Njeje žaneje wosebiteje dataje
Zwjazkowe knježerstwo 14 antiserbskich njeskutkow registrowało
Berlin (SN/MkWj). Wot lěta 2015 je po rešeršach wěstotnych institucijow w Němskej k 14 chłostajomnym njeskutkam přećiwo přisłušnikam serbskeho ludu dóšło. Antiserbske njeskutki pak njejsu w swójskim temowym wobłuku registrowane. To wuchadźa z wotmołwy zwjazkoweho knježerstwa na małe naprašowanje frakcije Lěwicy, kotraž našemu wječornikej předleži. Pady wuchadźeja z rešeršow w centralnej dataji wo politisce motiwowanych njeskutkach. Hač na jedne wuwzaće jedna so wo delikty prawicarsce orientowanych skućićelow.
Komisija přećiwo anticyganizmej
Berlin (SN). Němske zwjazkowe knježerstwo je minjenu srjedu čłonow w koaliciskim zrěčenju dojednaneje njewotwisneje komisije fachowcow za bój přećiwo anticyganizmej powołało. Centralna rada němskich Sintow a Romow wita spěšne powołanje komisije přez nutřkowneho ministra Horsta Seehofera (CSU), po tym zo bě zwjazkowy sejm hakle tydźeń do toho wo wotpowědnych namjetach wšitkich frakcijow – nimo AfD – wuradźował.
Horst Seehofer skedźbni při předstajenju fachowcow na wuznam komisije za přichodne politiske wusměrjenje w boju přećiwo anticyganizmej. Wón sej přeje, runje tak kaž jeho ministerstwo, zo by komisija zakónčacu rozprawu ze substancielnym wobsahom předpołožiła, kotraž zwjazkowemu sejmej, zwjazkowemu knježerstwu kaž tež mjeńšinje Sintow a Romow poručenja za respektny mjezsobny wobchad dawa.
Předsyda Centralneje rady němskich Sintow a Romow Romani Rose rjekny: „Anticyganizm je w němskej a europskej towaršnosći hłuboko zakótwjeny. Kubłanska politika ma na to reagować.“
To a tamne (02.04.19)
W kamorje před policiju chowała je so žona w Stralsundźe, po tym zo bě ze swojim awtom parkowace wobškodźiła. Swědcy běchu wobkedźbowali, kak so 38lětna při wróćostorkanju druheho awta šmórny. Policisća nańdźechu pola njeje doma dweju muži. Po krótkim pytanju tež žonu w drastowym kamorje namakachu. Wona steješe pod wliwom drogow. Zastojnicy w bydlenju dalše drogi namakachu. Šoferka dyrbi nětko ze skóržbu ličić. Načinjena škoda wučinja 2 000 eurow.
Kontrabas pokradnyli su njeznaći w braniborskim Joachimsthalu. Hudźbnicy běchu swoje instrumenty po probje we wočerstwjenišću wotstajili. Jako chcyše jedyn z nich njedźelu swój kontrabas wotewzać, bě tón preč. Najwjetši smyčkowy instrument je 8 500 eurow hódny, něhdźe 1,80 metrow wulki a waži přerěznje dźesać kilogramow.
Bamž a imam dobraj přećelej
Kairo (B/SN). Historiske zetkanje mjez bamžom Franciskusom a wulkoimamom Ahmadom Al-Tayyebom w Kairu je zawěrno měznik w mjezsobnych rozmołwach, kotrež wunjesechu dokument „Wo čłowjeskim bratrowstwje“. Tak jasnje kaž wulkoimam a bamž jako nawodaj najwjetšeju wěrow swěta za swobodu nabožiny a prawa žónskich wabitaj, tak jasnje zasudźataj wonaj kóždužkuli namóc a ekstremizm w mjenje Boha, ale tež sekularizm a njemoraliski indiwidualizm. Zjednoćene emiraty su zetkanje Franciskusa a Al-Tayyeba pjenježnje podpěrali. Za bamžowsku Božu mšu přewostajichu sportowy stadion. Z dotal najwjetšej křesćanskej Božej mšu na arabskej zemi su křesćenjo w islamskim swěće wulke připóznaće žnjeli.
List kardinalej Marxej
Industrijne wiki přistupne
Hannover (dpa/SN). Z tradicionalnym wobchodźenjom přez zwjazkowu kanclerku Angelu Merkel (CDU) wotewrěchu dźensa najwjetšu industrijnu přehladku swěta, Hannoverske wiki. Zhromadnje ze šwedskim ministerskim prezidentom Stefanom Löfvenom z lětušeho partnerskeho kraja je sej Merkel industrijnu technologiju přichoda wobhladała. W narěči žadaše sej wona na technologiskim polu cyłoeuropske myslenje. Löfven namjetowaše, zo měłoj Němska a Šwedska wušo hromadźe dźěłać.
Ankara w rukach opozicije
Istanbul (dpa/SN). Z komunalnych wólbow w Turkowskej je knježaca strona prezidenta Recepa Tayyipa Erdoğana zaso jako najsylniša politiska móc wušła. W stolicy Ankarje pak poćerpje bolostnu poražku: Tam přesadźi so kandidat opoziciskeje CHP Mansur Yavaș přećiwo knježacej AKP a budźe nowy wyši měšćanosta. Tež w hospodarskej metropoli Istanbulu docpě kandidat CHP snadnu wjetšinu. Tam pak njeběchu dźens dopołdnja hišće wšitke hłosy wuličene.
