Serbsce abo čěsce?

Montag, 19. Dezember 2016 geschrieben von:
Adwentny koncert chóra 1. serbskeje kulturneje brigady pod dirigatom tachantskeho kantora Friedemanna Böhmy so­botu w Michałskej cyrkwi je mi znowa wuwědomił, kak mjezy překročacy repertoire tohole ćělesa je. Mjez připosłucharjemi su hač do započatka koncerta mnozy hišće hódali, w kotrej rěči drje budu gymnaziasća spěwać: serbsce abo čěsce? Zo zanjesechu twórbu „Česká mše vánoční“ wučerja, kantora a komponista zažneje romantiki Jakuba Jana Ryby skónčnje w originalnej rěči, jeho maćeršćinje, bě jenož konsekwentne. Z podpěru spěwnych solistow z Prahi kaž tež orchestra Serb­skeho ludoweho ansambla sta so tradicionalny adwentny koncert z wurjadnym hudźbnym dožiwjenjom słowjanskeje wza­jomosće. Kajki to dopokaz žiwych serbsko-čěskich kulturnych stykow, kotryž su wobdźěleni wuměłcy swojemu publikumej wobradźili! Axel Arlt

Grodkowska kapała 60lětne wobstaće swjećiła

Montag, 19. Dezember 2016 geschrieben von:

Grodk (JoS/SN). Poprawom su Grodkow- čenjo to hakle na lětušim domizniskim swjedźenju w awgusće na wědomje brali, jako w programowym zešiwku w přihotach koncerta na torhošću na to skedźbnichu: Dujerske hudźbne ćěleso Drastowa kapała Grodk z.t. swjeći lětsa 60. róčnicu załoženja. Wčera su tole z wosebitym koncertom w Gródkowskej křižnej cyrkwi woswjećili, na čož tójšto wobydlerjow přichwata.

Bě to 1954, jako dźensa 80lětny Lothar Barnowski jako absolwent fachoweje šule za hudźbu w Neustrelitzu namołwu na „Twar młodźiny“ Dubrawskeje (Trattendorf) milinarnje wusłyša. Wón dósta nadawk, so wo duchownokulturne žiwjenje starać. Za tehdy 18lětneho bě tole wulke wužadanje, wón zamó pak Dujersku kapału Dubrawskeje milinarnje wutworić. Swoju premjeru měješe nowe hudźbne ćěleso 1. meje 1956, jako na Grodkowskim naměsće piskaše.

Chinska telewizija w Budyšinje nahrawała

Montag, 19. Dezember 2016 geschrieben von:

Budyšin (UM/SN). Team jendźelskorěčneho chinskeho telewizijneho sćelaka cctv.news bě wot minjeneho štwórtka do soboty w Budyšinje po puću. „Nahrawamy za něhdźe wosom mjeńšin trajacy film na temu ‚integracija w Němskej‘, kotryž ma so w januarje wusyłać“, rjekny kameramuž a producent Hans Schauerte. Zo je wón zhromadnje z europskim korespondentom sćelaka Guyjom Hendersonom za to do Budyšina přijěł, njeje připad. „Wobrazy palaceho domu za požadarjow azyla a krawale w septembrje běchu tež pola nas widźeć. Chcemy so intensiwnišo z tym rozestajeć a so prašeć, čehodla je integracija tajke wulke wužadanje“, Schauerte rozłoži. Budyski swobodny žurnalist je jimaj na městnje pomhał kontakty nawjazać.

Wjac pjenjez za projekty

Freitag, 16. Dezember 2016 geschrieben von:

Z wjace hač poł miliona eurami spěchuje Kulturny konwent Hornja Łužica-Delnja Šleska klětu dohromady 42 projektow, mjez nimi někotre serbske. To wobzamknychu wčera na 106. posedźenju konwenta w Zhorjelcu.

Zhorjelc (SN/CoR). Předsyda konwenta a Zhorjelski krajny rada Bernd Lange (CDU) rozžohnowa wčera z dźakom z čłonku Katju Altmann a z prof. Dietricha Šołtu, kotryž bě dlěje hač dźesać lět jako kulturny senator přeprošeny, zo by so na gremiju jako poradźowar wobdźělił.

Wo najwažnišej temje dnjoweho porjada rozsudneho gremija kulturneho ruma Hornja Łužica-Delnja Šleska su čłonojo wčera njezjawnje wuradźowali. Lisćinu projektoweho spěchowanja su na to oficialnje wobzamknyli. W etaće 2017 předwidźany hornc projektoweho spěchowanja z něhdźe 594 000 eurami njejsu wčera hišće połnje wučerpali. Wo někotrych projektach chcedźa na přichodnym posedźenju 25. apryla znowa wuradźować. Jasne pak je, zo spěchuja klětu 42 projektow z nimale 582 000 eurami. Lětsa bě to jenož 475 000 eurow.

