Aus der aktuellen Ausgabe vom Dienstag, 08 Juni 2021

Dale woteběraca incidenca

Budyšin. Indicenca w hornjołužiskimaj wokrjesomaj po hódnotach Roberta Kochoweho instituta dale woteběra. RKI mjenuje za Budyski wokrjes dźensa hódnotu 31,4. Tu su wčera wo dźesać natyknjenjach z koronawirusom informowali. Za Zhorjelski wokrjes je RKI dźensa 16,2 podał. Tam wčera žanu dalšu infekciju njemějachu, za to pak tři smjertne pady z časa wot 15. meje do 1. junija.

Namołwa Altmaierej

Budyšin. Budyski krajny rada Michael Harig je zwjazkoweho hospodarskeho ministra Petera Altmaiera (wobaj CDU) namołwjał, zo měł nuzne naprawy přećiwo podróšenju twaršćiznow zawjesć. Za jednu z přičin ma Harig kumštne pomjeńšenje poskitka ze stron producentow. Najebać potrjebu a kapacity su wulke koncerny produkciju wobmjezowali, zo bychu pjenjezy za krótkodźěłacych dóstali, rěka z krajneho zarjada.

Naležnosće Romow polěpšić

Zběhnjenje priority lubi wšitkim imunizaciju – dóstanu-li termin

Drježdźany (SN/bn). Po cyłej Němskej móža so wot wčerawšeho dorosćeni a mło­dostni wot 14 lět bjez kóždehožkuli wobmjezowanja pře koronawirus šćěpić dać. Kónc tak mjenowaneje priorizacije po třoch stopnjach – woprawnjeni běchu dotal mjez druhim „wosebje wohrožene wobydlerske skupiny z wulkim rizikom ćežkeho schorjenja“, kaž na přikład seniorojo abo ludźo z imunostnymi sła­bosćemi kaž tež medicinski a hladanski personal, wučerjo a policisća – je wulki nawal na sakski serwisowy portal sachsen.impfterminvergabe.de wuskutkował. Byrnjež za njón zamołwity Němski čerwjeny křiž (DRK) serwerowe kapacity podwojił, bě strona wčera zdźěla přeće­žena, tak zo njemóžachu so mnozy wu­žiwarjo tam registrować a wo termin prócować. Kaž ze stron DRK rěka, chcedźa problem „hač do druheje połojcy toho­­le tydźenja“ rozrisać. Přiwšěm po­wšitkownowužitna organizacija wo to prosy, „ter­miny dale přez portal knihować spytać“­.

Pjeć dnjow za sobu bě incidenca po Rober­ta Kochowym instituće koronapandemije dla w Budyskim wokrjesu pod 50. Wot jutřišeho płaća tohodla dalše wolóženja.

Budyšin (SN). Wo změnach jako dalšej kročeli k normaliće wšědneho žiwjenja je tudyši krajnoradny zarjad wčera informował:

Nastupajo kontakty su priwatne zetkanja w zjawnym abo priwatnym rumje z hač do dźesać wosobami dowolene. Dźěći hač do zakónčeneho 14. žiwjen­skeho lěta, dospołnje šćěpjeni a wustrowjeni njejsu sobu ličeni.

Šule a dźěćace dnjowe přebywarnje přeńdu wot jutřišeho na normalne dźěło. Měnjaceje wučby w dale wjeducych šulach žaneje wjace njeje, wšitke šulerki a wšitcy šulerjo smědźa zaso zhromadnje w šuli wuknyć. Wotzjewjenje w šuli je trěbne, maja-li dźěći we wuknjenskim času dale doma wostać. W dźěćacych zarjadnišćach njeje striktne dźělenje skupin, wosebje wonka kaž tež w zažnej a pózdnjej słužbje wjace trěbne.

Nimale połojca kandidatkow a kandidatow za wólby Zwjazkoweho předsydstwa Domowiny so prěni raz wo najwyši gremij narodneje organizacije mjez hłownymaj zhromadźiznomaj požada.

Budyšin (SN/at). Za 20. hłownu a wólbnu zhromadźiznu sobotu, 12. junija, w Slepom su župy a towarstwa pod třěchu serbskeje narodneje organizacije 114 delegatkow a delegatow přizjewili. Po kluču, kotryž bě Zwjazkowe předsydstwo Domowiny za lětušu „hłownu“ wobzamknyło, by jich maksimalnje 119 być móhło. Připowědźił je so znowa wysoki wopyt z braniborskim ministerskim pre­zi­dentom Dietmarom Woidku (SPD) a ze sakskej ministerku za kulturu a turizm Barbaru Klepsch (CDU).

