Přihotuja domizniski dźeń

Montag, 28. Januar 2019 geschrieben von:

Wulke Ždźary (AK/SN). Lětuši dwanaty Serbski ewangelski domizniski dźeń Wojerowskeho­ regiona budźe njedźelu, 23. junija, we Wulkich Ždźarach. Městnosći stej tamniša cyrkej a Krabatowy nowy wu­dwór. „Tak mamy dobre wuměnjenja, zo so dźeń derje poradźi. Zapřijeć chcemy wjesnu radu, wosadnu cyrkwinsku radu, pěstowarnju, chóry a dalšich partnerow“, podšmórny farar Heinrich Koch, čłon ­serbskeho ewangelskeho dźěłoweho kruha. Jeho čłonojo schadźo­wachu so minjeny tydźeń we Wulkich Ždźarach prěni raz w nowym lěće.

Přiroda w mólbach a w keramice

Montag, 28. Januar 2019 geschrieben von:
Jako prěnja wuměłča z Delnjeje Łužicy wustaja Karin Gollos (naprawo) wot minjeneho pjatka we Łazowskim Domje Zejlerja a Smolerja. Tam je widźeć nimale 30 jeje akrylowych, akwarelowych a wolijowych mólbow. Rodźena Wojerowčanka a dźensa w Tornowje bydlaca 60lětna zwobraznja najradšo łužiske krajiny, při čimž mało barbow wužiwa. Dale wuhlada wopytowar jeje keramiske wudźěłki, předstajace hłownje­ rostliny a zwěrjata. Wustajeńca pod hesłom „Wuměłstwo zwjazuje“ je hač do kónca apryla we Łazu přistupna. Foto: Andreas Kirschke

Ptačokwasny dar Rozhlada

Freitag, 25. Januar 2019 geschrieben von:
Kulturny časopis Rozhlad ma wot dźensnišeho nowu internetnu stronu. Najbóle wjesela so zamołwity za internetne wustupowanje Ludoweho nakładnistwa Domo­wina Domenico Gruhn, šefredaktorka Sara Mičkec a redaktor Julian Nyča­ (wotprawa). Pod www.rozhlad.de změja abonenća přistup k wšěm přinoškam měsačnika, kotrež hodźa so komfortabelnje na wšelakich wobrazowkach čitać. Online-abonenća změja tohorunja přistup k archiwej, móža stronu přepytać a sej přinoški jednotliwych awtorow a awtorkow pokazać dać. Njeabonenća móža so na stronje wo wobsahu Rozhlada informować a časopis skazać. Što móžeće w februarskim čisle Rozhlada čitać, zhoniće na 3. stronje dźensnišeho wudaća SN. Foto: SN/Hanka Šěnec

„Poskitk sym rady přiwzał“

Donnerstag, 24. Januar 2019 geschrieben von:

Wot spočatka lěta dźěłataj dwaj redaktoraj za serbski kulturny časopis Rozhlad. Sarje Mičkec poboku je slawist a kulturnowědnik Julian Nyča. Wón wobsadźi poł městna, kotrež je nastało, dokelž chce so šefredaktorka we Waršawje akademisce kwalifikować a disertaciju spisać. „Poskitk sym rady přiwzał a wjeselu so, nětko takrjec při žórle za móžne dalše slědźenje sedźeć móc. Sym so we wobłuku studija w Berlinje wosebje z temami z mjeńšinowym kontekstom zaběrał. W domjacych dźěłach sym poprawom stajnje serbske aspekty wobjednawał. Nastupajo Rozhlad chcu wobstejacy koncept wudospołnić a kul­tur­no­politiske kaž tež stawizniske ćežišća přidatnje zapřijeć. Wšako sym so z tajkimi wjele lět rozestajał“, rodźeny Budyšan swój puć do redakcije runje tak rozjimuje kaž motiwaciju za njón.

Marko Bruk wustaja w bibliotece

Donnerstag, 24. Januar 2019 geschrieben von:
Wot jutřišeho pjatka hač do 26. apryla prezentuje Budyska měšćanska knihownja nowu wustajeńcu. W Budyšinje rodźeny moler a grafikar Marko Bruk wustaja na Hrodowskej hasy pod hesłom „Mikstura – bliske, daloke a wumyslene“ prěni raz swoje twórby, kotrež su tele dny powěsnyli. Wopytowarjo wuhladaja měšćanske a łužiske krajiny runje tak kaž eksponaty na temy ze serbskich bajow. Biblioteka je póndźelu a pjatk wot 10 do 18 hodź. kaž tež­ wutoru a srjedu wot 12 do 18 hodź. wočinjena­. Štwórtk je zarjadnišćo blisko Hrodu zawrjene. Foto: SN/Hanka Šěnec

