Aus der aktuellen Ausgabe vom Donnerstag, 23 Januar 2020

Jury so skonstituowała

Drježdźany. Nowopowołana jury za Myto za serbsku rěč – Zejlerjowe myto je so­ wčera w Drježdźanach skonstituowała. Rada za serbske naležnosće, Zwjazk Łužiskich Serbow Domowina, Serbski insti­tut, Budyski a Zhorjelski wokrjes, gmejny serbskeho sydlenskeho ruma a sakske ministerstwo za wědomosć, kulturu a turizm běchu za nju stajnje po jednym čłonu namjetowali.

Lessingowe akcenty zahajene

Kamjenc. Na wčerawšich narodninach Gottholda Ephraima Lessinga su w Kamjencu Lessingowe akcenty z čitanjom žurnalista Alexandera Osanga z Berlina zahajili. Tamniši Lessingowy muzej poskići hač do spočatka měrca dwanaće zarja­dowanjow w tym wobłuku. Kóžde lěto wotměnjeja so wjetše Lessingowe dny a mjeńše Lessingowe akcenty.

Předadźa lěsy w Němskej?

Aš. Najzapadniše čěske město Aš wobsedźi historisce tež něhdźe 20 hek­tarow lěsow na němskej stronje mjezy. Dokelž je tak ćežko je wobhospodarjeć, chcyli tamniši zamołwići lěsy předać. Tale mysl złožuje so zdobom na fakt, zo su ležownostne płaćizny w Němskej wyše hač w Čěskej republice.

Swoju premjeru dožiwi wčera wječor lětuši dźěćacy ptačokwasny program SLA na žurli Kamjenskeho hotela „Město Drjež­dźany“. „Zabyty ptači kwas“ rěka kruch, za kotryž bě Jěwa-Marja Čornakec libreto spisała a Conny Wolf hudźbu skomponowała. Jutře přeproša ansamblowcy dźěći w Lubiju, swójbne předstajenje budźe 31. januara popołdnju w Budyskim SLA. Foto: René Plaul

Wšudźe w Serbach dźěłaja na digitalnym přichodźe. Posłužby Serbskeje centralneje biblioteki (SCB) a Serbskeho kulturneho archiwa (SKA) móžeš hižo doma při ličaku wužiwać. Cordula Rataj­czakowa je so z nawodu SCB a SKA Witom Bejmakom rozmołwjała.

Maće nowu internetnu stronu z digital­nymi poskitkami – čehodla?

W. Bejmak: Sym čłowjek, kiž praji: Wšo, štož mamy, dyrbi won do swěta. Wša­ko za młodu generaciju płaći, štož w interneće njedawa, to njeeksistuje. Na­ša­ biblioteka a naš archiw matej wo­se­bitu stronu za wužiwarjow w čitarni, kotraž zajimcam naš skład spřistupnja. A tu smy do interneta stajili. Zdźěla su tele digitalne posłužby tež na internetnej stronje Serbskeho instituta přistupne, ale nic wšitke naraz. Z wosebitej stronu smy je nětko wočiwidnišo hromadu zwjedli.

Dohromady dźesać poskitkow tam nadeńdźeš. Što za nimi tči?

Dźěłowy kruh za serbske naležnosće města skonstituowany

Budyšin (SN/at). Z dospołnje nowymi wobličemi ze stron měšćanskich radźićelow je dźěłowy kruh za serbske naležnosće města Budyšina we wólbnej periodźe 2019–2024 wčera dźěłać započał. Na konstituowacym posedźenju, kotrež spočatnje Budyski měšćanosta dr. Robert Böhmer (njestronjan) nawjedowaše, su přitomni štyrjo radźićeljo a třo wěcywustojni wobydlerjo rěčnika/rěčnicu gremija a jeho/jeje zastupjerja wu­zwolili. W dotalnym skutkowanju dźěłoweho kruha je so jako spomóžne wopokazało, zo čłon měšćanskeje rady zastojnstwo rěčnika wukonja. Tale wosoba ma direktniši přistup k wšěm informacijam a k zarjadnistwu.

W Muzeju moderneho wuměłstwa Korutanska (MMKK) su wčera wječor wuměłski projekt třoch krajow „Wobrazy krajiny – Přechod“ zahajili. Nimo direktora Załožby za serbski lud Jana Budarja, direktorki MMKK Christiny Wetzlinger-Grundnig, ini­cia­­tora projekta Karla Vouka a krajneho hejtmana dr. Petera Kaisera (wotlěwa) běchu tež wšitcy dwanaćo wobdźěleni wuměłcy tam. Wustajeńca, kotraž bě loni w Budyskim Serbskim muzeju widźeć, je zhromadny projekt załožby, Serbskeju muzejow Budyšin a Choćebuz, MMKK z Awstriskeje a Muzeja za moderne a načasne wuměłstwo Koroška w słowjenskim měsće Slovenj Gradec. Foto: Ferdinand Neumüller

Lětuši dźeń wotewrjenych duri w Křesćan­skej zakładnej šuli Wóslink­ bě znowa jara wuspěšny.

