Lědma je lětuša hornjoserbska inscenacija Němsko-Serbskeho ludoweho dźiwadła „Hrěšna wjes abo Zabyty čert“ wothrata, steji z delnjoserbskej hru „Piwo“­ hižo přichodna produkcija takrjec před durjemi. Jutře, pjatk ma so premjera w Hochozy wotměć.

Budyšin (SN/bn). Dohromady su na šěsć předstajenjach komedije Jana Drdy na hłownym jewišću NSLDź w Budyšinje něhdźe 1 050 wopytowarjow zličili. To je porno lońšej inscenaciji „Šěrcec Hanka“ nimale 600 přihladowarjow mjenje. Přiwšěm ze stron dźiwadła rěka, zo maja hru, kotruž bě hóstna režiserka Rosemarie Vogtenhuber z cyłym serbskim hrajerskim ansamblom NSLDź a hóstnej hrajerku Helenu Bětnarjec zwoprawdźiła, za „wuspěšnu, wosebje hladajo na wulku syłu paralelnje so wotměwacych serbskich zarjadowanjow“. Nazymu chcedźa kruch znowa na hłownym jewišću předstajić, potom w němskej rěči z trochu změnjenej wobsadku.

Drježdźany (SN/bn). We wobłuku 35. filmoweho festiwala Drježdźany wuhotu­jetej towarstwo Filmowy zwjazk Sakska a Serbsko-němska syć Łužycafilm srjedu, 19. apryla, „Filmowe stajne blido“ na Klemperowej žurli Sakskeje krajneje ­a uniwersitneje biblioteki SLUB. Kooperaciski partner zarjadowanja je Załožba za serbski lud. Z Choćebuskeho filmoweho festiwala znatemu formatej přehladki paskow „Kurze Lausitzer – Krotke Łužyske – Krótke Łužiske“, moderěrowanym wot rozhłosownika Hellmutha Henneberga, přizamknje so „wólna rozmołwu z napojemi a serbskej hudźbu“, kaž w nowinarskej zdźělence organizatorow rěka. Program wopřijima krótkofilmy„Gólska roza“ režiserki Frauke Rahr, „Hinterberg“ Erika Šyški, „Křižerki“ Sofije Cyžec, ­„Fragmenty“ Romana Pernaka kaž tež hudźbne widejo Erika Šyški a Gregora Kliema „Śi wiźim“. Po tym chcedźa na samsnym městnje pod hesłom „Der ­bewahrte Blick – Film- und Tonschätze aus Sachsen“ wosebitu wustajeńcu z „jasnym serbskim podźělom“ wo projekće „SAVE – Zawěsćenje awdiowizuelneho herbstwa w Sakskej“ wotewrić.

Hižo w dojutrownym času wopokaza so Serbski muzej w Budyšinje ze swojej ­wosebitej wustajeńcu „Jutry w Serbach“ a z wospjetnymi poskitkami dźěłarničkow k nawuknjenju wšelakich technikow debjenja jutrownych jejkow jako woprawdźity magnet. Na nich wobdźěli so pod nawodom nazhonitych ludowych wuměłcow něhdźe 230 zajimowanych z blišeje wokoliny, ale tež z druhich kónčin, předewšěm ze Sakskeje.

Poskitk wobšěrneho pedagogiskeho programa a projektow wužiwachu zwjetša šulske rjadownje Budyskeho wokrjesa kaž tež dźěćace skupiny ze Zhorjelca, ­Kamjenicy a Drježdźan. Wot ćicheho pjatka do jutrowneje póndźele předstajichu ludowi wuměłcy z Hornjeje, srjedźneje a Delnjeje Łužicy, kaž je tole w Serbskim muzeju hižo wjacore lětdźesatki z dobrej tradiciju, debjenje jutrownych jejkow w tradicionelnych technikach. Hosćo muzeja, domoródni kaž tež ludźo z najwšelakorišich krajow swěta poskitk přewšo derje přiwzachu a sebi rjany ­suweněr z Łužicy sobu wzachu.

Drježdźany (SN). Jako „prěnje němske jewišćo scyła“ předstaji Statna opereta Drježdźany 22. apryla z „Pólskim kwasom“ takrjec zabytu twórbu Josepha Beera. Libreto spisałoj běštaj Fritz Löhner-Beda a Alfred Grünwald. Prapremjerje w lěće 1937 dotal dalše předstajenja njeslědowachu – nacionalsocialisća běchu kruch židowskeho komponista zakazali, na čož so tež po kóncu diktatury wjace do hrajnych planow njewróći.

Fotografije w comicowym kontrasće

Budyšin (SN). Wustajeńcu dosć njewšědneho razu pokazaja hišće hač do 2. meje w Budyskim Kamjentnym domje. Pod hesłom „Tellerrand I“ tworja symetrisce skomponowane fotografije Elsy Hennig jasny kontrast k wot Nazanin Zandi kuratěrowanej přehladce rysowankow, wotbłyšćowace realne dožiwjenja cyłkownje 65 w Drježdźanach bydlacych žonow najwšelakorišeho pochada. Mólby běchu dohromady 26 ilustratorkow na zakładźe dźěłarničkowych rozmołwow zdźěłali.

Wosebita wustajeńca z twórbami 63 wuměłcow