Dokumentariske wuměłstwo skupiny fotografow

Mittwoch, 23. Januar 2019 geschrieben von:

Drježdźany (SN/bn). Wosebita wustajeńca „WĆIPNOTA jedyn do štyri“ z fotografijemi Franka Höhlera, Thomasa Kläbera, Georga Krausy a Jürgena Maćija je wot dźensnišeho w Drježdźanskej Wili Eschebach přistupna. Na wčerawšej wernisaži wuzběhny lawdator dr. Michael Bittner, zo „přibližeja so tući wuměłcy, kotrymž je wažne wćipni być a wćipni wostać, swojim motiwam bjez předzajatosće. Tak hesłu wustajeńcy cyle wotpowěduja.“

W mjenje přehladku wuhotowaceje Ludoweje banki Drježdźany-Budyšin dźakowaše so nowinski rěčnik Thomas Lohse fotografam a přepoda jim wobrazowy zwjazk. Kniha wopřijima zapis wšitkich wuměłcow kaž tež wubrane přikłady jich tworiwosće z prěnich 50 ekspozicijow we Wili Eschbach. Aktualna wustajeńca je dohromady 94., k stotej ma přichodny zwjazk wuńć. W nim budu potom tež nětčiši fotografojo zastupjeni. Wotewrjenje hudźbnje wobrubiłoj staj Stefan Wehrenpfennig na gitarje a Thomas Friedländer na diwersnych instrumentach.

Žiwe rjemjesło z dawnych časow

Dienstag, 22. Januar 2019 geschrieben von:

Kak zajimawa móže stawizniska wustajeńca być a kak móžeš ju ze žiwjenjom pjelnić, to nazhonichu zajimcy předwčerawšim, njedźelu, w Budyskim Serbskim muzeju.

Hudźba, reje a jejka w stolicy

Dienstag, 22. Januar 2019 geschrieben von:

Berlin (KH/SN). Dujerska kapała Horjany je minjenu sobotu na Zelenym tydźenju w Berlinje na jewišću Sakskeje hale publikum z wobšěrnym programom zawjeseliła. Hudźbnicy piskachu čěske štučki, naročne morawske pólki, wězo tež serbske pěsnički a dalše rytmy. W dwurěčnej moderaciji je Uwe Macka łužisku domiznu muzikantow předstajił. Kapała bě swojim přiwisnikam z Łužicy móžnosć poskićiła, ju w busu do Berlina přewodźeć a ju tam spěwajo podpěrać.

Hižo minjeny pjatk wustupichu w Berlinje čłonojo Smjerdźečanskeje rejwanskeje skupiny, kotřiž wopytowarjow ze swojimi temperamentnymi rejemi zahorichu. Tež tradiciju debjenja jejkow su w hali ­Sakskeje w Berlinje předstajili. ­Zajimcy smědźachu so tež sami w pisanjenju pospytać.

Lessingowe myto 2019 Marcelej Beyerej

Montag, 21. Januar 2019 geschrieben von:

Kamjenc (SN/JaW). Sakska statna ministerska za wědomosć a wuměłstwo dr. Eva-Maria Stange (SPD) je sobotu w Kamjenskej radnicy spisowaćela Marcela Beyera, awtorce Anju Kampmann a Bettinu Wilpert z lětušim Lessingowym mytom Sakskeje a spěchowanskimaj mytomaj k Lessingowemu mytu počesćiła.

Kaž ministerka wuwjedźe, je hakle minje­nu wutoru kabinet dotaciju hłowneho myta na 20 000 eurow a spěchowanskeju mytow na stajnje 7 500 eurow zwyšił. „Njeje to jenož dobra powěsć za dźen­sa a přichodnje wuznamjenjenych, ale tež kompliment mytu samomu“, dr. Stange wuzběhny.

Budyšin (CRM/SN). Nutrna naležnosć z Barta pochadźacej a nětko w Berlinje bydlacej a skutkowacej koncertnej pianistce Heidemari Wiesnerec je, spěchować a šěrić hudźbu Serbow. W 1990tych lětach załoži wuměłča w Italskej koncertny rjad „Wosebity koncert na spočatku lěta.“ Tón njeje na přiwabliwosći zhubił.

Lětsa steji rjad, kotryž předstaja wuměłča w Berlinje, Wojerecach, Lubinje, Lipsku kaž tež w Budyšinje, pod hesłom „Slědy“. Znowa přeprosy sej Wiesnerec ze spěchowanjom Załožby za serbski lud dalšich interpretow, kotřiž so tak ze serbskej hudźbnej kulturu zeznajomjeja. To zwyša tež atraktiwnosć zarjadowanjow, přetož tak je lěto wob lěto wćipnosć na hinaši program z nowymi wosobami, a to z mišterkami a mištrami swojeho předmjeta, zaručena.

Anzeige