Aus der aktuellen Ausgabe vom Donnerstag, 10 Juni 2021

Incidenca dźeń a snadniša

Budyšin/Zhorjelc. W Budyskim wo­krje­su zličichu hač do wčerawšeho dohromady 18 dalšich infekcijow z korona­wirusom. Z cyłkownje 43 stacionarnje zastaranych 14 pacientow intensiwnje hladaja, dwanaćo su zemrěli. Incidenca je so na 20,3 znižiła. W Zhorjelskim wo­krjesu zwěsćichu štyri nowonatyknjenja a dwaj smjertnej padaj. Dale woteběraca incidenca tam aktualnje 7,5 wučinja.

Kritizuja wólbne procedere

Budyšin. W lisće Domowinje kritizuja někotři jeje čłonojo přećiwki we wu­stawkach towarstwa, předewšěm wólbne procedere delegatow na hłownu zhro­ma­dźi­znu. Woni sej žadaja, předsydstwo njewuwjazać, doniž njejsu přećiwki wujasnjene. Domowina skedźbnja na bazo­demokratiski princip a zo jako zarjad nje­diktuje, kak towarstwa swojich delegatow wola. Jeli so něchtó postorkuje, njech to najpjedy w towarstwje tematizuje.

Wobchad w Hřensku wolóžić

Mak plahować bě w Němskej dołhi čas jenož pod krutymi wobmjezowanjemi móžno a tuž často njerentabelne. Naprašowanje předewšěm pjekarjow za regionalnymi wobstatkami pak je renesansu stareje, tuchwilu krasnje kćějaceje kulturneje rostliny tež na łužiskich polach wuskutkowało, kaž na přikład na našim foće, nastatym w Kósojcach blisko Wětošowa. Foto: Peter Becker

Ludowe nakładnistwo Domowina přihotuje přichodnu zběrku krótkopowědančkow za čitarjow wot 12 lět a wuhotuje w tym zwisku 26. junija dźěłarničku za awtorki/awtorow. Bosćan Nawka je so­ rozmołwjał z Weroniku Žurowej, za projekt zamoł­witej lektorku LND.

Knjeni Žurowa, na koho je dźěłarnička wusměrjena?

W. Žurowa: Wuhotujemy ju přede­wšěm za awtorow, kotřiž su hižo w do­talnych antologijach zastupjeni byli. Wotpowědne přeprošenja smy mjeztym rozesłali. Zdobom pak jedna so wo poskitk zajimcam, kiž chcedźa so na polu lite­rarneho tworjenja wuspytać, abo kotřiž snano hižo pisaja, ale z kajkejež­kuli tež přeco přičiny takrjec zaćichim skutkuja. Za nich smy wosebitej měst­nje rezer­wowali. Přizjewić měli so hač do 20. junija z mejlku na , při čimž nas wězo zajimu­je, što jich motiwuje so na dźěłarničce wob­dźělić.

Je poskitk na wěstu starobu wjazany?

W. Žurowa: Ně, wjeselimy pak so stajnje nad młodymi, njewotkrytymi ta­len­tami. Wobhladujemy dźěłarničku tež ja­ko­ naprawu, serbski literarny dorost spěchować. Tohodla je poskitk darmotny.

Hornjołužiske chorownje so k „normalnemu zastaranju“ nawróćeja

Wojerecy/Budyšin (KD/SN/MiR). Poněčim so situacija wokoło koronapande­mije w Budyskim wokrjesu wotputa. To pytnu předewšěm we wokolnych chorownjach. Wšako ličba koronapacientow dale woteběra.

We Wojerowskim jězorinowym klinikumje su wčera hišće dźesać na covid-19 schorjenych lěkowali. „Sydom z nich leži na intensiwnej staciji“, rjekny tamniši šef­lěkar za anesteziju, inten­siwnu a nuzowu medicinu Heiko Sahre na nowinarskej konferency. „Izolacisku staciju smy zawrěli, wona je přihotowana, dyrbjeli-li ličby infekcijow zaso stupać.“

Kamjenc (BG/SN). Z małej překwapjenku je wčera wječor Kamjenska měšćanska rada swoje wuradźowanje zahajiła. Nadregionalnje znaty swjedźeń Lessingoweho města Boršć tež lětsa wupadnje. Njebudźe žadyn wućah z města na swjedźenišćo, žadyn zaćah k zakónčenju a žane swjećenje na arealu Kamjenskeje Boršće. Tež rjadowniske zetkanja staršich lětnikow w piwowych stanach lětsa žane nje­pře­wjedu. Město toho zarjaduja swjedźenski kónc tydźenja, rěkaše na wčerawšej zhromadźiznje radźićelow ze stron měšćanskeho zarjadnistwa. Kak ma wony swjedźenski kónc tydźenja wupadać, wo tym chcedźa prawje bórze zjawnje wuradźować. Tak je to swjedźenski wuběrk hakle njedawno wobzamknył. Jako přičinu rozsuda zamołwići mjenuja, zo „nochcedźa dypkowny start noweho šulskeho lěta a z nim zwisowace wotewrjenje šulow wohrozyć“.

