Aus der aktuellen Ausgabe vom Dienstag, 01 Dezember 2020

Skupina neonacijow zakazana

Berlin. Z „Wolfsbrigade 44“ je zwjazkowy minister nutřkowneho Horst See­hofer (CSU) znowa zjednoćenstwo neonacijow zakazał, kaž jeho ministerstwo informuje. Při raciji dźensa rano w Mecklenburgsko-Předpomorskej, Sewjeroryn­sko-­Westfalskej a Hessenskej su zastojnicy pola jědnaće čłonow brigady brónje našli. Zeskupnjenje je zdobom pod mjenom „Sturmbrigade 44“ znate.

Pjenjezy za nowe tramwajki

Budyšin. Jednohłósnje su radźićeljo zaměroweho wobchadneho zwjazka Hornja Łužica-Delnja Šleska (ZVON) wčera w Budyšinje wobzamknyli, zo ma město Zhorjelc spěchowanje za tramwajki dóstać. Wosom nowych jězdźidłow chcedźa tam kupić. Cyłkownje ma město nad Nysu za to lětsa a klětu dohromady 240 000 eurow dóstać.

Přezmjeznu cwólbu rozbili

Z čerwjenej swěcu skedźbnichu wčera dźiwadła po wšej Němskej na jich wosebitu situaciju za čas lockdowna. Tež ­Budyskej jewišći NSLDź a SLA so na akciji wobdźěleštej, štož Chrystof Bjarš a Stefan Cuška (wotlěwa) wobkedźbowaštaj. Foto: SN/Hanka Šěnec

Słowak Jan Kozelnicky skutkuje hižo dlěje hač 20 lět we Łužicy. Rejwar a wučer za rejwanje je tuchwilu runja mnohim swojim kolegam w jeho dźěławosći wot korony po­trjecheny. Milenka Rječcyna je so z nim rozmołwjała.

Móžeće swoje powołanje wukonjeć?

J. Kozelnicky: Tuchwilu nažel nic. Sym w swojim powołanskim dźěle korony dla dospołnje wobmjezowany. Jako přistajeny Serbskeho ludoweho ansambla nimam runje tak kaž moja kolegina Alexandra Wagner žanu šansu na rejwansko-pedagogiskim polu skutkować, štož je naju poprawny nadawk.

Što su přičiny za to?

J. Kozelnicky: Předpisy za škit před ­koronawirusom. Njemóžemy popołdnju do šulow jězdźić a tam proby we wobłuku cyłodnjowych poskitkow přewjesć. Do wospjetneho lockdowna smój so wo něhdźe 120 šulerjow starałoj. Jězdźiłoj smój na šule do Chrósćic, Ralbic, Worklec, Radworja a Wojerec. Tež zhromadny projekt z Němsko-Serbskim ludowym dźiwadłom w Radworju mjeztym wotpočuje. Nazwučowarnje, kaž Chróšćanska „Jednota“ abo žurla SLA, su za trening, proby a tak dale zawrjene.

Sće doma abo maće přiwšěm składnosć w ansamblu dźěłać?

Wot dźensnišeho nowe postajenja korony dla płaćiwe

Budyšin/Zhorjelc (SN/BŠe/bn/JaW). We wokrjesomaj Budyšin a Zhorjelc płaća nowe postajenja za škit přećiwo koronawirusej. Tak stej wobaj wokrjesaj poručenja, kotrež je Swobodny stat Sakska minjeny pjatk připowědźił, wobkrućiłoj. Po nich maja so wšitcy hač do 28. decembra měć. Tak njesmě nichtó bjez konkretneje přičiny bydlenje wopušćić. Přičiny su na internetnych stronach wokrjesow wopisane. Zetkać smědźa so wot dźensnišeho maksimalnje pjeć wosobow z dweju domjacnosćow, dźěći do 14 lět su z toho wuwzate. Wot 23. decembra smědźa so dźesaćo z dweju domjacnosćow zetkać. Na po­hrjebach a wěrowanjach je hač do 25 wosobow dowolenych. Šule a pěstowarnje wostanu wočinjene.

Budyšin (SN/at). W njewěstym času koronapandemije je to na spočatku adwenta pozitiwna powěsć: We wuchodnej Sakskej bě w nowembrje 17 756 bjezdźěłnych, 127 (0,7 procentow) mjenje hač w předměsacu, ale 1 662 (+10,3 procenty) wjace hač loni w nazymniku. Wo tym je Budyska wotnožka agentury za dźěło dźensa informowała. „Pytanje za dźěłowymi mocami tež w nowembrje swój čas traje. W dobje přiběraceho naprašowanja za fachowcami wudani so wid na ludźi ze zbrašenjom ćim bóle. Runje swojeho handicapa dla su tući husto nadpřerěznje motiwowani a derje kwalifikowani“, wabi Kathrin Groschwald, předsydka jednaćelstwa Budyskeje agentury za dźěło.