Němska předsydstwo přewzała
Zastupnicy politiki, cyrkwjow a towaršnosće su sobotu při ...
Stange: Serbski zakoń žadyn dar
Drježdźany (SN). Před dwaceći lětami, 31. měrca 1999, běchu wot Sakskeho krajneho sejma schwaleny Zakoń wo prawach Serbow w Swobodnym staće Sakskej w Budyšinje swjatočnje podpisali. Dopominajo na tutón podawk je ministerka za wuměłstwo a wědomosć dr. Eva-Maria Stange wuznam prawnisce zawjazowaceho ramika za podpěru serbskeho ludu jako narodnu mjeńšinu w Němskej wuzběhnyła. „Hinak hač mnohe dalše narodne mjeńšiny a ludowe skupiny w Europje nimaja Serbja žadyn zwonka Němskeje ležacy domizniski stat, kotryž móhł jich materielnje, rěčnje a identitu budźo podpěrać. Tohodla je statny a wšotowaršnostny nadawk, serbskich sobuwobydlerjow škitać, spěchować a připóznawać. W předsłowje zakonja zakótwjene prawo Serbow na škit narodneje a etniskeje identity a na prawa mjeńšiny njejsu dar abo priwileg, ale dźěl uniwerselnych čłowjeskich a swobodnych prawow.“ Wot Sakskeho krajneho sejma 20. januara 1999 jednohłósnje schwaleny spjelnja serbski zakoń politiski nadawk z artikla čo. 6 wustawy Swobodneho stata Sakskeje. Wón stupi na městno Zakonja wo zachowanju prawow serbskeho ludu z 23.
Komikar přećiwo Porošenkej
Prezidentske wólby na Ukrainje dyrbja do rozsudneho koła
Kijew (dpa/SN). Politiski nowačk abo mějićel zastojnstwa: Na EU wusměrjaca so Ukraina dyrbi w rozsudnym wólbnym kole wo swojim nowym prezidenće rozsudźić. Komikar Wladimir Zelenskij je drje so po dotalnym wuličenju při wčerawšich prezidentskich wólbach z wjace hač 30 procentami hłosow jasnje jako dobyćer přesadźił. Přiwšěm je 41lětny absolutnu wjetšinu misnył. Wón dyrbi tuž hišće raz přećiwo tuchwilnemu prezidentej Petrej Porošenkej nastupić. 53lětny dósta jenož 18 procentow hłosow wolerjow. Wobaj zastupujetaj jasnu orientaciju Ukrainy na zapad. Rozsudne wólbne koło přewjedu prawdźepodobnje jutrowničku, 21. apryla.
To a tamne (01.04.19)
Sta fanow Terenca Hilla su w sewjerobraniborskim Templinje swojemu idolej k 80ćinam narodninsku štučku zaspěwali. Zarjadowarjo zličichu sobotu něhdźe 650 wobdźělnikow w tamnišim wólnočasnym westernparku El Dorado, kaž jednaćelstwo zdźěla. Přiwisnicy Hilla zanjesechu hrajerjej spěw a pósłachu jón jako widejowe poselstwo do USA. Tam Hill, kiž bě sej swój čas z Bud Spencerom sławnosć nabył, přebywa.
Pytanje za awtom je so w Delnjej Sakskej na njewšědne wašnje wujasniło. Krótko do połnocy bě 49lětny muž w delnjosakskim Hildesheimje policiji zdźělił, zo su jemu awto pokradnyli. Jako bě policija hižo po puću, so muž znowa přizjewi a rjekny, zo je awto namakał. Wukopa so, zo njebě wón ručne borzdźidło přićahnył. Na to awto po skłoninje dele jědźeše a prasny do sćežora. Škoda: 2 500 eurow.
Załožbu dale podpěruja
Choćebuz/Dešno (SN/JaW). Społnomócnjeny zwjazkoweho knježerstwa za wusydlencow a narodne mjeńšiny dr. Bernd Fabritius je wčera prěni raz Łužicu wopytał. W Choćebuskim Serbskim domje zbliži sej wón w rozmołwje z předsydku rady Załožby za serbski lud Susann Šenkec, předsydu Domowiny Dawidom Statnikom, zastupowacym jednaćelom Domowiny Marcusom Końcarjom, předsydu rady za serbske naležnosće braniborskeje Torstenom Makom a zastupjerjom Zwjazkoweho předsydstwa Domowiny Kitom Elu dźěławosć serbskich institucijow. Na wopyće kulturneje informacije Lodki zalubichu so jemu předewšěm debjene jutrowne jejka.
W Delnjoserbskim gymnaziju wuži dr. Fabritius składnosć so z maturantami rozmołwjeć. Na jeho prašenje, hač wužiwaja delnjoserbšćinu tež zwonka kubłanišća w zjawnosći, jemu šulerjo wotmołwichu, zo haj a zo zbudźeja tak často zajim němskich sobuwobydlerjow. „To mje přewšo zwjesela“, Fabritius w rozmołwje z delnjoserbskim tydźenikom Nowy Casnik wuraznje wuzběhny.
