Sport (23.02.24)
Kónctydźenska kopańca
Prěnje koparske mustwo SJ Chrósćicy hraje jutře pola načolnika krajneje klasy wuchod w Niskej a Ralbičanscy Sokoljo w Biskopicach pola načolnika wokrjesneje wyšeje ligi.
24.02. 13:00 FC Energija Choćebuz –
Berlinski AK
24.02. 13:00 FV Přezjednota Niska –
SJ Chrósćicy
24.02. 13:30 FC Grimma –
Biskopičanske KT
24.02. 14:00 Biskopičanske KT II –
Sokoł Ralbicy/Hórki
25.02. 13:30 Budissa Budyšin –
1. FC Magdeburg II
25.02. 14:00 ST Radwor –
Módro-běli Kulow
25.02. 14:00 HZ Frankenthal –
SJ Chrósćicy II
25.02. 14:00 ST Marijina hwězda –
Motor Kumwałd
Halowe wokrjesne mišterstwa
Njedźelu wot 14 hodź. wotměje so halowe koparske wokrjesne mišterstwo starobneje klasy Ü35 w sportowni BSZ „Konrad Zuse“ we Wojerecach. Lońši dobyćer z Hermansdorfa tež lětsa zaso nastupi. Dale startuja cyłki Wojerowskeho FC, ESV Lok Wojerecy, HZ Hórnikečanski jězor/Ćisk, ST Lubuš, DJK Módro-běli Kulow, Torpedo Łaz a Rakečanskeho ST. Hraje so w dwěmaj skupinomaj, stajnje 10 mjeńšinow. Po hrach w předkole přizamknjetej so połfinali a potom wotmějetej so zaměstnjenske hry. Zastup je darmotny, jědźe a napojow budźe dosć.
Narodne mustwo w Běłej Wodźe
Domjaca hra pod hołym njebjom
Łužiske lodohokejowe liški –
Lodowe mjedwjedźe Regensburg 2:3 (0:0; 2:2; 0:0, 0:1)
Njedźelska hra přećiwo Lodowym mjedwjedźam Regensburg budźe na kóždy pad njezapomnite dožiwjenje za hrajerjow, oficialnych a fanow wostać. Łužiske liški běchu třeći raz w běhu 10 lět dźěl DEL2-outdoor-games w arenje za sněhakowarske skakanje w Klingenthalu.
Wažny transfer za Łužiske liški
Łužiske lodohokejowe liški su US-Američana Brandona Schultza zawjazali.
Něšto hodźin do skónčenja transferneje doby w druhej najwyšej lodohokejowej lize Němskeje DEL2 su so Běłowodźenjo hišće raz personalnje zesylnili, a to za čas po hłownym kole aktualneje sezony. Napjateje tabulkoweje konstelacije dla, dyrbi Běłowodźanski cyłk na wšitko přihotowany być. Tuž rozsudźichu so zamołwići krótkodobnje hišće za transfer US-Američanana Brandona Schultza. 27lětny hrajer na poziciji ,,centera“ hraješe zašłe tři lěta bjezwuwzaćnje we Wuchodoameriskej lodohokejowej lize (ECHL). W tutym času docpě 24 wrotow a 32 asistow. Naposledk měješe Brandon Schultz zrěčenje pola Cincinnati Cyclones. Jeho wukubłanske stacije w Americe běchu w najwažnišej dorostowej lodohokejowej lize (USHL). Za Američana je Běła Woda prěnja stacija w Europje.
