Intensiwnje nanowu sezonu sopřihotowali

Montag, 11. Juli 2016 geschrieben von:

20. junija bě so za regionalneho koparskeho ligista Budissu Budyšin přihotowanski čas za hrajnu dobu 2016/2017 zahajił. Nowi a dotalni hrajerjo su mjeztym tójšto razow trenowali a dotal pjeć testowych hrow přewjedli. Prěnju tajku mějachu Budyšenjo pola ST Ćiska, kotrež trenuje Stefan Hoßmang, něhdyši kotrenar prěnjeho mustwa Budissy. Wokrjesny wyši ligist bě wězo jasny outsider, Ćišćenjo pak so prima wobarachu.

Druha přihotowanska hra wjedźeše koparjow ze sprjewineho města k Slovanej Liberec w Čěskej. Tam pak steješe hižo k połčasej 4:0 za hosćićela. Po přestawce zwyši Slovan hišće na 5:0.

Třeći test wotmě Budissa pola Halleskeho FC, kotryž hraje w třećej lize Němskeje. A to bě wulki narok za Budyšanow. Jim pak runje tajke partije leža. Tak móžachu derje sobu dźeržeć, tež hdyž hosćićeljo hru postajachu a 2:0 dobychu.

Dalšej­ testowej hrě mějachu chowancy trenarja Linkerta doma přećiwo FC Ru­dnym horinam Aue, zastupjerjej druheje zwjazkoweje ligi, a w Nowosólcu-Hródku, hdźež porazychu cyłk z krajneje klasy ze 4:0. Clemens Werner

Wuslědki testowych hrow Budissy Budyšin:

„My smy my“ rěka regata, kotruž je 1. wodosportowe zjednoćenstwo Łužiska jězorina prěni raz w paralympiskej čołmikowej klasy SONAR kónc tydźenja na Lejnjanskim jězoru (Geierswalder See) přewjedła. Tam wubědźowachu so najlěpši płachtakowarjo z cyłeje Němskeje. Jedyn z čołmow wobdźěli so samo na lětušich olympiskich hrach w brazilskim Rio de Janieru. Wón wuži regatu we Łužicy za trening. Foto: Werner Müller

Hra na wrota bohata była

Montag, 11. Juli 2016 geschrieben von:

Serbska koparska wubranka muži

– U 23 FC Hornja Łužica Neugersdorf 5:5 (3:1)

Za SKWm zasadźeni: Chrystof Gloxyn – Bosćij Cyž, Fabian Korjeńk, Pětr Domaška, Simon Žur, Feliks Hrjehor, Dawid Jurš, Denny Gloxyn, Antonius Wałda, Dirk Šołta, Bosćij Kinderman, Fabian Bejma, Robert Lejnart, Křesćan Bejmak, Tom Henčl, Tomaš Bejma

Powerserb w Radworju

Montag, 11. Juli 2016 geschrieben von:

Lětuši Powerserb budźe 20. awgusta w Radworju. Tamniša młodźina wuhotuje sportowe zarjadowanje zhromadnje ze Serbskim młodźinskim towarstwom Pawk, dokelž bě lońše wubědźowanje w Pěskecach dobyła.

Mustwo ma wobstać ze znajmjeńša pjeć wosobow, maksimalnje sydom (šesta a sedma holcy). Startowy pjenjez je dźesać eurow na mustwo. Přizjewjenja su móžne na Facebooku. Jurij Bjeńš

Wo koparskim turněrje w Rachlowje

Montag, 11. Juli 2016 geschrieben von:

Na koparskim turněrje we wobłuku Rachlowskeho wjesneho swjedźenja je so sydom mustwow wobdźěliło. Wone běchu z Kulowa, Němcow, Mučowa, Koćiny, Salowa, Jitka a wězo z Rachlowa. W skupinje A dobychu domjacy koparjo před Němcami, Koćinu a Jitkom. W skupinje B běše zaměstnjenje po předkole: Mučow, Kulow a Salow. Prěnje połfinale mjez Rachlowom a Kulowom skónči so 0:0. Tak dyrbjachu jědnatki duel rozsudźić. Dokelž třo třělcy njedosahachu, dyrbjachu na kóždym boku pjećo třěleć. Rachlowski wrotar Martin Kubaink štyri z pjeć pokutnych kopow wotwobara a duel za hosćićela rozsudźi. Tež druhemu semifinalej mjez Němcami a Mučowom přizamkny so po 1:1 třělenje jědnatkow. Tu přesadźichu so Němčenjo z 3:2. Wulke finale mjez domjacymi a Němcami skónči so 0:2. Najlěpši třělc wrotow bě Nico Helm (Němcy). Werner Müller

Kónčna tabulka:

1. Němcy

2. Rachlow

3. Kulow

4. Mučow

5. Koćina

6. Jitk

7. Salow

27. Kulowcup přewjedli

Montag, 11. Juli 2016 geschrieben von:

Mjeztym hižo 27. tak mjenowany Kulowcup su wólnočasne koparske mustwa kónc tydźenja na sportnišću při Kulowskim měšćanskim haće přewjedli. Dźesać teamow młodźinskich klubow z Kulowa a wokolnych wsow wojowaše tam wo dobyćerski pokal. Přihotowali běchu turněr lońši dobyćerjo Kulowminatije. Woni pak pokal zakitować njemóžachu a wotedachu jón cyłkej Company of Kulow. Lětsa steješe wona w finalu z mustwom Dźěłarnistwo. Dokelž rěkaše na kóncu 0:0, dyrbješe třělenje jědnatkow duel rozsudźić. Kulowska company je z 3:2 doby a ma klětu 28. Kulowcup wuhotować.

