pod Moskowskim patriar­chatom. Z wida Ruskeje móže we wěstym kraju jenož jedna ortodoksna cyrkej eksistować, a na Ukrainje hižo tajka je – pod Moskowskim patriarchatom.

Arcybiskop w Africe był

Kapitanku přesłyšowali

Montag, 01. Juli 2019 geschrieben von:

Rom (dpa/SN). Kapitanka němskeje pomocneje organizacije Sea-Watch Carola Rackete bě dźensa popołdnju na italske sudnistwo k přesłyšowanju skazana. Policisća dowjezechu ju za to z kupy Lampedusa do sicilskeho města Agrigent, kaž rěčnik organizacije zdźěli. 31lětnej žonje wumjetuja podpěru ilegalneho zapućowanja, ranjenje mórskeho prawa a spjećowanje přećiwo statnej mocy. Rackete bě minjeny tydźeń z wjace hač 40 migrantami najebać zakaz do přistawa na Lampedusa dojěła. Tam ju zajachu.

Koalicija wutworjena

Bremen (dpa/SN). Po hodźiny trajacych jednanjach su so SPD, Zeleni a Lěwica minjenu­ nóc na koaliciske zrěčnje za čerwjeno­-zeleno-čerwjene knježerstwo w Bremenje dojednali. W běhu dnja chcychu zrěčenje zjawnosći předstajić. Je to prěnja koalicija tajkeho razu w jednym ze zapadnych zwjazkowych krajow. Socialdemokraća běchu wólby 26. meje po wjace hač 70 lětach přěhrali, po tym zo běchu dwanaće lět ze Zelenymi knježili. Dobyćerska CDU pak njeje koaliciske knježerstwo wutworić zamóhła.

Bjezdźěłnosć snadnje woteběra

Štó chcył nowy předsyda SPD być?

Montag, 01. Juli 2019 geschrieben von:

Berlin (dpa/SN). W SPD je so dźensa ofi­cial­nje doba přizjewjenja za naslědnistwo wotstupjeneje předsydki Andreje Nahles zahajiła. Hač do 1. septembra móža so zajimcy přizjewić. Při tym je předsydstwo strony wuraznje tež skupiny ke kandidaturje pohonjowało. Na wólbnym zjězdźe w decembru chcedźa potom móžnosć pruwować, dwójne předsydstwo we wustawje socialdemokratiskeje strony zakótwić. Hinak hač w druhich stronach měli so tajke dwójki hižo do wólbow namakać a zhromadnje nastupić, a jedna žona měła znajmjeńša pódla być.

Za móžnu předsydku abo móžneho předsydu socialdemokratow maja mnozy swójbnu ministersku Franzisku Giffey a generalneho sekretara Larsa Klingbeila. Dotal pak njeje hišće nichtó kandidaturu přizjewił. Přizjewjenja z dobrymi wuhladami wočakuja tak a tak hakle na kóncu přizjewjenskeje doby.

Anzeige

  • Jara awtentiske běchu poskićenja ansambla Zabava z Ruskeje.
  • Na zahajenju festiwala štwórtk w Budyskim NSLDź počesćichu přitomni Juraja Kubánku (3. wotprawa) z trójnej serbskej sławu.
  • Hosćo z Peruwa zbudźichu ze swojimi přewšo pisanymi kostimami tójšto zajima.
  • Pólski cyłk z Bolesławieca na štwórtkownym swjedźenskim ćahu k zahajenju festiwala "Łužica 2019" po Budyšinje
  • Algeričenjo na jewišću NSLDź
  • Rejwarjo z Boliwiskeje
  • XIII. mjezynarodny folklorny festiwal "Łužica 2019" je zahajeny. Tule namakaće impresije z prěnich wustupow wobdźělenych skupin. Tule předstajichu skupiny štwórtk dopołdnja w Němsko-Serbskim ludowym dźiwadle hižo raz dźěćom swoje poskićenja, na wobra
  • Rejwarki a rejwarjo Serbskeho folklorneho ansambla Wudowor su zdobom hosćićeljo festiwala.
  • Rejwarki a rejwarjo z pólskeho Bolesławieca
  • Zajim zbudźi tež skupina ze Sewjerneje Makedonskeje
  • Dalši hosćićeljo łužiskeho mjezynarodneho festiwala: Serbska rejwanska skupina Smjerdźaca z hudźbnikami folklorneje skupiny Sprjewjan
  • Překwapjenka běchu mnohim wuměłcy z Peruwa.
  • Prěni raz spožčichu lětsa zarjadowarjo mjezynarodneho folklorneho festiwala wosebite myto a diplom za wurjadny wuměłski wukon. Jón dósta słowakski ansambl Bobańovci za swoju přirodnosć, awtentiskosć a originalitu.
  • Rejwarjo algeriskeho cyłka Couleurs d‘ Algerie
  • Boliwiscy rejwarjo a rejwarki w kostimach na jewišću
  • Boliwičenjo "in action"
  • Sobotu wječor běchu po Chrósćicach mnozy nadróžni muzikanća po puću.
  • Pólski młodźinski orchester z Leśnicy zahaji sobotny wječor na farskim dworje.
  • Tójšto ludźi zhromadźi so na programy na jewišću při gmejnskim zarjedźe ...
  • ... a wobhlada sej poskićenja skupin.
  • Na Koklic statoku předstajichu so tež čłonojo skupiny Wotała. Wšitcy z nich su bywši rejwarjo Smjerdźečanskeje rejwanskeje skupiny.
  • Smjerdźečanscy rewjarjo na jewišću pola Koklic
  • Pohlad z jewišća na dwór Wjeselic statoka
  • Na Zahrodnikec-Grutekc statoku pokaza mjez druhim tež Slepjanski folklorny ansambl dźěle swojeho programa.
  • Tež Slepjanscy wuměłcy hižo zahe na dorost mysla.
  • Wšitcy sobuskutkowacy słowakskeho ansambla Bobańovci zamóža znajmjeńša jedyn instrument piskać, spěwać a rejwać.
  • Na Kralec statoku knježeše čiła atmosfera.
  • Schow před krótkim dešćom pytachu sej tež hosćo na Kilankec statoku pod wulkimi předešćnikami.
  • Pólscy hosćo z pokazku ze swojeho programa na Kilankec statoku
  • Wo tym, zo bě sej na lětuši festiwal sobotu a njedźelu do Chrósćic wjac hosći dojěło hač hewak, swědčachu kopate połne parkowanišća.
  • Kultura zwjazuje, kaž tule Smjerdźečanskej rejwarce a algeriskeho rejwarja.
  • Sčasami nimale přepjelnjeny bě Koklic statok.
  • Wudworscy při poslednich přihotach na sobotny wustup na farskim dworje.
  • Wudworscy na farskim dworje
  • Jewišćo při gmejnje bě stajnje derje wopytane.
  • Rjanolinki-rejwarki Smjerdźečanskeje rejwanskeje skupiny
  • Serbska reja je jewišću při gmejnje tójšto pasantow do rejki prosyła.
  • Lóze hólcy wječor na jewišću Zahrodnikec-Grutkec statoka
  • Kabaretna skupina Lózy hólcy pokazachu přitomnym we wobłuku programa "Chróšćan special" na Zahrodnikec-Grutkec statoku, zo njejsu w běhu lět ničo zabyli
  • Na Wjeselic statoku zahudźi skupina NIMO ...
  • ... band wokoło Brězanec bratrow Józefa a Jana.
  • Tež němska skupina Slapstickers pokaza, što zamóže.