Z wuměłstwowym čołmikowanjom su minjenu sobotu aquamediale 14 w Słopišćach (Schlepzig) zahajili. „Wjeselu so, zo je so aquamediale z krutym dźělom Braniborskeho kulturneho lěća stała. Mjeztym 14. błótowski wuměłstwowy festiwal zwjazuje na jónkrótne wašnje načasne wuměłstwo a tradicionalne rjemjesło“, rjekny­ zastupjerka krajneho rady wokrjesa Dubja-Błóta Susanne Rieckhof (nalěwo) na wotewrjenju. Pod hesłom „Hand Werk Kunst“ je aquamediale do 18. septembra zjawnje přistupna, to pak jeno z čołma. Dohromady su twórby jědnaće wuměł­cow z wosom krajow widźeć. Foto: spěchowanske towarstwo aquamediale

Budyšin (SN/JaW). Widejo z wjacorymi wurězkami ze zjawnych online-posedźenjow Serbskeho sejma, kotryž je anonymna „skupina młodych Serbow*kow“ tele dny rozšěrjała, njeje hižo přistupny. Čehodla, njeje znate. Tež pospyty, z cyłkom zwisk nawjazać, běchu bjez wuspěcha.

Widejo je drje rozdźělne reakcije zbudźił, wjetšina pak so wot wuprajenjow čłona Serbskeho sejma dr. Andreasa Klugi, kiž bě chětro negatiwnje wo Domowinje a jeje přistajenych rěčał, distancuja. Na stronje Serbski facebook, hdźež bě wide­jo hač do wčerawšeho přistupny, čita­rjo mjez druhim komentuja: „Hańbujće so!“ a „Štóž tak rěči, chce hidu syć a nas pačić.“ Tež předsyda Domowiny Dawid Statnik je přesłapjeny. „Z tajkej nalež­nosću dotal činić njemějach a sym bjez słowow“, wón žurnalistam praji.

Magdeburg (dpa/SN). Zeleni njejsu w Saksko-Anhaltskej za nowu koaliciju z CDU a SPD k dispoziciji. To je krajne předsydstwo wobzamknyło, zdźěli jeho nawoda Sebastian Striegel. Po jasnym wólbnym dobyću ministerskeho prezidenta Reinera Haseloffa (CDU) matej CDU a SPD wjetšinu w krajnym sejmje, byrnjež jeno z jednym hłosom. Jedna ze štyrjoch móžnych koaliciskich móžnosćow Haseloffa je tuž hižo z blida.

Wotpokazuja reformu renty

Berlin (dpa/SN). Němski zwjazk dźěłarnistwow (DGB) je wot poradźowanskeho gremija zwjazkoweho hospodarskeho ministerstwa předpołožene namjety za reformu zakonskeho rentoweho zawěsćenja wotpokazał. Čłonka předsydstwa DGB Anja Piel rjekny nowinarjam, zo chcyła přirada „renty drastisce skrótšić, socialny stat wotstronić a starobne za­wěsćenje priwatizować, jeno zo by dźěłodawarjow masiwnje podpěrała“. Poradźowarjo běchu mjez druhim namjetowali, rentowu starobu na 68 lět zwyšić.

Přichodnje njebudźe wody dosć

Při zražce dweju ćahow na juhu Pakistana je znajmjeńša 62 ludźi žiwjenje přisadźiło, wjace hač 150 pasažěrow so zrani. Wčera bě w měsće Ghotki wosobowy ćah z kolijow wuskočił a na susodnych kolijach stejo wostał. Krótko na to dalši ćah do njeho ­zrazy. Kolije w Pakistanje pochadźeja zwjetša hišće z kolonialneho časa. Foto: pa/Waleed Saddique

Z mašinskej třělbu w rukomaj zadźeržachu ukrainscy hranicarjo w lěsu dweju kolesowarjow z Düsseldorfa, kotrajž běštaj z Pólskeje do kraja přijěć chcyłoj. Mužej w starobje 21 a 36 lět běštaj po puću do Thailandskeje. Wonaj z toho wuchadźe­štaj, zo je Ukraina čłon EU a zo njetrje­bataj namjezny přechod wužiwać. Při nócnej jězbje po lěsu je wšak na mjezy alarmowa připrawa reagowała. Hač smědźeštaj ­wonaj dale jěć, njeje znate.

Mjaso lubowacy paduch je w posaarskim Homburgu grilowanske twory z awtomata kradnył. Kaž policija w swojej rozprawje pisa, bě njeznaty skućićel škleńcu awtomata rozbił a mjaso a kołbaski w hódnoće 250 eurow spakosćił. Wón pak zawostaji cedlku, na kotrejž je so za swój njeskutk zamołwił.

Berlin (dpa/SN). W zwjazkowej stolicy schadźowaše so wčera parlamentariska přirada Załožby za serbski lud pod nawodom jeje předsydy, zapósłanca CDU w Sakskim krajnym sejmje Marka Šimana. Na wuradźowanju wobdźěli so tež społnomócnjeny zwjazkoweho knježerstwa za naležnosće narodnych mjeńšin a wusydlencow, prof. Bernd Fabritius. Z nim rěčachu čłonojo wo wuměnjenjach, pod kotrymiž móhli so mjeńšiny derje wuwiwać. Dalša tema bě financne zrěčenje załožby. Přirada prošeše zwjazkowe knježerstwo, planowane podpisanje w oficialnym ramiku wotměć. Wšako ma załožba po nowym zrěčenju 25 procentow wjace srědkow k dispoziciji. Čłonojo słyšachu nimo toho dźěłowu rozprawu tohorunja přitomneje předsydki załož­boweje rady Susann Šenkec a direktora Załožby za serbski lud Jana Budarja.