Su-li wšitke formality zrjadowane, Brandon Schultz po wšěm zdaću hižo wutoru w trikoće Łužiskich liškow nastupi. Nadběhowar dóstanje čisło 21. Kilian Hrjehor
Nowe konjace sportowe towarstwo
Wot januara je konjace sportowe towarstwo Brětnja/Michałki (PSVBM) nětko tež w registrje sportowych jednotkow zapisane. Za nowozałožene towarstwo, kotrehož třěšny zwjazk je wokrjesny sportowy zwjazk Budyšin a Krajny sportowy zwjazk Sakska, běše to posledni a rozsudźacy krok jednanja, zo by so zjawnje aktiwny stać móhł. W zhromadnym dźěle z młodźinskim zarjadom a Powołanskokubłanskim centrumom Budyšin (BBZ) chce towarstwo předewšěm dźěćom ze socialnje słabšich swójbow móžnosć dać konjacy ABC nawuknyć. Za předsydku towarstwa Romy Belka a dalšich čłonow stej dźěćace a młodźinske spěchowanje w jěchanskim sporće kaž tež wobswětoškit chětro wažnej. Při tym steji tak mjenowany hippolinistil w srjedźišću. Mjeno zestaja so z hippologije, potajkim wědomosće konja a bambinija, štož rěka italsce přełožene dźěći. Cyłolětny wuknjenski koncept wobsahuje teamowe dźěło w zhromadnym dialogu. Při tym so wobchadźenje ze zwěrjatami a jěchanje hrajersce a bjez ćišća nawuknje. Něhdźe štyrceći dźěći wužiwaše poskitk hižo do załoženja towarstwa.
Koparski kónc tydźenja w Radworju
Poradźeny start do druheho koła
TSV Wjernarjecy –
ST Marijina hwězda 1:4 (1:3)
Zestawa hosći: Matik – Zelnak (90. Schneider), K. Pakoßnick, R. Cyž, Čornak (46. Bulank), Peschmann, Ch. Cyž, A. Eldor, Langer, Wünsche (80. M. El Dor), J. Pakoßnick
Poprawom měješe so tuta partija hižo loni kónc nowembra přewjesć, sněha a minusowych stopjenjow dla dyrbješe so hra přestorčić a wotmě so tohodla tydźeń do poprawneho zazběha sezony na kumštnym trawniku w Załomju.
Tež druhi serbski wolejbulowy derby su wolejbulisća z Pančic-Kukowa ...
Sprawny remis po daromaj
Módro-běli Kulow –
Hlinowski SC 2:2 (0:1)
Zestawa hosćićelow: Čórlich – Žur, Langa, Bělk, Popjela, Kisch (65. Graf), Bulank, Wittek, Bergmann, Nicolaides, Woko (87. S. Kocor)
Zestawa hosći: Schöne – L. Schmidt (90. Roch), Lindemann, Käppler, Franke, Rosenbaum, Abuazab, P. Budar, Kubisch (80. Lehmann), Witte, E. Schmidt
Jenož 10 mjeńšinow w druhim połčasu dosahachu Kulowskim koparjam, zo bychu zastatk 0:1 k nawjedowanju 2:1 zwjertnyli. Krótko do kónca partije pak zamóchu hosćo wurunać. Strózbje wobhladujo je to sprawny remis w nic runjewon wobhladanja hódnej hrě.
Za domjace mustwo njebě to dobry prěni połčas. Po jara kurioznym 0:1 měješe hosćićel wulke problemy přećiwo hłuboko stejacym koparjam z Hlinowca. W druhim połčasu wustupowachu worjoły sebjewědomišo. A bychu-li po nawjedowanju 2:1 runje tak dale hrali, bychu tři dypki doma w Kulowje wostali. „Tak dyrbimy so z remisom spokojić.“, Marco Bulang praji. Dwaj daraj pak wobradźištej hosćom z Hlinowca dypk.
Dobyće w Hórkach
SJ Chrósćicy –
SG Weixdorf 2:1 (1:0)
Zestawa domjacych: Králíček – Mark, F. Cyž, Černohorský, B. Cyž, Marx, M. Zahrodnik (58. Matješk), Hawš, Bogusz (79. Kreuz), Młynk (86. Matik)
Po nachwatanskej hrě minjeny tydźeń startowachu Chróšćenjo njedźelu z hru přećiwo SG Weixdorfej do druheje połserije. Znowa wotmě so hra w Hórčan stadionje.
