Budyšin (SN/CoR). Zajim za premjeru dwuzwjazkoweje knihi „Die Oberlausitz im Zweiten Weltkrieg – Studie zu den wendisch-deutschen Kreisen in Sachsen und Niederschlesien 1936–1946“ wčera wječor bě wjetši hač ličba dowolenych městnow pod koronawuměnjenjemi na žurli Budyskeho Kamjentneho domu. Dohromady 59 přizjewjenych zajimcow su Paul Fischer jako hosćićel, jednaćel LND Syman Pětr Cyž a zastupowaca direk­torka Serbskeho instituta (SI) dr. Susan­ne Hozyna na knižne předstajenje witali, na kotrejž so awtor a šěsć lět při SI přistajeny historikar dr. Michael Richter njewobdźěli.

Njedawno zhonichmy tu we Łužicy zrudźacu powěsć, zo je znaty a za Serbow so horjacy přećel Serbow Ladislav Smejkal w Čěskej Lípje zemrěł. Wón bě na 50 lět w tamnišim domiznowědnym muzeju jako historikar nowočasnych stawiznow dźěłał. Je organizował a přihotował tójšto wustajeńcow k stawiznam Čěskeje Lípy­ a wokoliny w času 1914 do 1945.

Zhorjelc (CRM/SN). Na zawčerawšej wólbnej njedźeli přeprosy Zhorjelska Chrystusowa cyrkwinska wosada zhromadnje z tamnišim dźiwadłom a hudźbnym towarstwom w zažnej wječornej hodźinje na nazymski koncert. Ewangelska cyrkej njedaloko katolskeje chorownje swj. Carolusa bě hosćićelski dom Zhorjelskeho cyrkwinskeho orchestra, kotremuž přisłušeja w prěnim rjedźe lajscy hudźbnicy. Zo bychu naročny program zmištrowali, stejachu jim instrumentalni kaž tež spěwni solisća z blišeje wokoliny kaž tež zdaloka poboku. Wuměłski nawod měješe Theresa Bönisch z Niskeje.