Nowy słowničk

Freitag, 12. November 2021 geschrieben von:
Budyšin (SN). W Ludowym nakładni­stwje Domowina je dźensa nowa BOOKii-kniha „Kak praju to hornjoserbsce, jendźelsce a francosce?“ wušła. Z pomocu słuchopisaka móža sej dźěći wot pjeć lět kaž tež serbšćinu wuknjacy starši hłownje serbske, ale tež jendźelske a francoske wurazy na přikład za zwěrjata, rostliny abo jědźe a napoje wotkryć a přiswojić. Přez dótknjenje wobraza je korektne wurjekowanje słyšeć; zrozumjenje so spěchuje a dźěći móža hrajkajo nowu rěč nawuknyć. Nimo toho móža sej tež alfabet a wšelake spěwčki w mjenowanych rěčach naposkać a je samo hnydom sobu spěwać.

Młody duch – Holaski prěni album wozjewili

Freitag, 12. November 2021 geschrieben von:

Chrósćicy (SN/jbo). Mjez žanrom folk-popa a folkrocka so pohibowacy, z elementami jazza, reggaeja kaž tež popowych zynkow 1980tych lět wobdaty a z najwšelakorišimi hudźbnymi instrumentami wobrubjeny – tu wón je, prěni studijowy album kapały Holaski. „Młody duch“ wón rěka a je wot dźensnišeho w Budyskej Serbskej kulturnej informa­ciji, pola pjekarjow w Ralbicach, Chró­sćicach a w Pančicach-Kukowje pola ­Vacekec, w Ralbičanskej kwětkarni „Kostrjanc“ kaž tež pola Donatec w Chrósćicach na předań.

Za albumom Holaskow – potajkim Donatec bratrow Józefa, Michała, Bosćana a Tadeja kaž tež Kita Marka – chowa so cyłkownje dźesać titulow. Tohorunja dźensa wozjewi skupina prěni titul albuma „Rejować wonka w dešćiku“ na a dalšich streamingowych platformach.

Sylny hudźbny zazběh

Freitag, 12. November 2021 geschrieben von:
Mój budźak klinka rano napoł sedmich. W normalnym padźe trjebam něšto mjeńšin, zo bych so z łoža wudrapał. Dźensa pak sym hnydom stanył. Wuskočich z borła, hrabnych sej šmóratko a pytach na streamingowej platformje za nowej single skupiny Holaski. Dźensa startuje předań jeje albuma „Młody duch“. Jako mały předsłód su jedyn z dźesać spěwow paska na Spotifyju a dalšich platformach wozjewili. Tak sym sej jón hnydom přez dobre słuchatka naposkał. Za mnje je prěni zaćišć stajnje najwažniši, hdyž nowy spěw słyšu. A, telko móžu přeradźić, pola single „Rejować wonka w dešćiku“ bě to fenomenalny zaćišć. Wosebje započatk z Tadejom Donatom na basgitarje a z prěnimi linkami jeho bratra Józefa mje jara jimaše. Za mnje je pěseń sylny zazběh do albuma, kotryž chcu sej tak spěšnje kaž móžno wobstarać. A jeli maja dalše spěwy po­dobnu kwalitu kaž wozjewjena single, rěčimy zawěsće bórze wo wulkej serbskej hudźbnej twórbje. Pětr Dźisławk

Nowostka z nowostku

Freitag, 12. November 2021 geschrieben von:
Sabina Žurowa je swoju w Ludowym nakładnistwje Domowina wušłu nowostku za dźěći „Zhubjena kniha mudrosće“ předstajiła. Knižna premjera wotmě so dźensa rano w Serbskej zakładnej šuli Ralbicy. Wosebitosć publikacije je, zo móža sej zajimcy hudźbu k stawiznje – dohromady je to wosom spěwčkow – nimo na knize přidatej CDji z pomocu linka resp. QR-koda tež online wuzwolić a naposkać. Foto: Weronika Žurowa

Jan Bok

Freitag, 12. November 2021 geschrieben von:
12. nazymnika 1621 zemrě w Uherskim Brodźe humanist, wučer, basnik a politikar Jan Bok, łaćonsce Johannes Bogatius. Narodźił bě so 25. hodownika 1569 we Wětošowje serbskemu překupcej a měšćanosći. Wobdarjeny hólčec wopyta Drježdźansku Křižnu šulu a gymnazij w Čěskej. Studowaše w Frankobrodźe nad Wódru a we Wittenbergu na magistra filozofije. Bok sta so z wuznamnym humanistom renesansy, kiž basnješe we łaćonšćinje a němčinje. Skutkowaše přewažnje w Słowakskej, kotruž mjenowachu tehdy „Hornju Madźarsku“. 1583 bu w Prešovje na rektora gymnazija powołany. 1599 bu rektor gymnazija w Košicach a z měšćanostu tohole najwjetšeho města wuchodneje Słowakskeje. We wšěch lětach basnješe, a rakuski kejžor Rudolph II. pomjenowa jeho na „krónowaneho poeta“. Přez namocnu napřećiwnu reformaciju w rakuskim kejžorstwje zhubi Bok swoje zastojnstwa, bě přesćěhowany a šěsć lět w Praskej Běłej wěži zajaty. Wućeknywši bu z diplomatom sedmihródskeho wjercha. We Wětowšowskej němskoserbskej dwójnej cyrkwi je trajna wustajeńca wo Boku a zwonka njeje wopomjatna tafla. Manfred Laduš