Wóslink (DJ/SN). Zajim dźěći a jich staršich, po Wóslinčanskim křesćanskim šul­skim domje so rozhladować, bě – kaž wočakowane – jara wulki. Tak mějachu wjacori wopytowarjo sobotneho zarjadowanja ćeže parkowanske městno namakać.

Za wurjadny dźeń běchu wuknjacy zakład­neje kaž srjedźneje šule z wučerku Andreju Stein program nastudowali. Tak přitomnym swoje talenty hnydom k zazběhej pokazachu. Mjez druhim činješe to na hudźbnym polu Jasmin z 10. lětnika, kotraž je song spěwarki Billie Eilish­ „Everything I wanted“ wuběrnje před­njesła. Tež dźiwadźelnicy ze 6. a 8. lětnika mějachu swój wulki wustup runje tak kaž młódši z 2. lětnika. Přiklesk hosći su sej­ wšitcy zasłužili. Po programje wotewrěchu w jědźerni kubła­nišća kofejownju. Při dobrej šalce bunjaceho kofeja a skibce tykanca dóńdźe k płódnej wuměnje nazhonjenjow.

Eisenach (dpa/SN). Při ćežkim njezbožu šulskeho busa njedaloko Eisenacha stej dźensa rano dwě dźěsći smjertnje znje­zbožiłoj. Krajnoradny zarjad Wartburgskeho wokrjesa dale zdźěla, zo su so dalši dwacećo šulerjo kaž tež šofer zranili. Po informacijach policije bě wjace hač dwaceći dźěći w busu. Wokoło 7.30 hodź. poča so bus na zalodźenej dróze suwać a zajědźe do přirowa. Bus bě po puću z Eisenacha do zakładneje šule w Berka.

Prawicarsku skupinu zakazał

Berlin (dpa/SN). Zwjazkowy nutřkowny minister Horst Seehofer (CSU) je prawicarskoekstremnu skupinu „Combat 18“ zakazał, kaž rěčnik ministerstwa informuje. W rańšich hodźinach je policija we wjacorych zwjazkowych krajach, mjez druhim w Braniborskej, objekty přepytała a nawodu skupiny zajała. K namocy zwólniwu prawicarsku skupinu maja za wobrónjenu wotnožku w Němskej zakazaneje syće neonacijow „Blood and honour“ (Krej a česć).

Zakoń wo brexiće schwalili

Pasažěrojo z chinskeho města Wuhan, centruma noweje chorosće płucow, dyrbja so na Tokioskim lětanišću wosebje kontrolować dać. Ćopłotu měrjaca kamera zwěsća, hač su so z wirusom natyknyli. Dźensa rano su Wuhanske lětanišćo zawrěli, namołwjejo wobydlerjow w měsće wostać. Zamołwite zarjady trochuja, zo je wjace hač 4 000 ludźi natyknjenych. Foto: dpa/Kyodo

Lěni listonoš je w Japanskej listy doma składował, město toho zo by je roznošował. To bě jemu „přewulka dračina“, kaž 61lětny policistam wuzna. Zastojnicy běchu na wšě 24 000 posyłkow w domje listonoša­ njedaloko Tokija namakali. Prawdźepodobnje bě muž hižo wjele lět tak dźěłał. Hakle při internej kontroli so to nětko wukopa. Zamołwići pósta posyłki přiwšěm hišće roznošuja a so pola škodowanych zamołwjeja.

Z wosebitym infomobilom chcedźa w zwjazkowej stolicy wopytowarjow sławneje East-Side-Gallery, dźěla bywšeje Berlinskeje murje, wo stawiznach objekta informować. Dotal poskićachu jenož wodźenja. Nětko móža so něhdźe štyri miliony wopytowarjow, kotřiž kóžde lěto podłu murje chodźa, lěpje wobhonić. Załožba Berlinskeje murje, kotraž je wot lěta 2018 za East-Side-Gallery a za kubłanske dźěło wokoło historiskeje městnosće zamołwita, infomobil wobhospodarja.

Waršawa (dpa/SN). Prezident Zwjazkoweje rady Dietmar Woidke je na swojej prěnjej wukrajnej jězbje w zastojnstwje we Waršawje přećelstwo mjez Němskej a Pólskej jako „dźiw normality“ wuzbě­hnył. „Měli to přeco hišće jako wulki dar wobhladować, zo su Polacy nam napřećo hladajo na stawizniski pozadk wotewrjeni, zo su nam Němcam ruku poskićili“, rjekny politikar SPD a braniborski mi­nisterski prezident wčera po rozmołwje z prezidentom pólskeho senata Toma­szom Grodzkim. Zdobom Woidke namołwješe spřećiwjeć so tendencam, kotrež chcyli stawizny přepisać. Ruski prezident Wladimir Putin tuchwilu spyta stawizny hinak wukłasć, Woidke po rozmołwje z wjacorymi pólskimi politikarjemi kritizowaše. Putin je Pólskej njedawno antisemitizm wumjetował a winu na wudyrjenju Druheje swětoweje wójny dał, dokelž bě kraj pječa z Hitlerom hromadźe dźěłał. „Druha swětowa wójna njeje z Pólskeje wuchadźała, ale z Němskeje. Dyrbimy k tomu stać, što su Němcy Polakam, dalšim ludam a wosebje Židam načinili“, Woidke wuzběhny.