Počesća Kurta Biedenkopfa
Drježdźany. Ze swjedźenskim zarjadowanjom w Drježdźanskej cyrkwi Našeje knjenje chce Konrada Adenauerowa załožba přichodnu wutoru politikarja unija Kurta Biedenkopfa počesćić, kiž tón dźeń 90. narodniny swjeći. Na zarjadowanje wočakuja tež zwjazkowu kanclerku Angelu Merkel (CDU). Křesćanski demokrat Biedenkopf bě wot lěta 1990 do 2002 ministerski prezident Sakskeje.
Dwě stejnišći poskićiło
Choćebuz. Město Choćebuz je Zwjazkowej centrali za politiske kubłanje dwě stejnišći – při nastawacym Wuchodnym jězoru abo na arealu bywšeho jastwa na Budyskej dróze – poskićiło, hdźež móhła wona nowy fachowy wobłuk wutworić, kaž wčera z radnicy rěkaše. Zwjazkowy zarjad chce nowy wobłuk za transformaciske procesy zarjadować, pak w Choćebuzu pak w Halle nad Solawu.
Na Dnju susodow so wobdźělić
Budyšin (SN/BŠe). Ludźo wokoło Radworja a Njeswačidła začuwaja, zo je ličba zadobywanjow wot minjeneje nazymy přiběrała. Z naprašowanja našeho wječornika pola policije wuchadźa, zo běchu so paduši wot minjeneho septembra w Radworskej gmejnje do šěsć objektow zadobyli, w Njeswačanskej do wosom. Pokradnyli su na přikład tobakowe twory, zežiwidła, pjenjezy, bencin, kolesa a płunowe bleše. Kriminalna słužba Budyskeho policajskeho rewěra přepytuje. Tuchwilu maja jednoho podhladneho, kiž je po wšěm zdaću płunowe bleše z ležownosće Njeswačanskeje firmy spakosćił. We wšěch dalšich padach zastojnicy hišće rešeršuja. Wšudźe su slědy skućićelow zawěsćili, kotrež nětko přepytuja a z kotrychž nadźijeja so dalšich pokazkow na zadobywarjow.
Wojerecy (AK/SN). Po lońšich a lětušich nazhonjenjach chcedźa we Wojerecach tak mjenowany wobydlerski hospodarski plan dołhodobnje dale wjesć. Za to wupraja so mjez druhim měšćanski radźićel Uwe Blazejczyk, kiž je zdobom nawoda za to zamołwiteje wodźenskeje skupiny. „Wobydlerjo so na rozsudach we Wojerecach rady sobu wobdźěleja, tohodla dyrbjeli z etatom pokročować“, wón podšmórny.
Namjety, pjenjezy z tohole wosebiteho etata w měsće a w jemu přisłušacych wsach nałožić, kotrež je wjac hač sto zajimcow na njedawnej dźěłarničce w forumowej žurli Wojerowskeje Łužiskeje hale rozjimało, sahachu wot ponowjenja murje w Parku Jürgena von Woyskeho hač k tomu, postajić dwaceći informaciskich taflow wo kulturnohistoriskich pomnikach města. Hač do přichodneje póndźele móža wobydlerjo hišće wothłosować, za kotre naprawy měli pjenjezy z wobydlerskeho etata wužiwać. Wot měrca potom chcedźa projekty zwoprawdźeć.
Stróža (SN/MWj). Na wosebite wašnje chce zarjadnistwo biosferoweho rezerwata Hornjołužiska hola a haty hromadźe z domizniskim towarstwom Radiška dopomnjenki wobydlerjow z časa dźěćatstwa wokoło Hućiny, Stróže a Olbaskeho jězora zachować. Za to zarjaduja pjatk a sobotu, 24. a 25. januara, w Stróžanskim šulskim muzeju „Korla Awgust Kocor“ kónctydźenske zetkanje w znamjenju stawiznow a stawizničkow. Jeho wuslědki zapřijmuja potom do ponowjenja přirodoweje wučbneje šćežki „Hućinjanske haty a Olba“.
Kaž sobudźěłaćerka zarjadnistwa biosferoweho rezerwata Susanne Bärisch zdźěli, maja za nowy koncept přirodoweje wučbneje šćežki wosobinske dopomnjenki a anekdoty wobydlerjow z Hućiny, Stróže, Zubornički a blišeje wokoliny wažnu rólu hrać. Fota abo na přikład najlubši karpowy recept su tohorunja witane. Wšitke stawiznički a wobrazy chcedźa zezběrać, wobdźěłać a po móžnosći prawje wjele z nich na nowych informaciskich taflach předstajić.
Choćebuske rjemjeslniske wiki jako najwjetša předawanska a wukonowa přehladka w Braniborskej wotměja so přichodnu sobotu a njedźelu 30. raz. Pódla budźe znowa zhromadne wustajenišćo Zwjazka serbskich rjemjeslnikow a předewzaćelow (ZSRP).
