Seehofer přijědźe
Berlin/Budyšin. Zwjazkoweho nutřkowneho ministra Horsta Seehofera (CSU) wočakuja póndźelu na oficialne wotewrjenje zhromadneho slědźenskeho a kompetencneho centruma zwjazkoweje a sakskeje policije w Budyšinje. Sakski nutřkowny minister Roland Wöller (CDU) chce Seehofera přewodźeć.
Dalšu kandidatku nominowali
Mjedźojz. Patricia Wissel je we wólbnym wokrjesu 52 (Budyšin 1) znowa direktna kandidatka CDU za klětuše wólby Sakskeho krajneho sejma. 44 čłonow CDU je tuchwilnu zapósłanču na wólbnowokrjesnej zhromadźiznje wutoru w Mjedźojzu (Medewitz) ze 97,7 procentami přihłosowanja wuzwoliło. „Mi je wažne za ludźi w swojim domizniskim wólbnym wokrjesu skutkować, jim pomhać a jich podpěrać“, rjekny Wissel.
Zastupne lisćiki jara požadane
Berlin (SN/JaW). Ze swjedźenskim aktom su zwjazkowi a krajni politikarjo kaž tež zastupnicy wusydlencow a narodnych mjeńšin Němskeje wčera w Berlinje 30lětne wobstaće zastojnstwa społnomócnjeneho zwjazkoweho knježerstwa za prašenja wusydlencow a narodne mjeńšiny w Němskej woswjećili.
Nimo mějićela zastojnstwa prof. dr. Bernda Fabritiusa běchu tež nimale wšitcy jeho šesćo předchadnicy přitomni runje tak kaž zastupjerjo wusydlencow a narodnych mjeńšin Frizow, Danow, Serbow a Sintow a Romow w Němskej. Serbow zastupowaštaj mjez druhim předsyda a jednaćel Domowiny Dawid Statnik a Marko Kowar, ze stron Sakskeje wobdźěli so społnomócnjeny statneho ministerstwa za wědomosć a wuměłstwo za naležnosće Serbow Stanisław Brězan, z Braniborskeje nawoda referata Serbja a Delni Němcy w ministerstwje za wědomosć, slědźenje a kulturu Clemens Neumann a sobudźěłaćer społnomócnjeneje Braniborskeje za naležnosće Serbow Měto Nowak.
Wojerecy (SiR/SN). Wulke wjeselo knježeše wčera pola Wernera a Kirsten Bejmic. Předsyda Wojerowskeho regionalneho kulturneho towarstwa, jeho dźowka a dalši čłonojo towarstwa dóstachu wot měšćanosty Thomasa Dellinga šek w hódnoće 8 000 eurow. Pjenjezy dariła je Załožba łužiskeje jězoriny, kotraž tak nowu drastowu komoru podpěruje.
Na Złokomorowskej dróze čisło 17, jenož dwaj zachodaj wot Wjacsławkec drastoweho domu zdalena je wosebita drastowa komora. Hižo wosom lět kulturne towarstwo rumnosće bywšeho hosćenca wotnaja. Tam je swoju towarstwowu stwu zarjadowało, kotraž rěka wotnětka drastowa komora. K 750lětnemu jubilejej města spřihotowachu trajnu wustajeńcu, hdźež pokazuja wjac hač 120 lět staru originalnu narodnu drastu serbskeho kwasneho ćaha.
Delegacija z Minska přebywa tuchwilu w Budyskim wokrjesu. Wona chce hospodarske zwiski mjez Łužicu a Běłoruskej rozšěrić, za čož je jej dźensniši hospodarski dźeń w Lubiju wulce wuznamny. Tež kulturne styki nawjazać steji na planje.
Budyšin (CS/SN). Wot wutory hač do jutřišeho přebywa delegacija z běłoruskeho Minska we wokrjesu Budyšin. Komunalni politikarjo a předewzaćeljo reaguja na wopyt Budyskeho krajneho rady Michaela Hariga (CDU), kiž bě loni w meji w stolicy Běłoruskeje. Nětko je sej delegacija mjez druhim předewzaće Budyskeho zhotowjerja pjecow Debag wobhladała. Runje tak steještej Wojerowski zawod za wobswětoškit HLD a chorownja w sprjewinym měsće na programje. Zaměr wopytow ma być znowa styki nawjazać, kotrež su so po politiskim přewróće nimale pominyli. NDR wšak bě dobre hospodarske zwiski do Běłoruskeje w něhdyšim Sowjetskim zwjazku wudźeržowała. Tohodla je dźensniši wopyt hospodarskeho dnja w Lubiju za delegaciju z Minska wosebje wažny. Tu móže so z mnohimi mjeńšimi a srjedźostawskimi zawodami skontaktować.
