Před 50 lětami załožichu w Slepom Serbski folklorny ansambl. Na iniciatiwu sekretara Zwjazkoweho předsydstwa Domowiny Jana Handrika a župy Běła Woda zjednoćichu so serbske kulturne ćělesa do jednoho cyłka a pěstowachu zhromadnje swojoraznu kulturu a folkloru Slepjanskeje kónčiny. Slepjanska žónska spěwna skupina a serbska rejwanska skupina Brězowka pod nawodom Siegfrieda Holca tworještej jadro folklorneho ansambla. Siegfried Holc je pozdźišo lětdźesatki jako dudak w ćělesu Slepjanskich ludowych hercow sobu hrał.
Swój prěni sinfoniski koncert tuteje sezony wuhotowa Serbski ludowy ansambl štwórtk, 25. róžownika, w Němsko-serbskim ludowym dźiwadle w Budyšinje. Mjeztym je Georgios Balatsinos, w grjekskej stolicy Athen narodźeny a předewšěm w Němskej wukubłany a skutkowacy dirigent, kiž wukonja wot spočatka sezony 2022/2023 zastojnstwo šefdirigenta w serbskej kulturnej instituciji, tu wězo cyły rjad dirigatow přewzał, ale prěni raz steješe rjadny sinfoniski koncert na programje. Nowy šef orchestra je wšak renoměrowany fachowc swojeho předmjeta, tola běše napjatosć dosć wulka, što poskići so na tutym wječoru w Budyskim dźiwadle. A hlej, překwapjenka běše so poradźiła. Nimo wuznamneje kompozicije sławneho němsko-židowskeho sinfonikarja Gustav Mahlera (1866–1911) a sinfoniskeje twórby něhdyšeho sobuzałožerja SLA a jeho prěnjeho chóroweho nawody Helmuta Fryče (1907–1944) poskići so kompozicija delnjołužiskeho komponista dr. Kurta Karnauke (1866–1944), kotraž wuwoła jako překwapjaca wurywanka wosebitu skedźbnosć.
Filmowy festiwal Nysa (NFF) wopřijima lěto wob lěto dźeń a wjetši podźěl temow, kotrež so ze žiwjenjom, myslenjom a začućom Serbow zaběraja. Při tym njehraja jeničce žiwjenske wašnje, tradicije a kultura rólu, ale tež rěč. A ta jewješe so we wšitkich třoch paskach, kotrež prezentowachu w sekciji „Regionalia“, na cyle swojorazne wašnje. Do rjadu słušeja produkcije, kotrež su w třikrajowym róžku nastali. Někotre su filmowcy, pochadźacy z regiona, nawjerćeli. Kónc zašłeho lěta bu nimale 30 namjetow zapodatych, a tuž bě jury rozsud ćežki, „kotre z produkcijow we wobłuku NFF předstajimy“, rjekny Patrick Weissig, čłon komisije za wuběr filmow. Mjez poskitkami běchu přewažnje krótke abo srjedźnje dołhe filmy. Naposledk pokazachu w rjedźe „Regionalia“ dźesać paskow, mjez druhim w Běłej Wodźe předstajeny „Mühlrose – ein Sonntag auf dem Mond“ z protagonistku Edit Pjenkowej kaž tež na festiwalu wuznamjenjenu čěsko-pólsku produkciju Piotra Jasińskeho „Wšitko w porjadku, běrny w rynkach“.
28. róžownika před 130 lětami narodźi so delnjoserbska basnjerka a nowinarka Mina Witkojc w Bórkowach jako dźowka słužownicy. Jeje njemandźelski nan bě Fryco Pohlenc, korčmar w jeho po swójbje pomjenowanym błótowskim hosćencu. Mina wotrosće pola wowki, přetož mać bě zahe zemrěła.