Křižerscy kantorojoso njezetkali
Radwor (SN/JaW). Wčerawša zhromadźizna wosadnych křižerskich kantorow w Radworju njeje so wotměła. To zdźěli na naprašowanje našeho wječornika Radworski wosadny farar a zamołwity za křižerske procesiony Beno Jakubaš. „Wona je z rozsudom Sakskeje njetrjebawša“, farar měni. Su ju tuž krótkodobnje wotprajili. Tak njeje tež k žanomu dojednanju wosadnych kantorow dóšło, kak měli w naležnosći lětušich křižerskich procesionow dale postupować. Kaž farar Jakubaš rjekny, dyrbjeli runje nětko w času coronapandemije wšitcy rozumni być. „Njejsym sej w nimale 40 lětach jako křižer myslił, zo raz k tajkej situaciji dóńdźe. Ale Sakska je rozsudźiła, a po postajenjach stata dyrbimy so měć.“
Lětsa žane mócne haleluja křižerjow?
Sakska krajna direkcija jutrowne jěchanje zakazała
Drježdźany/Budyšin (SN/JaW). Křižerjo njesmědźa lětsa jěchać. Tak je Sakska krajna direkcija w Drježdźanach rozsudźiła a křižerske procesiony zakazała. To wozjewi wčera Budyski krajnoradny zarjad w swojej wšědnej rozprawje wo aktualnym stawje nastupajo coronapandemiju.
We wozjewjenju wobkruća krajna direkcija rozsud z tuchwilu płaćiwymi postajenjemi přećiwo rozpřestrěću corony. „Hač do 5. apryla płaći powšitkowne postajenje socialneho ministerstwa, kotrež rjaduje krute wobmjezowanje swobodneho pohibowanja. Nimo toho je powšitkowny wukaz z 19. měrca k zakazej wšitkich zjawnych a njezjawnych zarjadowanjow kaž tež zhromadźenja ludźi hišće hač do 20. apryla płaćiwy. Tež při nałožowanju tohole postajenja njeje móžno jutrowne jěchanje zarjadować“, w spisu rěka.
Serbske mjena sydlišćow online
Kompromis móžny?
Zajim na spěchowanju přiběra
Drježdźany (SN/bn). Sakske statne ministerstwo za regionalne wuwiće zdźěla, zo je ličba zajimcow za druhe koło idejoweho wubědźowanja Sakski fonds „Čiń sobu!“ porno lońšemu wurisanju wo něhdźe třećinu přiběrała. Cyłkownje je hač do poslednjeho termina 15. měrca 1 974 namjetow za strukturnu změnu aktiwnje formowace projekty dóšło. Wjacore juryje, zestajane z wobydlerjow, zastupjerjow wokrjesow, komunow, wysokich šulow, šulow, kultury, hospodarstwa, dźěłarnistwow a knježerstwa, chcedźa je přichodnje pruwować a mytowanych wuzwolić. Hač jich tež lětsa zjawnje wuznamjenja, tuchwilu hišće jasne njeje. Nimo toho móže zaso publikum swojeho faworita pomjenować.
Nabožinu sej z hraćom w interneće serbsce wotkryć
Hódać „to go“, wjeselo měć a při tym něšto nowe wuknyć – wabjenje to, kotrež tež Michała Cyža přeswědča. Kahoot! je platforma, na kotrejž móža zajimcy sami kwisy zestajeć a je dale dawać.
Budyšin (jak/SN). „Rano w štyrjoch mějach ideju, w běhu dweju hodźin swójski kwis zestajeć a jón online stajić“, powěda nawoda Budyskeho studija Sakskeho wukubłanskeho a wupruwowanskeho kanala Michał Cyž. Wažne jemu při wuzwolenju platformy Kahoot! předewšěm bě, zo móža wužiwarjo w app a na webstronje serbsce čitać. Temy kwisa su katolska nabožina, jeje nałožki a pozadki. Te wón na zajimawe a žortne wašnje prezentuje. Jeho zaměr je zaběra z nabožinu. Hrajer ma na přikład na prašeni wotmołwić, kelko serbskich katolskich wosadow je, abo kotru wulkosć čriji Jězus ma.
Internet, internet ...
Nadarjeny basnik, spisowaćel a redaktor
Dźensa by Gerat Libš 85ćiny swjećił. Rodźeny we Wěteńcy do swójby mulerja a domjaceje studowaše wón po maturje slawistiku w Lipsku. Tehdy a dalše lěta bě aktiwny kopar w Njebjelčicach a tak znaty a woblubowany pola młodźiny wokolnych wsow. Po studiju dźěłaše w lektoraće za wučbnicy w Budyšinje, wot lěta 1959 do 1981 bě redaktor dźěćaceho časopisa „Płomjo“. Po tym skutkowaše znowa někotre lěta jako lektor a jako redaktor Noweje doby. 1. awgusta 2012 wón doma w Pančicach-Kukowje zemrě.
Basniske spočatki Libša sahaja do jeho studentskich lět. Pozdźišo wozjewješe prawidłownje, zwjetša pod pseudonymom „Lindaš“. Za swoje młode čitarstwo pisaše basnje wo přirodźe a zwěrjatach. Prěnja zběrka „Z połnej karu“ wuńdźe 1970, tři lěta po njej powědka w hrónčkach „Čepjela a Prynka“. We wjazanej rěči předstaji dźěćom mjez druhim „Kózlika Pryzlika“ a „Jěžika-Wšitkowědźika“. Dalšej zběrce wuńdźeštej 1981 a 1989: „Swinjemišter Dunč“ a „To swět koči čini woči“.
Wostudu njepasć
Budyšin (SN). Tež lětsa so najebać coronawirus wubědźowanje wo najrjeńše serbske jutrowne jejko za dźěći a młodostnych do 24 lět dale přewjeduje. To zdźěli Weronika Suchowa, zamołwita za projekty Spěchowanskeho kruha za serbsku ludowu kulturu. Na zwučene wašnje maja kolekcije hač do srjedy po jutrach zapodate być, potajkim 15. apryla. Tónraz je jenički puć wotedaća póstowy. Zarjad Domowiny w nadawku jeje čłonskeho towarstwa přiwzaće kolekcijow přewozmje, pod tutej adresu: Domowina – Zwjazk Łužiskich Serbow z.t., hesło: jutrowne jejka, PF 16 28, 02606 Budyšin / Bautzen. Štóž so wobdźěli, njech njezabudźe podać mjeno, adresu, starobu zapósłarja a techniku. Wotedać maja wobdźělnicy kolekcije z dwěmaj wudutymaj kokošacymaj jejkomaj (swójske kreacije, swójbne a regionalne tradicije). Preměrowane budu tradicionalne serbske techniki wóskowanje, bosěrowanje, škrabanje.
Serbja w nowej ludowej komorje
20. měrca 1990 wozjewi kaž wšitke dźeniki NDR tež Nowa doba nachwilny wuslědk wólbow Ludoweje komory NDR. Dwaj dnjej do toho, 18. měrca, móžeše 12 426 443 staćanow prěni króć po towaršnostnym přewróće w NDR swobodnje wolić. Z nich je 11 604 418 ludźi swój hłós wotedało. To wučinješe 93,22 procentow, a swědčeše wo njewšědnje wulkim wobdźělenju. 11 541 155 płaćiwych hłosow wólbni pomocnicy wuličichu.
