Přeco zaso raz je rěč wo tak­ mjenowanych „žónskich kwotach“. Mjenowane rjadowanje ma zaručić, zo w gre­mijach, zarjadnišćach, stronach a podobnych kruhach tež wěsty podźěl žonow wobkedźbuja. Mjeztym zo so na zjawnych zarjadach a w orga­niza­cijach přewažnje po njej maja, wo „žónskej kwoće“ w priwatnym hospodarstwje přeco hišće kontrowersnje diskutuja, a to ma swoje přičiny.

Rozumne na kóždy pad je, zo na polu sporta lědma štó chutnje na to mysli sej žadać, zo ma so při zestawje mustwow tež na dosć žonow dźiwać. To wězo tež njeńdźe, wšako přewjeduja so we wjetšinje sportowych družin separatne wu­bědźowanja za žony a muži. W běhu minje­nych lět pak je wjele disciplinow k tomu přišło, za kotrež běchu něhdy jenož­ mužojo woprawnjeni so wubědźować, kiž pak su mjeztym hižo něšto lět tež za žony samozrozumliwe. W někotrych padach drje njeby sej to čłowjek před něšto lětdźesatkami scyła před­stajić móhł. Myslu tu jenož na kopańcu, na pjasćowanje abo na sněhakowarske skakanje.

Wirtuelnje sportować

Serbski Sokoł, třěšny zwjazk serbskich sportowčow a sportowcow, zběra dale­ wuslědki prěnjeho tak mjenowa­neho wirtuelneho sportoweho wubědźowanja. Wšitke starobne skupiny smědźa doma kolesować, walkować, kročele ličić, běhać abo z koparskim bulom žonglě­rować a wuslědki serbskim Sokołkam a Sokołam přez digitalny formular zdźělić. Tón dóstanjeće mjez druhim tež přez naprašowanje na mejlowu adresu . Wobdźělenje ničo njepłaći, „startowy pjenjez“ pak smě so na spě­chowanske towarstwo Serbskeje wyšeje šule „Michał Hórnik“ Worklecy za so­cialny projekt přepokazać. Sportowa akcija traje hišće hač do 14. meje.

Šulski sport so dale wotměwa

Šulerki a šulerjo Wyšeje šule Slepo móža­ wot wčerawšeho swoje domjace sportowe wuslědki wučerjam digitalnje zdźělić. Zo by wšitko sprawnje wotbě­žało, dyrbi dorosćena wosoba sportowy wukon wobkrućić. Tak smědźa na přikład šulerjo 8. lětnika pak 8 kilometrow kolesować, skatować abo joggować abo 8 000 kročelow pospochi pućować.

Hłownu a wólbnu wotprajili

Koronakriza je a wostanje wšitkim kopar­kam a koparjam w Sakskej chětro twjerdy worjech. Hižo wjacore tydźenje žedźa so hrajerjo, trenarjo a towarstwa za kuskom normality. Połoženje so ­jenož pomału měnja, a prašenje „Kak dale póńdźe?“ wuwabja dźeń a wjetše diskusije. Prezident Sakskeho koparskeho zwjazka (SFV) Hermann Winkler tuž na zamołwitych apeluje a prosy jich wo krutu zwjazanosć.

Hermann Winkler tuž pisa: „Smy wšitcy w historiskej situaciji, kotruž tak w stawiznach kopańcy hišće ženje měli njejsmy a kotraž nas chětro wobćežuje. Najrjeńša pódlanska wěc swěta je lemjena. Najbóle so kriza na naše dźěći wuskutkuje. Wone su hižo wjacore tydźenje w izolaciji. Nimo šule pobrachuje jim druha domizna, sportowe towarstwo. Na wjac hač 60 000 holcow a hólcow w sportowych zjednoćenstwach, dyrbimy nětko tež myslić, hdyž póńdźe wo wolóženja! Naš wulki zaměr měł być, runje dźěći a młodostnych nastupajo, zo so spěšnje na kopanišća wróća.

Denny Kral, rodźeny Njebjelčan, ma hižo­ wjace hač 150 hrow w regionalnej koparskej lize na swojim konće. Tuchwilu pak dyrbi tež wón sam doma trenować. Z hrajerjom Serbskeje koparskeje wubranki je so tele dny Tadej Cyž-Nje­bjelčanski rozmołwjał.

Witaj, Dennyjo! Wot sezony 2019/2020 hraješ nětko za Chemiju Lipsk. Kak je k tomu dóšło?

D. Kral: Bydlu z přećelku mjeztym dwě a poł lěta w Lipsku, a chcu tu tež rady wostać. Tohodla pytach w lětnjej přestawce za mustwom we wokolinje Lipska abo w Lipsku samym. Po jara přijomnych a zajimawych zetkanjach a rozmołwach njebě mi rozsud přećežki.

Z třomi hrajerjemi sym do toho hižo hromadźe za bulom honił. Toho abo tamneho z mustwa tež hižo dlěje znaju.

Što bě na kóncu rozsudne?

D. Kral: Chemija Lipsk je zjednoćenstwo z wulkej tradiciju. Fanojo, koparjo, haj cyłe towarstwo su kaž wulka swójba. Hrajna atmosfera je za tutu klasu jónkrótna. Tež Njebjelčan Frank Ričel je tu hižo hrał. Nimo toho chcych dale w swojim powołanju dźěłać, štož hodźi so tu derje kombinować.

Sy so Franka Ričela wo towarstwje prašeć móhł?