Aus der aktuellen Ausgabe vom Donnerstag, 28 Februar 2019

Donnerstag, 28 Februar 2019 13:00

Prezidenta nadběhował

Washington (dpa/SN). Bywši prawiznik Donalda Trumpa Michael Cohen je prezidenta USA w zjawnym słyšenju raznje nadběhował. Při swojich wuprajenjach před kontrolnym wuběrkom Domu reprezentantow we Washingtonje mjenowaše Cohen Trumpa jebaka a rasista. Při tym naliči cyły rjad přeńdźenjow – zdźěla moraliskeho zdźěla prawniskeho razu – kotrež móhli ameriskeho prezidenta do wuskosćow přinjesć. Cohen bě dlěje hač dźesać lět za Trumpa dźěłał.

May zapósłancow přeswědčiła

London (dpa/SN). W boju wo wustup Wulkeje Britaniskeje z EU je premier­ministerka Theresa May zapósłancow bri­tiskeho parlamenta wo swojim nowym kursu přeswědčić móhła. Tak je so wona na wčerawšim wothłosowanju móžnemu zběžkej přećiwnikow njerja­do­wa­ne­ho wustupa wuwinyć móhła. May mó­žeše połoženje do toho ze wše­lakimi přilubjenjemi změrować: Dyrbjała-li ze swojimi planami znowa zwrě­šćić, móhł parlament brexit přestorčić. Tomu je wjetšina přihłosowała.

Napjatosće přiwótřene

Veröffentlicht in Politika
Donnerstag, 28 Februar 2019 13:00

Zynkonošaki za kóždyžkuli słód

Ludowa hudźba raz hinak, historiski přehlad serbskeje sololiteratury za pianistow a zběrka łužiskich hwězdźičkow wušli

Tři nowe zynkonošaki skića zajimcam móžnosć, bohaty spektrum serbskeje hudźby dale, znowa abo snano tež prěni raz docyła sej wotkryć. Skupina Lídova muzika z Chrástu poski­ća čerstwy wid na serbsku ludowu hudźbu, Heidemarja Wiesnerec zhladuje na „150 lět Serbskeje klawěrneje hudźby“ a Serbski rozhłós je zběrku aktualnych popularnych štučkow zestajał. Produkciju wšitkich CDjow je Załožba za serbski lud spěchowała.

Najnjewšědniša z třoch cejdejkow rěka „Za čěskimi horami“. Na njej prezentuje skupina Lídova muzika z Chrástu cyłkownje 25 „spěwow Łužiskich Serbow“ – zdobom to podtitul edicije – a přidatnje tři nowe kompozicije, inspirowane wot tudyšeje kultury. Pola nas znate pěsnje pak njezaklinča tak, kaž smy to najskerje zwučeni, ale we wobdźěłanjach. A sadźby so zdźěla chětro wot tradicionalnych aranžementow rozeznawaja.

Veröffentlicht in Kultura
W mecklenburgsko-předpomorskim Barthu nawróći so sćinowy třěchikryjer Andreas Geldschläger (naprawo) ze swojimaj sobu­dźěłaćerjomaj z połnej žnjenskej mašinu k sładźišću. Dołhe a suche lońše lěćo je jim dobre žně wobradźiło. Hač do dźensa smědźachu woni sćinu žnjeć. Wot jutřišeho budu płoniny wokoło jězora přirodoškita dla zawrjene. Foto: dpa/Bernd Wüstneck

Veröffentlicht in Politika
Donnerstag, 28 Februar 2019 13:00

Serbske wustawki schwalene

Domowina ma nětko angažowane wosoby do třoch wuběrkow delegować

Choćebuz (SN/at). Bjezwokrjesne město Choćebuz ma wustawki wo spěchowanju serbskeje rěče a kultury. Zhromadźizna měšćanskich zapósłancow je ju na swojim wčerawšim posedźenju jednohłósnje wobzamknyła. Kaž rjekny na to wyši měšćanosta Holger Kelch (CDU) našemu wječornikej, „njemóže a nochce Choćebuz jako stolica Delnjeje Łužicy ignorować, zo słuša delnjoserbšćina po měnjenju UNESCO k woteměracym rěčam. Naše wustawki tomu faktej wotpowěduja.“

Předstejićel měšćanskeho parlamenta Reinhard Drogla (SPD) je wotpowědny dypk dnjoweho porjada připowědźił a so přitomnych zapósłancow prašał, štó by so k tomu wuprajić chcył. Dokelž nje­móžeše za to žanu potrjebu zwěsćić, je wothłosować dał.

Veröffentlicht in Lokalka
Donnerstag, 28 Februar 2019 13:00

Rozsudne koło tarifowych jednanjow

Bremen/Berlin (dpa/SN). Do rozsud­neho koła tarifowych jednanjow za zjawnu słužbu su dźěłarnistwa zadźerženje dźěłodawarjow raznje kritizowali. „Štož je dotal ze stron dźěłodawarjow přišło, zasłuža sej znamku njedosahace“, rjekny šef dźěłarnistwa ver.di Frank Bsirske wčera na zarjadowanju w Bremenje tysacam wobdźělnikow. Kraje nadźěłuja wot lěta 2015 wulke nadbytki, w lěće 2017 bě to 10,5 miliardow eurow a loni 15,7 miliardow. „Financne połoženje krajow je tak dobre kaž hišće nihdy. Hdy, hdyž nic nětko, je načasu zjawnu słužbnu atraktiwnišu sčinić“, Bsirske podšmórny.

Dźensa je so w Podstupimje třeće a prawdźepodobnje rozsudne koło tarifowych jednanjow mjez dźěłarnistwami a tarifowym zjednoćenstwom němskich zwjazkowych krajow zahajiło. Dźěłarnistwa žadaja sej za něhdźe milion tarifowych přistajenych krajow šěsć procentow wjace mzdy, znajmjeńša pak 200 eurow wjace wob měsac. Tarifowe wotzamknjenje ma tež za zastojnikow płaćić.