Choćebuz (SN/at). Zhromadne wustajenišćo pod módro-čerwjeno-běłej chorhoju je tradicionalne wonkowne znamjo prezentacije delnjoserbskich firmownikow. Wopytowarjo nańdu je hnydom w hali 1, z čimž organizatorojo serbskim wustajerjam wosebitu kedźbnosć zaručeja. ZSRP zastupuja lětsa jeničce tři předewzaća, kotrež pak so tu mnohe lěta swěrnje předstajeja. K nim słuša Delia Münchowa z Heinzojc drastoweje šwalčernje w Žylowje. „Wjeselu so, zo je prěni dźeń wikow ptači kwas. Tak předstaju drastu, kotraž zwisuje z woblubowanym ludowym nałožkom“, wona powěda. Kaž loni, hdyž bě rjemjeslniska přehladka dźeń po ptačim kwasu, chce rjemjeslniska mišterka figurinu jako pobratśa (brašku) zhotować. Sobu wzać chce runje tak drastu, kotruž chowancow Žylowskeje Witaj-pěstowarnje na ptačim kwasu woblěkaja.
Prěni raz je so Patricia Kralec z Róžanta 2015/2016 na Literarnym wubědźowanju LND a Załožby za serbski lud wobdźěliła, tehdy hišće bjez wuznamjenjenja. Tónraz pak dósta so z powědančkomaj „Skok“ a „Ke kermuši“ do ligi mytowanych, a to w dwěmaj kategorijomaj. Přinošk za Radijo Satkula, kotryž bě 21lětna studentka zubneje mediciny w Drježdźanach přihotowała, a rozmołwa ze zamołwitym za wubědźowanje ze stron załožby Johnom Petrikom běštej jej nastork, so znowa pjera jimać. „Tež nutřkownje je mje wabiło. Poprawom so přeco mjerzam, zo nimamy serbsku literaturu za młodych ludźi, kajkuž bych sej přała. Tajku, kotraž so lochko čita, hdźež mje hižo w prěnim wotrězku žane mi njeznate słowa njewottrašeja a kotraž młodźinske temy wobjednawa.“ Młoda žona je hižo wot lěta 2013 nazhonjenja na polu rozhłosoweho žurnalizma zběrała. A wosebite wašnje pisać, zo by připosłuchar tež jeno słyšo rozumił, wo čo dźe, pytnješ tohorunja w powědančkach Patricije Kralec. Direktne a wočerstwjace wone su – tajke, kaž by ći něchtó něšto powědał. „Štož sej myslu, dyrbi won.“ Tak chce tež dale pisać.
Stuttgart (dpa/SN). Afera manipulowanych dieselowych jězdźidłow dla drje budźe za němskeho awtotwarca Daimler dróša hač dotal myslene. Za lěto 2019 liča z wudawkami hač do 1,5 miliardow eurow, koncern dźensa w Stuttgarće zdźěli. Při tym dźe wo „přidatne kóšty za tuchwilne zarjadniske a sudniske jednanja w zwisku z potrjechenymi dieselowymi jězdźidłami Mercedes Benz we wšelakich kónčinach“. Daimler bě loni hižo prěnje 1,6 mrd. eurow za to składował.
Mjeńšinowe knježerstwo steji
Erfurt (dpa/SN). Po třoch jednanskich kołach su so Lěwica, SPD a Zeleni zasadne prašenja wutworjenja mjeńšinoweho knježerstwa w Durinskej dojednali. Tak wobchowa Lěwica štyri ministerstwa, SPD změje tři a Zeleni dwě, kaž wodźacy politikarjo třoch stron wčera wječor informowachu. Nowemu knježerstwu pobrachuja w parlamenće štyri hłosy k wjetšinje. SPD a Zeleni chcedźa na stronskimaj zjězdomaj rozsudźić, hač so na to zwaža. Lěwica praša so čłonow.
Nowy wirus so rozšěrja
Swojorazny Porsche zbudźa w Mnichowje diskusije. Sportowy wóz wupada mjenujcy na prěni napohlad kaž policajske awto. Hakle při dokładnišim wobhladanju widźiš, zo njejedna so wo słužbne jězdźidło, ale je jenož napodobnjene. Na motorowej hawbje a na durjach steji na neonomódrym pozadku „Police“. Mnichowska policija z awtom žadyn problem nima, dołhož njejstej „Polizei“ a bayerski wopon na nim widźeć.
Awto z Habole wućahnyła je wohnjowa wobora w sewjerobraniborskim Mildenbergu. 45lětny šofer bě swój Pkw na parkowanišću při přistawje wotstajił, bjeztoho zo by ručne borzdźidło přićahnył. Awto jědźeše po skłoninje dele, zjědźe do rěki a so skónčnje podnuri. Wohnjowa wobora skaza nurjakow a kran. Po hodźinach móžachu Pkw z rěki wućahnyć. Cyłkowna škoda njeje hišće znata.