Dlěje hač štwórć lětstotka ludźi zawjeseleja

Donnerstag, 15. Dezember 2016 geschrieben von:

Wustajeńca w Slepjanskim Serbskim kulturnym centrumje swědči wo wuwiću a skutkowanju Kantorkow

Z woblubowanej pěsnju „Slěpe, to jo rjana wjeska“ bě třinaće bywšich kantorkow ze wsow nad Strugu 17. nowembra 1990 w Serbskim domje swój lóštny program na Budyskej župnej kermuši zahajiło. Wone wokřewichu z tójšto dalšimi originalnymi spěwami swojeje Slepjanskeje domizny w tamnišej serbskej narěči wjace hač 50 kermušnych hosći. Hižo 1988 běchu spěwarki pod nawodom Rownjanskeje wučerki Lenki Nowakoweje na wokrjesnym festiwalu serbskeje kultury w Slepom a 1989 na wulkim festiwalu w Budyšinje swoje spěwy zanjesli a k tomu přazu předstajili. Budyska župna kermuša 1990 pak sta so z ródnej hodźinu noweho spěwneho ćělesa, kotrež je sej pod mjenom Slepjanske kantorki w běhu 25 lět wulke připóznaće we Łužicy, po cyłej Němskej a we wukraju zdobyło.

Za swój adwentny koncert sobotu, 17. decembra, w 17 hodź. w Budyskej Michałskej cyrkwi je chór 1. serbskeje kulturneje bri­gady dźensa hromadźe z orchestrom SLA zwučował. Dale skutkuja sobu studenća Akademije muziskich wuměłstwow z Prahi. Na koncerće zaklinči „Česká mše vánoční“ (Čěska hodowna mša) čěskeho komponista Jakuba Jana Ryby. Foto: SN/Maćij Bulank

Chór Budyšin w stolicy spěwał

Mittwoch, 14. Dezember 2016 geschrieben von:

Drježdźany (JKr/SN). Adwentny čas je čas njeličomnych koncertow, we Łužicy runje tak kaž w Drježdźanach. W sakskej stolicy koncertowaše minjenu njedźelu chór Budyšin zhromadnje z chórom Friedrich Wolf. Drježdźanski spěwny cyłk, kotryž swjeći lětsa 60. róčnicu swojeho wobstaća, bě sej chór Budyšin na zhromadny dohodowny koncert přeprosył. Chóraj zwjazuja wjelelětne přećelske styki, sahace do časa wuměłskeju nawodow Jana Bulanka w Budyšinje a Rolfa Mickana w Drježdźanach. Wonaj běštaj nawod swój čas do rukow Michała Jancy a Erica Weishaupta přepodałoj.

Lubowarjo njewšědnych akrobatiskich pohibow k elektroniskej hudźbje su minjeny kónc tydźenja w Budyšinje na swoje kóšty přišli. W Kamjentnym domje wotmě so štwórty tak mjenowany „Senftown Festival“. Breakdancery z cyłeje Němskeje nastupichu tam tež přećiwo wukrajnym hosćom. „Rejwanje“ na hłowje njeje tohorunja pobrachowało. Foto: Jörg Stephan

Pišćelowa hudźba w swětle swěčkow

Montag, 12. Dezember 2016 geschrieben von:

Budyšin (CRM/SN). Dlěši čas dyrbjachu lubowarjo pišćeloweje hudźby koncerty w Budyskim simultanym Božim domje, w tachantskej cyrkwi, parować, dokelž bu gotiski twar wotnutřka saněrowany. Sobotu do třećeje adwentneje njedźele poskićištaj cyrkwinskaj hudźbnaj direktoraj Friedemann Böhme na Leopolda Kohlowych 150 lět starych pišćelach w katolskim dźělu a Michael Vetter na nowšim a zdobom wjetšim instrumenće z dźěłarnje Herrmanna Eule w ewangelskim dźělu pišćelowu hudźbu w swětle swěčkow.

Prěni raz je Michael Vetter, kiž běše w septembrje 2014 naslědnistwo Matthiasa Pfunda nastupił, ze swojim w katolskej wosadźe hižo wjace hač 25 lět skutkowacym kolegu zhromadny koncert wotměł. Tale mjeztym jara woblu­bowana tradicija ma lědma runjeća, a jeje pokročowanje ma so tuž wysoko hód­noćić.­

Na Wojerowskej Cyrkwinskej hasy 11 je nětko widźeć wosebita wustajeńca. Fotograf Mirko Joerg Kellner a z telewizije znata dźiwadźelnica­ Susanne von Borsody (2. a 3. wotlěwa) pokazujetaj tam fotografije a mólby, kotrež so zwjetša přirodźe wěnuja.­ Z měšeńcu tychle twórbow nastawa widźenjahódny nowy rukopis. Přehladka je wot dźensnišeho za čas Wojerowskich Teschenskich wikow a potom hač do 4. januara póndźelu, wutoru a pjatk wot 14 do 18 hodź. přistupna. Foto: Ulrike Herzger

Anzeige