Aus der aktuellen Ausgabe vom Freitag, 06 September 2019
Freitag, 06 September 2019 14:00

To běch žarliwy

Wot wutory hač do dźensnišeho přewjedźechu dźewjatkarjo Malešanskeje Wyšeje šule projekt „GreenCut“ w biosferowym rezerwaće Hornjołužiska hola a haty. Jako pobych tam wčera dopołdnja na nowinarskej konferency při Dołhoboršćanskim haće, móžach takrjec live dožiwić, što projekt wučinja. Towarstwo Gespa bě šulerjam filmowu techniku přewostajiło, wo kotrejž móža šule hewak jenož sonić. W krasnej hatnej krajinje su šulerjo w skupinkach impresije přirody nahrawali. Kajke wjeselo woni při tym mějachu a kelko zajimawostkow su sej tak wotkryli, běše wočiwidne. A hdyž přidatnje hišće wobmysliš, zo njetrjeba šula za cyły projekt ani centa płaćić, da zwěsćiš, zo měješe rjadownja 9A z Malešec prosće njesměrne zbožo. Wšako bě wona mjez 30 wuzwolenymi projektowymi skupinami w Němskej. To běch sprawnje prajene tróšku žarliwy. Bych tajke něšto za swój šulski čas tež rady dožiwił. Pětr Dźisławk

Veröffentlicht in Politika
Freitag, 06 September 2019 14:00

Načolne znamki znowa tema

Drježdźany (dpa/SN). Načolne znamki na šulskich wuswědčenjach su wčera znowa Drježdźanske zarjadniske sudnistwo zaběrali. Hdy te swój rozsud zdźěli, njeje dotal jasne. W meji bě wyše zarjadniske sudnistwo w Budyšinje­ znamki za zadźerženje, pilnosć, sobudźěło a porjad jako móžne přizwoliło, wotpowědujo tak zdobom skóržbje Krajneho zarjada za šulu a kubłanje přećiwo rozsudej Drježdźanskeho zarjadniskeho sudnistwa z lońšeho nowembra. Tam běchu loni na próstwu šulerja rozsudźili, kiž bě přeswědčeny, zo načolne znamki jeho wobmjezuja sej powołanje swobodnje wu­zwolić. We wčera zahajenym jednanju ma so nětko wujasnić, kak so načolne znamki na dźěłowe a socialne zadźerženje šulerjow wuskutkuja.

Veröffentlicht in Politika
Freitag, 06 September 2019 14:00

Pućuja z wustajeńcu po Sakskej

Kak chcemy w Sakskej přichodnje hromadźe žiwi być? Z tymle prašenjom rozestaja so skupina Lipšćanskich wuměłcow na jězbje po Sakskej. Tak předstajeja w zjawnosći wuměłstwo a wabja ludźi do rozmołwy. Wuměłske twórby nastachu na zakładźe biografiskich a kolektiwnych dopomnjenkow. Medialne wobrazy zajimcam pokazuja, z kajkej lochkosću móža na domiznu a Saksku zhladować. Pućowansku­ wustajeńcu „Kak chcemy přichodnje w Sakskej hromadźe žiwi być“ je Běłowodźanski­ wyši měšćanosta Torsten Pötzsch (Klartext) wčera na naměsće před tamnišim dwórnišćom wotewrěł. Foto: Joachim Rjela

Veröffentlicht in Politika
Freitag, 06 September 2019 14:00

Hišće lětsa chcedźa rozsudźić

Budyšin (SN/JaW). 12. nowembra ma jasne być, štó budźe nowy jednaćel abo nowa jednaćelka Budyskeho Ludoweho nakładnistwa Domowina (LND). To připowědźi direktor Załožby za serbski lud Jan Budar w rozmołwje z našim wječornikom. Tón dźeń wuradźuje w Podstupimje załožbowa rada a ma tam w naležnosći rozsudźić. „To je trjeba, zo móhł zajimc abo móhła zajimča – je-li trjeba – wupowědźenski čas pola swojeho dotalneho dźěłodawarja dodźeržeć“, Budar wuswětli. Znowawobsadźenje jednaćelstwa LND je trěbne, dokelž poda so dotalna jednaćelka Marka Maćijowa klětu kónc meje na wuměnk.

Veröffentlicht in Kultura
Freitag, 06 September 2019 14:00

Sport (06.09.19)

Budyski měšćanski běh

Jutře přewjedu w Budyšinje měšćanski běh, tydźeń pozdźišo potom we Wojerecach. W Budyšinje započnu z wubědźowanjemi dźěći a šulerjow zaso w 10 hodź. Wutřěl ze startoweje pistole za hłownej běhaj na distancomaj 6 km a 10 km budźe w 14 hodź.

Blackbird-run přez zadźěwki

Za 4. blackbird-run w Hózku, běh přez zadźěwki, je so 400 běharkow a běharjow přizjewiło. Startować budu jón njedźelu w 14 hodź., kónc je za něhdźe 17 hodź. planowany. Dotal najlěpši čas muži leži pola 1:18:15 hodź., žonow pola 1:42:40 hodź. Mjez přizjewjenymi je wjace hač 20 Serbowkow a Serbow, telko kaž hišće ženje.

