Aus der aktuellen Ausgabe vom Donnerstag, 04 März 2021

Incidenca bliži so marce 100

Budyšin. Z incidencu 93,66 bliži so Budyski wokrjes zaso marce 100. K tomu přinošowało je wčera zwěsćenych 81 koronanatyknjenjow. Statistika za december wujewja dalšich 27 smjertnych padow, tak zo je cyłkowna ličba w zwisku z koronu zemrětych na 749 rozrostła. Zhorjelski wokrjes rozprawješe wčera wo 38 infekcijach. W jednym padźe dopokazachu britisku mutaciju wirusa. Incidenca tam wučinješe 67,66.

Serbski muster z app

Choćebuz. Delnjoserbske wopisanje a přitřihowy muster za delnjoserbsku bluzu maja zajimcy wotnětka na šmóratku k dispoziciji. Z pomocu digitalneje techniki Augmented Reality móža sej wužiwarjo muster z aplikacije Pattarina zdobom direktnje na płat přenjesć. App wuwiło je Choćebuske startup-předewzaće Pattarina. Zaměr je, zajimcam tradicionalnu wědu lochce spřistupnić.

Pomoc ze Sakskeje přijimali

Serbske dźiwadło NSLDź chce z imageowym filmom dorost wabić

Budyšin (SN/CoR). Poprawom bě wotpohlad, zo so w Němsko-Serbskim ludowym dźiwadle 1. apryla zawěšk skónčnje zaso zběhnje, a to z premjeromaj marionetoweje inscenacije „Das Märchen von der Salzprinzessin“ a z předstajenjom „Čmjeła Hana chce na dowol lećeć“. Hač tomu tak budźe, je pak dwělomne. „Hotujemy so na dźeń x, hdyž směmy zaso hrać. Poprawom z tym njeličimy, zo móžemy do jutrow wočinić. Rjenje by było, hdyž po jutrownych prózdninach skónčnje tak daloko budźe. Na kóždy pad nam hižo nětko přihoty wjele wjesela wobradźeja. Skónčnje zaso to činić móc, čemuž smy powołani – tež hdyž dyrbimy na probach nahubnik wužiwać a na wotstawk kedźbować –, je wulkotne“, zastupjerka intendanta za serbske dźiwadło Madleńka Šołćic rozprawja.

Ze zjawnym listom je so zastupowacy jednaćel Zjednoćenstwa němskich operowych chórow a jewišćowych rejwarjow (VdO) Gerrit-Michael Wedel na direktora Załožby za serbski lud Jana Budarja kaž tež na čłonow załožboweje rady połoženja w Serbskim ludowym ansamblu dla wobroćił.

Pomału wotpinaca so situacija koronu w Sakskej nastupajo je Hornjołužiskim klinikam (OLK) přiležnosć za mjezybilancu. Hač do kónca februara su dohromady 1 040 na koronawirus schorjenych pacientow w Biskopicach a Budyšinje lěkowali.

Budyšin (SN/bn). Mnohich inficěrowanych dyrbjachu intensiwnje hladać, wotpowědne stacije běchu połnje wućežene, kóždeho pacienta mějachu izolować, kaž w zdźělence OLK rěka. „Nachwilnje běchu tři wotrjady w Budyšinje a jedna stacija w Biskopicach kaž tež přidatnje jedna z intensiwneju stacijow w sprjewinym měsće jeničce za kowid-19-pacientow spřihotowane. To woznamjenja, zo smy cyłkownje wjace hač 150 łožow za dołhodobne medicinske zastaranje za nich rezerwowali“, jednaćel OLK Reiner E. Rogowski rozłoži.

Mjeztym zhladuja na woběmaj stejnišćomaj „łahodnje optimistisce do přichoda“. Byrnjež wuskutki „mutěrowanych wariantow wirusa hišće wočaknyć měli“, hotuja so „pomału, ale konsekwentnje na nawrót k normalnemu stawej“ wosebje hladajo na status klinikow jako akutne chorownje.

Wojerecy (SN/at). Serbšćinu měli bóle w zjawnym žiwjenju města Wojerec zakótwjeć, předewšěm tak, zo wuknu dźěći a młodostni rěč w pěstowarnjach a dale wjeducych šulach. To wuzběhnychu tamniši měšćanosta za komunalne posłužby Mirko Pink, předsyda Domowiny Dawid Statnik a za teritorij Wojerowskeje župy přisłušna regionalna rěčnica Sonja Hrjehorjowa po wčerawšim zetkanju we Wojerecach. Kaž wobě stronje informujetej, njewidźi měšćanosta Pink nimo pobrachowaceho personala žane zadźěwki, prjedy abo pozdźišo wučbu serbšćiny w měsće rozšěrić. Tež wjace rěčnych kursow za dorosćenych by wón witał. „Wožiwjenje serbšćiny trjeba rěčne rumy, při tym widźu Domowinu jako dołhodobnu spušćomnu partnerku při praktiskich kročelach.“ Pink namjetowaše, na přikład ze seriju zarjadowanjow pod hesłom „Kak tworimy nowe rěčne rumy?“ za konkretnymi wotmołwami pytać.

