Wódny muž kaž braška

Mittwoch, 18. April 2018 geschrieben von:

Dwěsćě lět łužiskich stawiznow w špihelu swětoweje politiki

Stawizny regiona, haj samo stawizny swójby wotbłyšćuja stajnje tež stawizny swěta. Spočatk měrca dožiwi kruch „Łužiske kwartěry abo Rus w pincy“ swoju prapremjeru na hłownym jewišću Němsko-Serbskeho ludoweho dźiwadła. Inscenacija saha wot Napoleoniskich wójnow hač do přitomnosće. Koło wosobow, kotrež hru njese, je přehladne. Wona wuńdźe z dźewjeć hrajerjemi. W srjedźišću steja swójba – mać, nan a dźowka –, potencielny serbski nawoženja a Rus kaž tež tři pódlanske aktery, kotrež wšelake róle hraja. Přihladowarjo sćěhuja wosobam w změnje časow a k prěčišćam stawiznow, kotrež zdobom jednotliwe akty postajeja: 1813/15, 1918, 1945, politiskemu přewrótej w Němskej a – w epilogu – přitomnosći.

Hudźbno-literarny wječor „Moja archa Horni Hajnk“ Serbskeho ludoweho ansambla dožiwi spočatk měrca swoju premjeru w Budyskej Röhrscheidtowej bašće. Pod titulom „Bratr štom a sotra škowronc“ bě SLA w minjenej hrajnej dobje podobny, nic pak identiski program z tekstami Jurja Brězana w němskej rěči pokazał. W lěću planuje ansambl předstajenje pod hołym njebjom w Hornim Hajnku.

Trio con moto – komorna wobsadka instrumentalistow SLA – wobrubi hudźbnje sceniske čitanje hrajerja Němsko-Serbskeho ludoweho dźiwadła Měrka Brankačka. Mjez tekstami ze zarjadowanju mjeno spožčaceje knihi Jurja Brězana wusahowachu wosebje stawiznički wo wušparanjach lyriskeho ja ze šeršenjemi, nócnym koncertowanju rjechtacych žabow a swójbje kołpjow, kotraž nowe haty za swój dorost pyta.

Brankačk interpretowaše swoje přinoški raz po wašnju rěčnika dokumentarneho filma, raz poetisce, stajnje powažliwje a přitulnje w duktusu. Waha mjez słowom a zynkom bě wuběrna, hdys ­a hdys napodobnichu hudźbnicy zwuki přirody, kotrež Brězan w swojich wobkedźbowanjach wopisuje.

Zejlerjowe myto 2018 do Slepjanskich kónčin

Mittwoch, 18. April 2018 geschrieben von:

Drježdźany (SN/at). Juliana Kaulfürstowa a Dieter Redo staj lawreataj Zejlerjoweho myta 2018. Wo tym je sakska ministerka za wědomosć a wuměłstwo dr. Eva-Maria Stange (SPD) dźensa informowała. Sydomwosobowa jury je wobeju jeju wusahowaceho přinoška k wozrodźenju Slepjanskeje serbšćiny dla za wuznamjenjenje z mytom za serbsku rěč poručiła.

Krabat z kapsy

Mittwoch, 18. April 2018 geschrieben von:
Budyšin (SN/JaW). Kompjuterowa hra „KRABAT a potajnstwo serbskeho krala“ předleži nětko tež za smartphony. Wo tym informowaše wčera Załožba za serbski lud. „Časy so měnjeja a Krabat je dźeń a mobilniši“, w pismje mjez druhim rěka. Hru poskićeja we wersijomaj za Apple a Google w online-kupnicach za 5,99 ­eurow. Hač do prěnjeho stawa pak móža zajimcy hru darmotnje hrać. W lěće 2015 wušłu serbsku kompjuterowu hru je skupina Rapaki w nadawku Załožby za serbski lud zdźěłała a ju nětko tohorunja na mobilnu wersiju dale wuwiła.

Hudźbne dnyz nowej fanfaru

Dienstag, 17. April 2018 geschrieben von:
Wojerecy (SiR/SN). Ze swjatočnym koncertom Noweje Łužiskeje filharmonije su minjenu njedźelu 53. „Wojerowske swjedźenske dny hudźby“ w tamnišej Łužiskej hali zahajili. Pod nawodom Johannesa Pella předstajichu Zhorjelscy hudźbnicy wot Jana Cyža skomponowanu nowu fanfaru zarjadowanja. „Z tymle motiwom chcemy přichodnje naše zarjadowanje wotewrić. Dźakuju so Dorje Gebauerowej z Ćiska za nastork“, rjekny ­Wojerowski wyši měšćanosta Stefan ­Skora (CDU) a wuzběhny, zo „su hudźbne dny mjeztym kruty kulturny wjeršk. Štož bě před wjace hač 50 lětami z jeno štyri zarjadowanjemi započinało, je dźensa ­pisana měšeńca wšelakich žanrow hudźby, tworjaceho wuměłstwa ­a dźiwadła. Na to směmy jara hordźi być. Z 225 hudźbnikow, kotřiž so lětsa wobdźěleja, je 212 z Wojerec a wokoliny. Dny hudźby su k tomu na najdlěšu tradiciju złožowace so zarjadowanje tohole razu we Łužicy.“ Po witanju přepoda Skora Bukečanej Gustavej Hentgesej Čestne myto města Wojerecy. Trompetar bě sej wuznamjenjenje z najlěpšim wukonom lětušeho regionalneho wubědźowanja rjada „Młodźina hudźi“ zasłužił.