Kónctydźenski wolejbul

07.09. 14:00  HZ Pančicy-Worklecy II

  – Nysa Wolejs II (w Rych-    bachu, pokal, žony)

07.09.  14:00  Módro-běłe Wojerecy II

  – Viktoria Worklecy

  (w Rychbachu, pokal,

  žony)

07.09.  14:00  TSV Kundraćicy

  – HZ Pančicy-Worklecy

  (w Habrachćicach,

  pokal, žony)

07.09.  14:00  MSV Budyšin 04 II

  – Viktoria Worklecy     (pokal, mužojo)

Kónctydźenska kopańca

Na krajnej kaž tež na wokrjesnej runinje přewjedu koparske cyłki jutře a njedźelu pokalnej kole.

07.09.  15:00  Heidenauske ST

  – Budissa Budyšin

07.09.  15:00  Radefelder SV90

  – Jednota Kamjenc

07.09.  15:00  Arnsdorfske KT II

  – ST Marijina hwězda

Veröffentlicht in Sport
Tole budźe jedyn ze zadźěwkow, kotrež maja wobdźělnicy wubědźowanja blackbird-run zajutřišim w Hózku přewinyć. Ze 400 přizjewjenjemi je kapacita zarjadowanja docpěta. Na běharjow čaka šěsć kilometrow dołhi parcours přez błóto a wodu podłu Čorneho Halštrowa z dwanaće znatymi a nowymi zadźěwkami. Čaru maja wobdźělnicy dwójce zmištrować. Foto: Feliks Haza

Veröffentlicht in Sport
Kerstin Jentzsch z Jessie kaž tež Peter Jentzsch z Pepe a Celine (wotlěwa) z Isena we wokrjesu Erding su wčera Małowjelkowski prazwěrjenc wopytali. Woni přinošowachu k tomu, zo změje woblubowane wulětnišćo hač do kónca sezony 3. nowembra snano nowy wopytowarski rekord. Hač do kónca awgusta zličichu tam 190 000 hosći. To je wjace hač loni w samsnym času. Rekord 235 000 wopytowarjow mějachu w prazwěrjencu w lěće 2017, tež loni su tule ličbu nimale docpěli. Foto: Steffen Unger

Veröffentlicht in Lokalka
Freitag, 06 September 2019 14:00

Naměsto dypkownje hotowe

Wojerowske Łužiske naměsto wita wopytowarjow z nowym wobličom

Wojerecy (SN/MWj). Ponowjene Łužiske naměsto we Wojerecach chce tamniši wyši měšćanosta Stefan Skora (CDU) přichodnu póndźelu zjawnosći přepodać. Hač na někotre mjeńše krajinotwarske dźěła, kotrež chcedźa nazymu dočinić, je so poradźiło naprawu dypkownje k měšćanskemu swjedźenjej wotzamknyć.

Minjene měsacy su na Łužiskim naměsće nowe betonowe kamjenje wukładli a plestrowane pasmo z wotwodźowanjom dešćikoweje wody ponowili. Na boku Łužiskeje hale běchu to hižo do toho w zwisku z dalšimi dróho­twarskimi dźěłami wobstarali. Za nowe wobtwjerdźenje wužiwachu wulkoformatowe betonowe kamjenje. Dešćikowu wodu wotwodźeja přez nabóčne wužłobjenja do tohorunja ponowjeneje roły a po njej do wotwodźowanskeje syće­ města. Dotalne ławki ponowichu w komunalnym twarskim zawodźe.

Veröffentlicht in Lokalka
Freitag, 06 September 2019 14:00

Serbski dom jako pomnik přistupny

Budyšin (SN/MWj). W jubilejnym lěće architektoniskeho hibanja Bauhaus steji zajutřišim, njedźelu, tež lětuši dźeń wotewrjeneho pomnika pod hesłom „Moderne: Łamki we wuměłstwje a architekturje“. W Budyšinje wuzwolichu štyri objekty, kotrež wotbłyšćuja architekturu klasiskeje moderny kaž tež powójnskeho časa.

Stara kupnica na Bohatej čo. 18 je awtentiski swědk architektury 1920tych lět. Tam poskića architekt Tom Bartosch wot 14 do 17 hodź. wodźenja. Wěcywustojni přewodźerjo powjedu wopytowarjow w 13 a 14.30 hodź. po Serbskim domje. Dalši temowy objekt je lěta 1900 natwarjene kino. Tam móža so zajimcy wo aktualnych twarskich dźěłach na fasadźe a w jednotliwych kinowych žurlach wobhonić. A skónčnje budźe tež statna studijna akademija přistupna, hdźež tohorunja po potrjebje wodźenja wotměja. Dale budu w Budyšinje objekty widźeć, kotrež su hižo wjele lět woblubowane cile, kaž jastwo, zahroda Marianny­ Britze a Röhrscheidtowa bašta.­ Na Hłownym torhošću staraja so cyły dźeń wo ćělne derjeměće a wo live-hudźbu.

Veröffentlicht in Lokalka

Młodźinski kofej

# zeznaj młodźinske kluby a cyłki

ze swojeje wokoliny a wuměnjej sej mysle

z nimi!

# wothłosuj swoje terminy za młodźinsku

protyku 2020 z druhimi!

# informuj so wo aktualnych móžnosćach

podpěry a spěchowanja za twoje/waše

aktiwity!

>>> Přińdź sobotu, 7. septembra, wot 15 hodź. na kofej

a rozmołwu do młodźinskeho kluba w Nowej Wjesce!

wjace informacijow: socialna dźěłaćerka Marija Koklina

mobil: 01520 7273806

Veröffentlicht in Předźenak

Anzeige