Zastupjerjej Domowiny přilubištaj podpěru, so w towarstwach a skupinach wo móžnosćach nowych rěčnych rumow dorozumić. Tam mnozy angažowani rady sobu pomhaja, rjekny Sonja Hrjehorjowa.

Drježdźany (dpa/SN). Sakske knježerstwo je so dźensa rano zetkało, zo by wo nowych postajenjach Zwjazka a krajow korony dla wuradźowało. Poprawom chcychu hižo wčera wo nich rěčeć, ale konferenca w Berlinje so dliješe. Wobzamknjenja chcedźa do nowych sakskich škitnych postajenjow přenjesć. Strategija, na kotruž ludźo čakaja, swobodny stat časowych přičin dla pozdźišo wozjewi. Z wulkimi wolóženjemi pak w Sakskej ličić njetrjebamy. Ličba infekcijow je nadal přewulka.

Frederiksen a Kurz w Israelu

Kopenhagen/Wien (dpa/SN). Awstriska a Danska chcetej hladajo na wjac šćěpiwa pře koronu z Israelom wušo hromadźe dźěłać. Zo bychu kooperaciske móžnosće rozjimać móhli, staj awstriski zwjazkowy kancler Sebastian Kurz a danska ministerska prezidentka Mette Frederiksen dźensa w Israelu, zo byštaj z tamnišim šefom knježerstwa Benjaminom Netanjahuwom rěčałoj. Při tym ma na přikład wo wuspěšnu šćěpjensku kampanju w Israelu hić.

Płaćizny za wolij stupali

Moskwa (dpa/SN). Po nowych sankcijach EU a chłostanskich naprawach USA w padźe zajědojćeneho kritikarja Krjemla Alekseja Nawalneho je sej Ruska znowa dopokazy za atentat žadała. „Je njehańbićiwe“, rjekny rěčnik Krjemla Dmitrij Pjeskow wčera w Moskwje, zo USA twjerdźa, zo je ruska nutřkokrajna tajna słužba Nawalneho zajědojćiła. Washington a Brüssel dyrbjałoj dopokazy za zajědojćenje předpołožić. Wutoru běchu USA a EU sankcije přećiwo Ruskej přesćěhanja a zasudźenja Nawalneho dla wobzamknyli.

Ruska na tym dwěluje, zo je loni 20. awgusta k nadpadej ze zakazanym chemiskim bojowym srědkom nowičok na opozicionalneho dóšło. W štyrjoch laborach, mjez druhim w jednym Zwjazkoweje wobory, běchu nowičok w jeho kreji zwěsćili. Na to bě EU prěnje sankcije wukazała. Po zasudźenju Nawalneho k lětomaj chłostanskeho lěhwa slěduja nětko dalše naprawy přećiwo Ruskej.

Dmitrij Pjeskow mjenowaše postupowanje zapada njeakceptabelne a škódne za dalše poćahi Ruskeje k EU a USA.

Sobudźěłaćerjo koncernow Alstom a Siemens zhromadnje stawkowali

Zhorjelc (SN/BŠe). Wjac hač 400 sobudźěłaćerjow dweju stejnišćow předewzaćow Siemens Energy a Alstom je wčera zhromadnje w Zhorjelcu stawkowało. Centralna tema bě tamnišej zawodaj do přichoda zawěsćić. Ze stawkom chcychu přistajeni ćišć na stronu dźěłodawarjow – woni w aktualnym tarifowym kole metaloweje a elektroindustrije hromadźe wuradźuja – powjetšić, zo měli skónčnje poskitk wozjewić.

Hladajo na stejnišćo Siemens je so wosebje připowědź předewzaća, 150 dźěłowych městnow w Zhorjelcu wotstronić a wukubłanski centrum zawrěć chcyć, wo wulki njeměr postarała. A to runje nětko, hdźež su so zhromadnje ze zwjazkowej politiku na pakt přichoda dojednali.

Sobudźěłaćerjo Alstoma (bywši Bombardier) zhladuja tohorunja do njewěsteho přichoda, dokelž njewědźa, kajke plany mějićel ma. Dźěłarnistwo IG metal žada sej tarifowej zrěčeni, zo móhli inowaciju a inwesticije na stejnišćomaj zaručić. Runje tajkej zrěčeni stej nuznje trěbnej.

Dźěle chódnika pytaja w jendźelskim městačku Storringtonje. Dwanatki chódnikowych platow běchu so přez nóc zhubili. Mjeztym je tamniše měšćanske zarjadnistwo wobkrućiło, zo na padustwo tukaja. Z pomocu nahrawanja wobstražowanskich widejowych kamerow spytaja skućićelow nětko wuslědźić.

Baćony wróća so ze zymskeho přebytka do Braniborskeje. We wjacorych wokrjesach su je hižo wuhladali, byrnjež jenož jednotliwe. Někotre z nich wšak budu nětko samolutke tydźenje na swojich partnerow čakać dyrbjeć. Kaž fachowcy měnja, klimowa změna baćony zamyla a swójbne planowanje wobwliwuje. Přerěznje měješe 1 206 porikow w Braniborskej loni 1,8 młodźatow. Za zachowanje wobstatka baćonow pak stej znajmjeńša dwě młodźeći na hnězdo trěbnej.