Rěčespytne a kulturnostawizniske projekty předstajili

Donnerstag, 11. November 2021 geschrieben von:

Wojerecy (SN/bn). Institutny dźeń Serbskeho instituta (SI) je „přiležnosć, zjawnosć wo našich aktualnych slědźenskich projektach a předewzaćach informować. Prěni raz přewjedźemy jón we Wojerecach a zdobom prěni raz tež wirtuelnje“, witaše wčera direktor SI dr. Hauke Bartels přitomnych w Kulturnej fabrice kaž tež za wobrazowkami. Hosćićel zarjadowanja, měšćanosta Měrko Pink, postrowi wobdźělnikow serbsce a wuzběhny, zo chce „aspektam serbskosće a dwurěčnosće we Wojerecach přichodnje wjace kedźbnosće wěnować, hač bě to dotal z wašnjom“.

Dźensa w 20.11 hodź. wuńdźe nowy widejo „Milliarden“ Silbermond, kotryž skupina ekskluziwnje na swojim Youtube-kanalu we wosebitym wudaću „Wäbshow Spezial“ prezentuje. Prěni raz su hudźbnicy na literarnu knihu wusměrjeny spěw spisali. Tak jedna widejo wo najnowšim wudaću Sebastiana Fitzekoweho psychothrillera „Playlist“. Foto: Maćij Bulank

Pozawnowy kwartet zahorił

Donnerstag, 11. November 2021 geschrieben von:

Budyšin (CRM/SN). Lipšćanski pozawnowy kwartet Opus 4 słuša k elitarnemu kruhej po cyłej Europje požadanych hudźbnych cyłkow. Jemu přisłušeja wot lěta jeho załoženja 1994 zwjetša hudźbnicy, kotřiž hraja w swětosławnym sukelnicowym orchestrje wikoweho a zdobom hudźbneho města Lipska. Minjenu póndźelu koncertowaše ekscelentne ćěleso na iniciatiwu Budyskeho ekume­niskeho tachantskeho wobchoda kaž tež z podpěru tudyšeho Rotaryjoweho kluba w cyrkwi swj. Pětra. Mnohich wopytowarjow je koncert kwarteta dosć rědkeje instrumentalneje zestawy jara zajimował, mjez nimi tež někotrych Serbow. Přetož wulka běše radosć, zo bě so poradźiło wu­branych wuměłcow do Budyšina zwabić. A wočakowanja so w połnej měrje spjelnichu.

Prěni poradnik

Dienstag, 09. November 2021 geschrieben von:
Budyšin (SN). „Pyšnje woblacone/Schön gekleidet“ rěka prěnja kniha Doris Heinzoweje, kotraž je minjeny pjatk w Ludowym nakładnistwje Domowiny wušła. W njej wěnuje so awtorka delnjoserbskej rejowanskej drasće. Dwurěčny delnjoserbsko-němski poradnik skići na wobrazliwe wašnje pomoc za zamołwity wobchad z narodnej drastu. Nazhonita hotowańča wěnuje so w swojej prěničce hladanju a korektnym přihotam drasty kaž tež jeje spěšnemu woblěkanju. Knižna premjera budźe 12. nowembra we 18 hodź. w Žylowskim hosćencu „Am Sport-Park“. Płaća aktualne postajenja korony dla.

„Šerjenje“ korona

Dienstag, 09. November 2021 geschrieben von:
A znowa začuwamy wšudźe strach před „šerjenjom“ z mjenom korona. Tole přińdźe mi do mysli, jako słyšach, zo bu cyły rjad zarjadowanjow sylnje stupaceje incidency dla wotprajeny. Tež Ralbičanska wo­sada je zarjadowanje na swjatoh Měrćina wotprajiła. Škoda to předewšěm za dźěći. „Z tym dyrbimy žiwi być“, tele dny časćišo słyšu, dźe-li wo to korony dla něšto wotprajić abo nic. Tola dźe tež hinak. Sobotu drje běchu w Budyskim wokrjesu hišće zarja­dowanja pod prawidłom 3G móžne – nětko su wone z 2G přiwótřene – při­wšěm pak měnju, zo njeměli wótku do žita ćisnyć a wšitko njewotprajić. Chwalu sej zmužitosć, kaž na přikład skupiny Wólbernosće, kotraž je sobotu w Budyšinje nazymski koncert wuhotowała a tak mnohim rjane wokomiki wobradźiła. Hladajo na to je so předsydstwo muskeho chóra Delany rozsudźiło jubilejny koncert k 50lětnemu wobstaću cyłka přichodnu njedźelu přewjesć, wobkedźbujo wězo pła­ćiwe prawidło. Janek Wowčer

Serbska debata

Neuheiten LND