Hózk (SN/BŠe). Ratarstwo a zwěrinoškit móžetej hromadźe wulki wuspěch žnjeć. To je so wčera zaso wobkrućiło, jako přepoda Stefan Siegel wot spěchowanskeho towarstwa Njeswačanskeje ptakoškitneje stacije wuznamjenjenje we wobłuku škitneho projekta „Čerwjeny milan – kraj za žiwjenje“ Hózkowskemu ratarjej Matthiasej Domani. Zaměr projekta dźě je ptakej w kulturnej krajinje wjace žiwjenskeho ruma skićić, k čemuž tež cyroba słuša. Na něhdźe 40 hektarach swojich honow wokoło Hózka, Komorowa a Ralbic plahuja Domanicy lucernu, kotraž njeje jenož w ratarskim wobłuku wužitna, ale wuskutkuje so zdobom pozitiwnje na wobstatk čerwjeneho milana. „Rostlinu, kotruž plahujemy mjez druhim na polu, hdźež w dołhich hrjadkach aronija rosće, wjacekróć wob lěto we wotstawkach syčemy“, Matthias Domanja rozkładźe. Myše, kotrež korjenje aronije wobškodźeja, móža ptaki tak lóšo widźeć a honić. Pola aronije je tuž wo wjele mjenje škodow.
Berlin (dpa/SN). W krizy dieselowych awtow dla je so zwjazkowy minister za wobchad Andreas Scheuer (CSU) dźensa w Berlinje z wodźacymi zastupnikami němskeje awtoindustrije zetkał. Hłownje dźěše wo to, štó měł planowany přetwar staršich dieselowych awtow na dobro lěpšeho powětra zapłaćić. Šefojo awtobranše nochcychu so do posedźenja wo tym wuprajić. Dotal so awtotwarcy spjećuja, kóšty přetwara přewzać.
Wo antisemitizmje rěčeli
Drježdźany (dpa/SN). Sakski krajny sejm je dźensa składnostnje jutřišeje 80. róčnicy pogromoweje nocy wo antisemitizmje w towaršnosći debatował. Parlamentnicy mějachu za to aktualny nastork: W zwisku z namócnosćemi w Kamjenicy kónc awgusta běchu tež židow- ski hosćenc nadpadnyli. Po statistice nutřkowneho ministerstwa je ličba antisemitiskich njeskutkow w Sakskej loni wo nimale třećinu přiběrała. Cyłkownje zličichu 118 deliktow, lěto do toho 90.
Trump so do reportera dał
Drježdźany (dpa/SN). Sakska chce wjelči management w swojich lěsach přerjadować. Sakski krajny sejm je wčera wotpowědnemu naćiskej CDU a SPD přihłosował, kotryž předwidźi mjez druhim wjelči zakoń w swobodnym staće. Noworjadowanje ma konflikty mjez škitom zwěriny a zajimami plahowarjow skotu pomjeńšić. Po woli koaliciskeju frakcijow ma zakoń třělenje problematiskich wjelkow zmóžnić.
Zeleni a Lěwica warnowachu před tym, ludźi zatrašić. „Wjelk čłowjeka njewohroža“, rjekny frakciski šef Zelenych Wolfram Günther. Katrin Kagelmann (Lěwica) čorno-čerwjenej koaliciji wumjetowaše, wšitko činić, „zo móhli ludźo skónčnje třěleć směć“.
Rubježnik je wobchod napojow we Werderu pola Podstupima nadpadnył – chcyše pak jenož dźěl pjenjez měć. Wón žadaše sej wot sobudźěłaćerja pjenjezy z kasy, wohrožejo jeho z pistolu. Jako chcyše muž při kasy něhdźe 50lětnemu skućićelej pjenjezy přepodać, tón jemu znapřećiwi, zo ani telko njetrjeba, a so z dźělom pjenjez zminy. Najebać jeho skromnosć policija nětko za rubježnikom pyta.
Přewjele dowěry do nawigaciskeho nastroja móže strašne być: Šofer nakładneho awta je w jednym z narodnych parkow Awstriskeje na wuskim lěsnym pućiku tčacy wostał a by ze swojim Lkw-jom bjezmała 30 metrow do hłubiny padnył. Při wróćostorkanju šmórny so wón skały a wisaše ze zadnim dźělom 38 tonow ćežkeho woza hižo nad hłubinu. Pućik wužiwa hewak jenož hajnik. Policiji muž rjekny, zo „nawijej“ zasadnje dowěrja.