Stawizniske rozestajenje z nacionalsocialistiskim časom je trěbniše a aktualniše hač hdy prjedy. K tomu šulerski projekt „Přećiwo zabyću“ wot lěta 1996 wobstajnje přinošuje. Z nim su dotal wjac hač 2 000 šulerki a šulerjow docpěli. To podšmórny předsydka Wojerowskeho regionalneho dźěłoweho městna za kubłanje, demokratiju a žiwjenske perspektiwy (RAA) Helga Nickich na njedawnym zahajenju projektneho dnja z časowymi swědkami we Wojerecach. „Tema je hladajo na politisku situaciju aktualniša hač hdy prjedy. Partnerojo zetkawaja so we wobłuku projekta zamołwiće na jednej wysokosći. Projekt žiwi so z angažementa šulerjow a wučerjow“, wona měnješe. Šulerki a šulerjo 9. a 10. lětnikow z wyšeju šulow Při planetariju a Na kromje města, Léona Foucaultoweho a Lessingoweho kaž tež křesćanskeho gymnazija Johanneum běchu na zahajenju pódla. Dwanaće časowych swědkow abo jich potomnicy rozprawjachu na šulach wo chětro hnujacych dóńtach.
Dešno (SN/JFK/CoR). Njedawno – 6. januara – je molerka a ilustratorka Ingrid Grošcyna z Lubina swoje 75. narodniny swjećiła. Jej k česći je Domizniski muzej Dešno wosebitu wustajeńcu z jeje twórbami wuhotował, a to pod titulom „Błóta – Spreewald“. Něhdźe 75 zajimcow je na wotewrjenje přehladki 19. januara přišło.
W swojej lawdaciji nawodnica Dešnjanskeho Domizniskeho muzeja Babette Zenkerowa na to skedźbni, zo je z Grabina (Finsterwalde) pochadźaca wuměłča hižo wot časa swojeho wukubłanja na molersku mišterku wusko z Lubinom a Błótami zwjazana. Prezentowane rysowanki, akwarele, ilustracije a wolijowe wobrazy Ingrid Grošcyneje pokazuja magisku rjanosć Błótow a předstaja jich powěsćowy swět w čiłych barbach a formach. Tež wo serbskim wšědnym dnju powěda wuměłča w swojej wosebitej wobrazowej rěči.
Na wosebity filmowy wječor we wobłuku wustajeńcy „SORBIAN STREET STYLE“ je wčera Budyski Serbski muzej přeprosył. Ameriska filmowa produkcija „THE TRUE COST. Płaćizna mody“ z lěta 2015 njeje tehdy jenož wótre diskusije wo čłowjeka zacpěwacej modowej industriji zbudźiła, ale tež wo zadźerženju kupcow.
Budyšin (SN/CoR). Tež lětsa namołwja Spěchowanski kruh za serbsku ludowu kulturu znowa wšitkich dorosćenych lajskich wuměłcow z cyłeje Łužicy so na wubědźowanju wo najrjeńše serbske jutrowne jejko wobdźělić, kotrež so 67. raz wotměwa. Wotedać móža zajimcy kolekcije hač do pjatka po popjelnej srjedźe, 28. februara, w Budyskim Serbskim domje abo w regionalnych běrowach Domowiny a Załožby za serbski lud. Dobyćerjow wubědźowanja za dorosćenych chcedźa na swjedźenskim zahajenju 29. serbskich jutrownych wikow 7. měrca w Serbskim domje w Budyšinje wozjewić a mytować. Wubědźowanje za dźěći a młodostnych so přizamknje. Termin za wotedaće je tu 15. apryl.
Nimo hižo nazhonitych lajskich wuměłcow chcedźa wosebje tež wšitkich tych narěčeć, kotřiž hižo dołho doma do jutrow jejka wóskuja, ale kotřiž so hišće njejsu přewinyli, swoje najrjeńše debjene jejka wotedać.
Choćebuz (HA/SN). Na dokładnje tym dnju, na kotrymž bě so znaty delnjoserbski moler a grafikar Fryco Latk narodźił, su dostojnje na njeho spominali a jeho počesćili. Minjeny pjatk wotewrichu składnostnje 125. narodnin wuměłca wosebitu personalnu wustajeńcu „Fryco Latk – Domownja“ w nowej „Galeriji Braniborska“ w bywšim „Großenhainskim dwórnišću“ w Choćebuzu. Partnerski wuhotowar přehladki je Serbski muzej w Choćebuzu, kiž je za nju cyłkownje 16 twórbow ze swójskeho wobstatka kaž tež z priwatneho wobsydstwa k dispoziciji stajił. Wjetšina wobrazow je runje tak kaž 25 dalšich požčonkow prěni raz docyła zjawnje wustajenych. Mnoho eksponatow pokazuje krajiny kołowokoło Picnja a Noweje Jsy, zwotkelž Fryco Latk pochadźa.