Veröffentlicht in Politika
Donnerstag, 28 Februar 2019 13:00

Wjeršk njejapcy skónčeny

Hanoi (dpa/SN). Wjerškowe zetkanje prezidenta USA Donalda Trumpa a sewjerokorejskeho mócnarja Kima Jong Una su dočasnje a bjez planowaneje zhromadneje deklaracije skónčili. Trump a Kim běštaj wo wšelakich móžnosćach rěčałoj, zo móhłoj atomarne wotbrónjenje a wot Trumpa přilubjene zběhnjenje sankcijow zwopradźić. Měnjenja wo tym pak běchu přerozdźělne, prezident USA po skónčenju jednanjow w rozmołwje z nowinarjemi zwurazni. Sewjerna Koreja bě na tym wobstała, zo USA wšitke sankcije přećiwo krajej zběhnu. „To tola njejsmy činić móhli“­, Donald Trump rjekny.

Jednanja wobeju delegacijow buchu njewočakowano abruptnje přetorhnjene. Poprawom běštej hišće podpisanje zhromadneje deklaracije a zhromadny wobjed wobeju politikarjow planowanej. Wšitko to pak krótkodobnje wotprajichu. Dalše rozmołwne terminy mjez krajomaj njejsu najprjedy raz postajene.

Trump, kotremuž je njejapke skón­čenje wjerška ćežka politiska poražka, chcyše so hišće dźensa do USA wróćić.

Veröffentlicht in Politika
Donnerstag, 28 Februar 2019 13:00

Městu wurostu nowe šansy

Braniborske knježerstwo přicpěwa Choćebuzej klučowy wuznam za strukturnu změnu we Łužicy a chce město tohodla w njej podpěrać.

Choćebuz (SN/at). Delnjołužiska metropola ma za poradźenje strukturneje změny­ po kóncu wudobywanja brunicy we Łužicy wulki wuznam. Toho je sej braniborske knježerstwo wědome, jako wuradźowaše zawčerawšim zhromadnje z čołom města w Choćebuzu.

Komuna „je wutroba a motor strukturneje změny, zahajeneje hižo před doł­him­ časom, kotraž so pak nětko z financnej podpěru dźeń a spěšnišo wotměwa“, kaž ministerski prezident Dietmar Woidke (SPD) rjekny. Jeho kabinetej je wažne, zo je Choćebuz na tónle proces „derje přihotowany a strukturnu změnu aktiwnje wuhotuje“. Z wuwića Łužicy na modelowy region za strukturnu změnu a škit klimy wurostu za Choćebuz tež nowe­ šansy, stej sej braniborske knježerstwo a čoło města přezjednej.

Veröffentlicht in Politika
Donnerstag, 28 Februar 2019 13:00

Wo censurje za čas NDR přednošował

Budyšin (CS/SN). Žurnalist a bywši šef­redaktor Noweje doby Sieghard Kozel je w­utoru čłonam Budyskeho Kluba wuchowarjow rěče wo censurje w Němskej demokratiskej republice (NDR) předno­šował. Do toho pak zhladowaše hłuboko do stawiznow. Tak dopomni na to, zo wu­wiwaše so censura runočasnje z nastaćom knižneho ćišća. Tehdy bě to přede­wšěm cyrkej, kotraž publikacije z teo­logiskich přičin zakazowaše. Poz­dźišo wuko­njachu politisku censuru, při čimž w Pruskej raznišo zachadźachu hač w Sakskej. Sieghard Kozel na to skedźbni, zo bě w artiklu 5 Zakładneho zakonja Zwjazkoweje republiki Němskeje hižo 1948 zapisane, zo „žaneje censury njeje“. Wustawa NDR tajki wotrězk njeměješe.

Veröffentlicht in Kultura
Donnerstag, 28 Februar 2019 13:00

Přihotuje so na wuměłske dny

Žuricy (aha/SN). Něchtóžkuli je so hižo w galeriji Alojsa Šołty rozhladował a so tam wo wuměłskej wušiknosći Žuričana přeswědčił. W swojej dźěłarni zamóže mortwe drjewo k žiwjenju zbudźić.

Mjenje znate je, zo ma w pódlanskej hali tež Knut Winkler dźěłarnju. Jako samostatny wuměłski kowar wón kreatiwnje zajimowanych zahorja. Po tym zo je w Drježdźanach rodźeny tam 1981 šulu wuchodźił, nawukny wón pola pomnikohladanskeje słužby wulkoměsta powołanje wuměłskeho zamkarja a kowarja.

Veröffentlicht in Kultura
Donnerstag, 28 Februar 2019 13:00

Prěnje pokalne koło wulosowane

Zamołwići Zapadołužiskeho koparskeho zwjazka (WFV) su prěnje pokalne koło­ za wólnočasnu ligu 2019 wulosowali a so na čas wot 15. do 18. měrca jako­ hrajny dźeń dojednali.

HZ LSV Bluń/ST Lubuš

– ST Natwar Němske Pazlicy

Wojerowski FC (Jednota)

– SZ Zeleno-běli Sepicy

HZ ESV Lok/SC/Wojerowski FC (Aktiwist) – LSV Hory

Hermsdorfske ST

– HZ Rakecy/FSV Šćeńca

Swobodne losy dóstachu HZ Wojerowski FC (Natwar)/Wětnica, Módro-běli Kulow, HZ Hórnikečanski jězor/ST Ćisk a Sokoł Ralbicy/Hórki. Werner Müller

Veröffentlicht in Sport

Anzeige