Lyrika, proza a hudźba w barace

Dienstag, 17. April 2018 geschrieben von:

Nuknica (SN/bn). Prěnje wot towarstwa barakka zarjadowane čitanje přiwabi minjenu sobotu něhdźe 30 zajimcow – někotři wonka stejo a přez wupójsnjenjej woknje připosłuchajo a hladajo – do Nukničanskeje baraki. Nimo stajnych wopytowarjow běchu tež wobliča widźeć, kotrež skerje zrědka w barace wuhladaš. Třo hosćo běchu z Waršawy přijěli.

Wosebitosć wječora njebě jenož, zo su předstajacy so kaž tež předstajane awtorki a awtorojo na někajkežkuli wašnje z klubom-towarstwom zwjazani, ale tež, zo njeměli jednotliwe přinoški dlěje hač sydom mjeńšin trać.

Wulke připóznaće žnjeli

Montag, 16. April 2018 geschrieben von:
Prěni raz je Němsko-Serbske ludowe dźiwadło sobotu wječor inscenaciju w delnjoserbskej rěči „Wjelika wutšoba/Das Herz eines Boxers“ w Hochozy předstajiło. Kruch, kotryž wobjednawa aktualne žiwjenske prašenja – dwě generaciji, bywši wuspěšny pjasćowar a młodostny, zastupujetej nahlady cyle napřećiwneju swětow – je wulke připóznaće publikuma žnjał. Akteraj na jewišću běštaj Jan Mikan a Jurij Šiman (wotlěwa). Wo delnjoserbski tekst je so Ingrid Hustetowa postarała. Wčera předstajichu hru w Dešnje, jutře w 17 hodź. pokazaja ju w Choćebuskim komornym jewišću a 29. apryla w Turjeju. Foto: NSLDź/Mirosław Nowotny

Serbski ludowy ansambl je minjenu sobotu zaso za młodymi hudźbnymi talentami pytał. Ćežišćo hudźbneho wubědźowanja, kotrež wotmě so w rumnosćach Choćebuskeje „Academy of Music“, bě předstajenje twórbow serbskich komponistow. Swoje wukony předstajichu młodźi wuměłcy w starobje mjez šěsć a 23 lětami, mjez nimi spěwarka Valerie Hering. Najlěpšich chcedźa na koncert wuznamjenjenych 3. junija do Budyšina přeprosyć. Foto: Michael Helbig

W Budyskim NSLDź je sej minjenu sobotu 9 760 ludźi w předpředani zastupny lisćik za lětuše 23. lětnje dźiwadło kupiło. Z tym je hižo něhdźe štwórćina wšěch městnow preč. Cyłkownje je wot 14. junija (premjera) do 22. julija 35 předstajenjow třećeho dźěla Olsenoweje cwólby na Budyskim hrodźe planowanych. Kaž z dźiwadła rěka, pytaja hišće muskich komparsow. Pod režiju intendanta NSLDź Lutza Hillmanna, wuhotowanjom Mirosława Nowotneho a Olafa Haisy, Istvána Kobjele, Rainera Grußa kaž tež Katje Reimann we hłownych rólach bě jebarska komedija w zašłymaj lětomaj wulki wuspěch. Foto: Uwe Soeder

Zahaja Wojerowske hudźbne dny

Freitag, 13. April 2018 geschrieben von:

Na lětušich Wojerowskich hudźbnych dnjach stej znowa tež serbskej programaj planowanej: bajka „Překlepana liška“­ z SLA a literarno-hudźbny wječor z Drježdźanskim trijom.

Wojerecy (SN/bn). Tradicionelnje ze zahajenskim koncertom we Łužiskej hali započnu so njedźelu mjeztym „53. Wo­je­rowske swjedźenske dny hudźby“. Nowa Łužiska filharmonija předstaji pod he­słom „Drama Queens“ twórby Giacoma Puccinija, Giuseppy Verdija a Gaetana Donizettija. Nimo toho spožča na zarjadowanju Čestne myto města Wojerec. Lětsa wuznamjenja Bukečanskeho trubkarja Gustava Hentgesa, kiž je na regionalnym wurisanju „Młodźina hudźi 2018“ prěnje městno wobsadźił.

Na wjacorych jewišćach wustupja přichod­­ne tři tydźenje solisća, komor­ne cyłki,­­ tři orchestry, swing pěstowaca skupina Zucchini Sistaz a Lipšćanski kwintet blachowych dujerjow emBRASSment. „Wosebity instrument“ je lětsa lutnja,­ kotrejž­ wječor sam za so wěnuja. Dalšej programowej dypkaj budźetej němy film Ernsta Lubitscha „Hórska kóčka“ ze žiwym hudźbnym přewodom a wustajeńca wobrazow Kurta Klinkerta.

Anzeige