75,4 procenty ćežkozbrašenych, kotřiž su w Budyskim wobwodźe bjezdźěłnje přizjewjeni, maja wotzamknjene powołanske wukubłanje abo studij. Mjez wšitkimi bjezdźěłnymi ma 69,7 procentow powołanske wotzamknjenje.

Dźěłodawarskemu serwisej agentury w Budyšinje přizjewichu předewzaća w nowembrje 885 swobodnych dźěłowych městnow. To je 109 (-11 procentow) mjenje hač hišće w oktobrje.

Zły Komorow (AK/SN). Mjezypřesahowacy turistiski zwjazk Łužiska jězorina zasadźuje so dale za wjace bjezbarjernosće podłu jězorow regiona. „Ze sepju dźěłarničkow skedźbnjamy na móžnosće so bjez zadźěwkow na přibrjohach pohibować. Po přepytowanju štyrjoch modelowych jězorow chcemy nětko praktiske poručenja zajimcam pokazać“, zdźěli ­minjeny tydźeń nowinska rěčnica turistiskeho zwjazka Katja Wersch. Jako čłon dźěłoweho zjednoćenstwa „Lóšo pu­ćować – bjezbarjerne dowolowe cile w Němskej“ sadźa zwjazk tež na dowol w jězorinje. Hižo loni a tež lětsa su k tomu dźěłarnički přewjedli. Management za turizm a strowotne hospodarstwo braniborskeho marketinga (TMB) iniciatiwu łužiskeho zwjazka podpěruje.

Besigheim (SN). W hudźbnym nakładnistwje ENA Liany Bertók je CD „Serbska rapsodija – Sorbische Kammermusik für Violine und Klavier“ wušła.

Nowe wudaće serbskeje komorneje hudźby wobsahuje twórby Bjarnata Krawca, Jurja Winarja, Jana Rawpa a němskeho komponista Huga Raithela. Zestajeli su na zynkonošaku kompozicije, kotrež su lědma hišće znate abo hižo njepřistupne. Nowšej twórbje Jana Thiemanna a Ulricha Pogody wuběr wu­dospołnjetej. Wo mištersku interpretaciju postaraštej so Anett Baumann (wiolina) a Liana Bertók (klawěr).

Nürnberg (dpa/SN). Ličba krótko dźěłacych w Němskej dale woteběra. W septembru běchu předewzaća za 2,22 milionaj ludźi krótkodźěło připowědźili, Zwjazkowa agentura za dźěło w Nürnbergu zdźěla. W awgusće bě jich hišće 2,55 milionow. Na wjeršku prěnjeje žołmy koronapademije w aprylu bě nimale šěsć milionow přistajenych w krótkodźěle było. Wosebje wulki bě a je podźěl krótko dźěłacych w gastronomiji.

Zarjady korony dla přećežene

Berlin (dpa/SN). Dale a wjace strowotniskich zarjadow w Němskej njemóže w tuchwilnej koronapandemiji swoje nadawki přećeženosće dla hižo spjelnić, dokelž su ličby nowych infekcijow dale wysoke. Ně­hdźe 60 z cyłkownje 400 strowotniskich zarjadow su Roberta Kochowemu institutej zdźělili, zo maja wulke ćeže, infekciske rjećazy wuslědźić a kontaktne wosoby zwěsćić. Mjeztym je 17 dalšich strowotniskich zarjadow připowědźiło, zo docpěja drje přichodnje mjezu wukonitosće.

Maas nadźija so pomocy USA

Ze swojimi traktorami su ratarjo wčera w Drježdźanach nutřkowne město w dalokej měrje blokowali. Burja protestuja přećiwo nowym postajenjam nastupajo hnojenje a žadaja sej redukowanje tak mjenowanych čerwjenych pasmow wo 80 procentow. W čerwjenych pasmach je hnojenje wulkeje koncentracije nitrata dla raznje wobmjezowane. Foto: dpa/Sebastian Kahnert

Njemało wustróžiła je so šoferka wosoboweho awta, jako na awtodróze A 2 pola Bielefelda naraz cuza wobruč prědnje wokno jeje awta přerazy a na pódlanskim sedle ležo wosta. 32lětna so njezrani, policija zdźěli. Wona móžeše po zražce awto na nabóčnej čarje wotstajić a zastojnikow wołać. Dotal njewědźa, štó je koleso awta abo připowěšaka zhubił, dokelž je zawinowar dale jěł. Policija pyta za swědkami. Škodu trochuja na 8 000 eurow.

Z hodownymi filmami zabawjeja pinguinow w Londonskim akwariju Sea ­Life. „Je wulkotnje widźeć, kak jara so pinguinam filmy lubja“ rěka w zdźělence akwarija, kiž dyrbi lockdowna koronawirusa dla tuchwilu zawrjeny wostać. Wopytowarjo su zwěrjatam přewšo wažne. Fachowcy su přeswědčeni, zo pinguiny ludźi runje tak intensiwnje a wćipnje wobkedźbuja kaž nawopak.