Aus der aktuellen Ausgabe vom Montag, 18 November 2019

Nowy biskop zapokazany

Berlin. Sobotu je so Ewangelska cyrkej Berlin-Braniborska-Šleska Hornja Łužica w Berlinskej Marinej cyrkwi z biskopom dr. Markusom Drögu rozžohnowała, kiž bě lětdźesatk w tamnišej cyrkwi skutkował. Runočasnje zapokazachu noweho biskopa dr. Christiana Stäbleina. Na swjatočnych kemšach porěča tež Slepjanska fararka Jadwiga Malinkowa a je noweho biskopa serbsce strowiła.

Próstwu zapodać

Zhorjelc. Zajimcy spěchowanskich srědkow z programa „Bjezbarjerne twarjenje – najlubše městno za wšitkich“ w Zhorjelskim wokrjesu móža hišće hač do 17. decembra swoje próstwy wokrjesnemu wuwićowemu zarjadej zapodać. Za wotpowědne naprawy ma wokrjes lětsa­ 307 900 eurow k dispoziciji.

Wosebity nyšpor kapałnikow

Woblubowanu wótru zeleninu w Błótach nětko žnjeć započeli

Klěšojc (SN/BŠe). W Błótach su tele dny započeli chrěn žnjeć. Minjeny tydźeń wužiwachu nowinarjo składnosć, so po Klěšojskim (Klein Klessow) zawodźe za plahowanje zeleniny rozhladować, hdźež jim jednaćel Dirk Richter wužadanja wokoło žnjow chrěna rozłoži. Lětsa su tam na 1,4 hektarach chrěn plahowali, ně­hdźe 0,6 hektarow toho je stara družina błótowskeho chrěna. Po słowach jednaćela maja předwidźane přichodnje wjace rostlin teje družiny plahować. Z podpěru swójby, přećelow a znatych pola Klěšojca chrěn žněja. Hač do kónca nowembra, po móžnosći do prěnich zmjerzkow, chcedźa jón na dwěmaj třećinomaj přestrjenje domchować. Zbytk wostaja hač do klětušeho nalěća w zemi, zo bychu čerstwy chrěn dlěje předźěłanskim zawodam poskićeć móhli.

Budyšin (SN/bn). „Nacizm nima swoje korjenje w němskim ludźe. Mała horstka, kotraž je dale we wčerawšim žiwa, nima žadyn wliw. Hladajo na nětčišu wulku solidaritu chcu wam rjec: Stat steji za wami! Njetrjebaće so starosćić!“ Tele wuprajenje Konrada Adenauera (CDU) składnostnje antisemitiskich ekscesow w Němskej před 60 lětami tworješe zazběh wčerawšeho hudźbno-literarneho wječora we wopomnišću Budyšin.

Židźino (SN/at). We Wojerowskej wokolinje kaž tež w gmejnje Halštrowska Hola skutkuje telko drastowych skupin a towarstwow kaž w žanym dalšim regionje serbskeho sydlenskeho ruma. Na to je Wojerowčan Werner Bejma na njedawnym serbskim wječorku w Židźinom skedźbnił. Cyłki často kóždy za sebje dźěła­ja. Tohodla Bejma namjetowaše, takrjec jako třěšne zjednoćenstwo załožić Serbski drastowy zwjazk, kotryž za­jimy wjesnych skupin napřećo třećim zastu­puje. „Mam to za logiske“, rjekny předsyda Towarstwa k pěstowanju regionalneje kultury srjedźneje Łužicy.

Społnomócnjena za serbske nalež­no­sće města Wojerec a čłonka předsydstwa Serbskeje rejwanskeje skupiny Ćisk Gabriela Linakowa doda, zo dyrbjał tajki Serbski drastowy zwjazk status kraj­neho zwjazka měć. Chcedźa-li skupiny fachowemu zwjazkej přistupić, přińdźe za nje tuchwilu jeno Srjedźoněmski domizniski a drastowy zwjazk do prašenja. Jemu přisłu­šeja towarstwa z Berlina, Braniborskeje, Saksko-Anhaltskeje a Sakskeje. Ćišćenjo su w nim jenički serbski cyłk ze Sakskeje.

Budyšin (SN/CoR). Projekt dźiwadłoweje pedagogiki Němsko-Serbskeho ludoweho dźiwadła „Wokno do přichoda“ je zakónčeny. Dypkownje do němskorěčneje premjery hry „Wopušćeny dom“ Carle Niewöhner přichodny pjatk so wulke wokno Budyskeho NSLDź nětko we wšěch barbach dorostowych wobrazow błyšći. Zakład za nje je kruch wo dóńće swójby w Miłorazu. Wsy hrozy hač do lěta 2025 přesydlenje wudobywanja brunicy dla.