Werner Müller

Kónčna tabulka:

1. Company of Kulow

2. Dźěłarnistwo

3. Dołha garda

4. Söffnerojo

5. team Toplife

6. Kulowminatije

7. Gut Kickers

8. Wjesni hłupacy

9. Zelena garda

10. Knusperhłójčki

Party wupadnyła

Montag, 11. Juli 2016 geschrieben von:
Poprawom bě w Francoskej wčera hižo wšitko za dobyćersku party přihotowane. Samo přetwarjeny bus, z kotrymž chcychu dobyćerske francoske mustwo jako noweho koparskeho europskeho mištra po Pa­risu wozyć, bě hotowy. We wjetowanskich běrowach běchu ludźo tysacy eurow na „módre mustwo“ sadźili. Krótko do połnocy pak bě jasne, zo party wupadnje. Přejara běchu so na to spušćeli, zo je dobyće titula europskeho mištra jenož formalita. Tola budźmy sprawni. Tež němske medije běchu so tak zadźerželi, kaž by połfinalna hra Francozow přećiwo Němskej jenož „mjezystacija“ po puću k finalu w Parisu była. Wčera zakónčene europske mišterstwa pak nas wuča, zo dyrbiš w kopańcy stajnje zaso z překwapjenkami ličić. Myslu při tym na sympatiskich Islandźanow, na bojow­niskich Walizičanow a na překlepanych Portugalčanow – wčera wšak wjetšinu hry bjez Cristiana Ronalda. Marko Wjeńka

Paris. Po 25 mjeńšinach bě finale europskich koparskich mišterstwow wčera wječor w Stade de France za portugalskeho superstara Cristiana Ronalda zakónčene. We 8. min. bu wón wot Dmitrija Payeta hrubje foulowany. „CR7“ so zwjeze, sudnik Clattenburg pak na foul njerozsudźi. W 17. min. měješe Ronaldo sylzy we wočomaj a da so wot medicinskeho personala zastarać. Wón hišće raz zuby zakusny, bolosće w lěwym kolenu pak běchu přewulke. Za njeho přińdźe Ricardo Quaresma, a „CR7“ bě nětko kotrenar šeftrenarja Fernanda Manuela Costy Santosa. Najebać zra­njeneho kapitana pak sta so Portugalska z europskim koparskim mištrom 2016, dokelž třěli Éder w 109. min. swoje mustwo do zboža.

Portugalskemu narodnemu koparskemu zwjazkej je prěni wulki triumf na europskej runinje wjele pjenjez hódny. Kóždy­ narodny hrajer dóstanje za dobyće w Francoskej premiju 275 000 eurow.

Widźał, słyšał, napisał (11.07.16)

Montag, 11. Juli 2016 geschrieben von:

Awtor dźensa

Helena Bětnarjec

Sport (08.07.16)

Freitag, 08. Juli 2016 geschrieben von:

Zarjaduja 27. Kulowcup

Wot dźensnišeho zarjaduja a wuhotuja wólnočasni koparjo na sportnišću při Kulowskim měšćanskim haće swój mjeztym 27., tak mjenowany Kulowcup. Slědowace­ mustwa su přizjewjene: Knusperhłójčki, Dołha garda, DSF, Zelena garda, team Toplife, Dźěłarnistwo, Söffnerojo, Wjesni hłupacy, GutKickerz a Company of Kulow. Dźensa wot 21 hodź. tam skupiny wulosuja, jutře w 12 hodź. so turněr zahaji. Wokoło 17 hodź. chcedźa dobyćerjow mytować.

Budissa dwójce testuje

Regionalny koparski ligist Budissa Budyšin testuje dźensa doma přećiwo zastupnistwu FC Rudne horiny Aue. Bu­dyšenjo nastupja wot 18 hodź. w Humboldtowym haju přećiwo postupnikej druheje zwjazkoweje ligi. Zajutřišim, 10. julija, zetkaja so potom w 17 hodź. z mustwom Nowosólc-Hródk, zastupjerjom krajneje koparskeje klasy.

Dalše testowe hry:

13.07. 18:00 Budissa – FSV Zwickau

16.07. 18:00 Internatio. Lipsk – Budissa

Wubranka muži hraje

Fanojo Serbskeje koparskeje wubranki muži móža so na dalšu hru wjeselić. Wubranka hraje njedźelu w 15 hodź. w Njebjelčicach přećiwo zastupnistwu U 23 FC Hornja Łužica Neugersdorf.

Anzeige