Budyšin (CRM/SN). Před 16 lětami zrodźi so kolegialne přećelstwo mjez serbskimi a Mecklenburgsko-Předpomorskimi hudźbnikami. „Bjez Jura Mětška by myslička mjezsobneje wuměny jeničce rjany són wostała“, praji Malte Hübner, wiolinist a komponist w Roztoku (Rostock). Wón słuša k hłownym iniciatoram tuteje jara wuspěšneje stawizny a powita w Budyšinje přitomnych z wutrobitymi słowami w našej maćeršćinje.
Budyšin (SN). W nadawku Spěchowanskeho kruha za serbsku ludowu kulturu je jury, wobstejaca ze Sonje Hrjehorjoweje a Heleny Palmanoweje minjeny tydźeń srjedu wo dobyćerjach lětušeho wubědźowanja wo najrjeńše serbske jutrowne jejko za dźěći a młodostnych rozsudźiła. Wo wuslědkach informowaše pjatk projektna managerka Domowiny Rejzka Krügerowa. Tak je so 66 jednotliwcow wobdźěliło. Nimo mytowanjow we wosom starobnych skupinach mjez štyrjomi a 24 lětami su znowa młodźinske spěchowanske myto spožčili, kiž je z 75 eurami dotěrowane. Dobyła je tele myto 21lětna Wiebke Zimmermannec z Markoćic/Gersdorfa, kotraž so z technikomaj wóskowanja a bosěrowanja wobdźěli. Tež 254 šulerjow ze zakładnych šulow w Kulowje a w Großschirma su składnosć wužili a debjene jejka za wubědźowanje zapodali.
28. jutrownika před 90 lětami docpěchu dalše represalije nacijow tež Serbow a jich narodne žiwjenje. Přisłušnicy SA a policisća zajachu na tutym dnju rjad serbskich prócowarjow do „škitneje jatby“. Potrjecheni běchu prěni předsyda a hłowny załožićel Domowiny Arnošt Bart-Brězynčanski, kotryž dyrbješe měsac w chłostarni přebywać, redaktor Serbskich Nowin a moler Měrćin Nowak-Njechorński a sobudźěłaćer Smolerjec nakładnistwa Gustaw Janak. Tež jurist dr. Jan Cyž a mišter w Smolerjec ćišćerni a starosta Łužiskeho Sokoła Jakub Šajba a wučer w Pančicach, dirigent a nawoda hudźbneho wotdźěla Maćicy Serbskeje Jurij Słodeńk běchu potrjecheni. Pola Łazowskeho překupca a župana Wojerowskeje župy „Handrij Zejler“ Jana Haješa přepytowachu SA-mužojo bydlenje a sćazachu čěske listy a časopisy.
Budyšin (SN/bn). „Europska klasiska hudźba je z bytostnym stołpom europskeje kulturneje identity a ma móc, mjezy přesahowaca ludźi hromadu wjesć. Ćim wjetša je mi česć, z festiwalom ‚Třiangel‘ nowy projekt w Budyšinje zahajić směć.“ Z tymle słowami připowědźi wuměłstwowy direktor projekta Classic@Home a hłowny organizator mjenowaneho festiwala Fjodor Elesin we wobłuku nowinarskeje konferency wčera w Budyskej Röhrscheidtowej bašće „mišterske kursy za wysoko wobdarjenych studentow hudźby pod nawodom cyłkownje sydom mjezynarodnje renoměrowanych koryfejow“ kaž tež cyłkownje „štyri koncerty z wobdźělnikami a docentami“.
20. apryla wobsadźichu sowjetske a pólske wójska wulke dźěle Hornjeje Łužicy. Pólske jednotki ćehnjechu w chwatku dale do směra Drježdźan, dokelž chcyše rozkazowar 2. pólskeje armeje, general Karol Świerczewski, ze swojimi jednotkami město jako prěni wobsadźić.
Dźeń pozdźišo poradźi so jednotkam generala SS Schörnera klin zapadnje Budyšina do tuteje kolony bić, tak zo buchu před Drježdźanskim hajom stejace pólske wójska wot swojich zadnich dodawanskich wotdźělow wotražene a njedóstachu zežiwadła a municiju.
Janšojce (SN). Módroćišć je do lisćiny swětoweho kulturneho herbstwa zapisany a za zhotowjenje serbskeje narodneje drasty njeparujomna technika. We wobłuku dwuhodźinskeje dźěłarnički móža so zajimcy jutře, pjatk, w Serbsko-němskim domizniskim muzeju z njej zeznajomić. Darmotny workshop je zhromadny projekt muzeja, tamnišeje Domowinskeje skupiny, Łužiskeho instituta kaž tež Mobilnych fabrikaciskich laborow syće wotewrjenych dźěłarnjow Braniborskeje a započnje so w 10 hodź.
Dalšej wjerškaj hudźbnych dnjow
24. jutrownika 1948, runje před 75 lětami zhromadźi so nahladna ličba ludźi, wosebje Radworčanow a zastupnikow zjawnosće Budyskeho wokrjesa, na Radworskim kěrchowje při Křižnej cyrkwi. Na muri pohrjebnišća bě zakryta wopomjatna tafla, wěnowana antifašistiskej wojowarce dr. Mari Grólmusec, kotraž bě 6. awgusta 1944 w žónskim koncentraciskim lěhwje Ravensbrück zahinyła. 24. jutrownika 1896 bě so wona w Lipsku jako dźowka serbskeho wučerja a šulskeho direktora Jana Grólmusa, rodźeneho Radworčana, narodźiła. Na jeje 52. posmjertnych narodninach wotkry tehdyši Radworski wjesnjanosta Alfons Wićaz wopomjatnu taflu. Na tafli zadypanej běštej křiž a tekst: „Dr. Marija Grólmusec / 24.4.1896 w Lipsku / 16.8.1944 w KZ Ravensbrück / wojowarka za demokraciju / a měr mjez ludami / jej česć a dźak!“