Wobdźělnicy projekta su so z prašenjom rozestajeli, što móhło po brunicy nastać. Něhdźe 300 dźěći a młodostnych ze zakładnych a wyšich šulow z Budyšina, Ralbic, Worklec a Pančic-Kukowa je wobrazy połne fantazije k přichodej Łužicy tworiło a tak wulke foto bagra a wuhloweje jamy narunało. „Wuměłstwo je najwjetši dyrdomdej nimo žiwjenja samoho. Za to smy wot naroda perfektnje wuhotowani z kreatiwitu a mocu sej něšto předstajić. Tohodla maja wuměłstwowe twórby wot dźěći a młodostnych wot spočatka najwjetšu hódnotu“, praji dźiwadłowa pedagogika Katarzyna Kudzewicz. Hišće hač do pjatka je móžno sej projekt serbskeje dźiwadłoweje pedagogiki w NSLDź wobhladać.

Škocjan v Podjuni (jwo/SN). Sobotu smědźeše bywši wiceprezident Federalistiskeje unije europskich narodnych mjeńšin Bjarnat Cyž losowansku soninu za Serbsku koparsku wubranku muži być. W awstriskim Škocjanu v Podjuni (Sankt Kanzian) wulosowa wón zhromadne mustwo muži z Hornjeje a Delnjeje Łužicy do skupiny A z domjacym cyłkom Koroška. Tak wubědźujetej so mustwje po europeadźe 2012 we Łužicy a 2016 w Južnym Tirolu znowa w skupinskej fazy – Korošce pak běchu Serbja dotal, drje snadnje, ale stajnje přěhrali. Dale dyrbja łužiscy koparjo přećiwo Němcam z Danskeje a Cymbram ze sewjerneje Italskeje nastupić.

Praha (dpa/SN). Składnostnje 30. róčnicy somoćaneje rewolucije je prezident zwjazkoweho sejma Wolfgang Schäuble (CDU) w Praze namołwjał, Europu sylnić a wužadanja zhromadnje zmištrować. Mnohim zdawa samozrozumliwe być, zo smy w swobodźe a demokratiji w Europje bjez mjezow žiwi, rjekny němski po­litikar za swjedźenskim zarjadowanju w Narodnym muzeju. „Wučba lěta 1989 je: Ničo njetrjeba tak wostać, kaž je.“

Dalše namócnosće w Chinje

Hongkong (dpa/SN). Policija w Hongkongu je dźensa znowa ze sylzopłunom a retlemi přećiwo demonstrantam zakročiła. Radikalni aktiwisća su w měšćanskim dźěli Tsim Sha Tsui nowe barikady twarili a kamjenje a bencinowe bleše mjetali. K ćežkim rozestajenjam je tež na polytechniskej uniwersiće dóšło. Policija je teren wobstupiła. Mjeztym je sudnistwo w Hongkongu zakaz zakuklenja zběhnyło, dokelž wone wosobinske prawa njetrjebawši raznje rani.

Wjace wotpadkow nazběrali

Pjaneju šoferow lepiła je policija w Kamjenicy, kotrajž běštaj po wobchadnym njezbožu městno za wodźidłom awta měnjałoj. Chětro wobškodźene jězdźidło wobsadce policajskeho awta napadny. Za wodźidłom sedźeše 29lětny bjez jězbneje dowolnosće. Při pytanju za městnom njezboža so wukopa, zo bě 33lětny z awtom jěł a do wobhrodźenja zrazył. Tón měješe jedyn promil, 29lětny samo 1,3 promile alkohola w kreji.

Kulacy so kirbs je w saksko-anhaltskim Havelbergu wobchadne njezbožo zawinił. Kirbs bě so na dróhu kulił. 64lětna šoferka wosoboweho awta njemóžeše hižo borzdźić a zrazy do płoda. Při tym so lěwy prědni bok awta wobškodźi. Kriminalna policija ma kulacu so banju za wobchadny zadźěwk a přepytuje nětko přećiwo jeje wobsedźerjej. Toho pak dyrbi najprjedy raz wuslědźić.

Drježdźany (dpa/SN). Frakcija AfD je w Sakskim krajnym sejmje ze swojim žadanjom zwrěšćiła, wutworić enquete-komisiju za wjesne kónčiny. Při wothłosowanju na wurjadnym posedźenju sejma minjeny pjatk běchu wšitcy parlamentownicy AfD za to, zapósłancy wšěch tamnych štyrjoch frakcijow pak hłosowachu bjez wuwzaća přećiwo tomu. Krajny sejm je winowaty tajku enquete-komisiju zasadźić, hdyž sej to třećina zapósłancow žada. AfD by potajkim 40 hłosow trjebała, docpě pak jeno 37. Zastup- nicy tamnych frakcijow skedźbnichu na to, zo hižo wot lěta 2018 strategijowy koncept za sylnjenje wjesnych kónčin předleži a zo dyrbjeli jón zwoprawdźić.

Parlamentariski jednaćel frakcije CDU Stephan Meyer wuwjedźe: „AfD błyšći so z tunim populizmom na kóšty dawki­płaćerjow, kotřiž dyrbja tele wurjadne posedźenje financować. Strona je ze samsnym žadanjom hižo před lětomaj zwrěšćiła a pokazuje, zo nima žane zdaće nastupajo Saksku.“ Kaž Meyer wu­zběhny, je wuwiće wjesnych kónčin jedna z centralnych temow tuchwilnych koaliciskich jednanjow.