Pomnik Michała Hórnika we Worklecach wobsteji dźensa 65 lět. Dźěći wobeju rjadow­­njow 4. lětnika Worklečanskeje zakładneje šule pobychu tuž składnostnje róčnicy dźensa rano na kromje wsy do směra na Smječkecy, hdźež pomnik steji. Tam spominachu na sławneho serbskeho patriota, kotrehož mjeno Worklečanska šula wot lěta 1994 nosy. Syman Richter je serbsku baseń přednjesł, Zala Ošikec a Lucija­ Hozec stej zhromadnje na pišćałce hrałoj. K počesćenju wótčinca Michała Hórnika stajichu při pomniku hornc z kwětkami. Na kóncu zaspěwachu wšitcy šulerjo­ zhromadnje serbsku­ hymnu. Foto: Jurij Bjeńš

Budyšin (SN). Rěčny centrum WITAJ je dwě nowej šulskej knize wudał. Wučb­nica „Domizna a swět“ je za šulerjow 6. lětnika na serbskich wyšich šulach. Z njej pokročuja wudaće licency rjadu „Domizna a swět“ nakładnistwa Westermann. Přełožk je znowa Wórša Šołćina přewzała. W rjedźe „Wuknjemy serbsce“ su za serbšćinu jako cuzu rěč wučerske doporučenja za 4. lětnik wušli. Wobě knize­ dóstanjeće w Smolerjec kniharni abo přez online-shop Ludoweho nakładnistwa Domowina.

Berlin (dpa/SN). Dospołne šćěpjenje pře koronu hodźi so přichodnje na šmóratku dopokazać z dobrowólnym digitalnym šćěpjenskim pasom, kotryž chcyše zwjazkowy strowotniski minister Jens Spahn (CDU) dźensa w Berlinje předstajić. Program „CovPass“ měli šćěpjeni jako dopokaz při wolóženych koronawobmjezowanjach wužiwać a w lětnich prózdninach jednorišo po Europje pućować móc.

Wotwažuja skrótšenja

Strasbourg (dpa/SN). W rozestajenju wo pozdatnych konfliktach zajimow čěskeho premiera Andreja Babiša je Europski parlament namjetował, nowy prawniskostatny mechanizm nałožować. We wčera přiwzatej rezoluciji rěka, komisija EU měła tež wliw Babiša na medije a justicu přepytować. Su-li principy prawniskeho stata ranjene, měli mechanizm aktiwizować. W tym padźe by Čěskej hrozyło, zo skrótši jej EU pjenježne připokazanki ze zhromadneho budgeta.

Zwólniwosć z wuměnjenjom

Pućowarjo a krosnowarjo su rozmjerzani, dokelž je zarjadnistwo narodneho parka wěstotnych přičin dla woblubowane pućowanske šćežki w zadnjej Sakskej Šwicy zawrěło. Skórnik bě so tam po šmrěčinje sylnje rozmnožił, tak zo hroža štomy padnyć. Sakski ministerski prezident Michael Kretschmer (CDU, srjedźa) wopyta tuž wčera narodny park, zo by na městnje z čestnym předsydu Sakskeho zwjazka hórskich krosnowarjow Ulrichom Voigtom (naprawo) porěčał. Foto: Steffen Unger

Za hraćom chcyćiwa rjadniska sotra w Kaliforniskej je pječa wjele lět sta­tysacy dolarow zekřiwiła, zo by sej na te wašnje wopyty kazina a dalše priwatne wudawki zaručiła. 79lětnu su nětko płokanja pjenjez a wobšudnistwa dla wobskoržili, kaž statne rěčnistwo w Los Angelesu informowaše. Klóšterska knježna je přiznała, zo bě sej wjace hač 835 000 dolarow do swójskeho zaka tykała.

Runje tak njehańbity kaž spektakularny kriminalny pad w Španiskej dopomina na legendarneho „stotnika z Köpenicka“: Pozdatneho serijoweho wulcečinjaka, kiž je rady spiona hrał, wjacorych ludźi za nós wodźił a so samo z medijowym starom stał, je Madridske krajne sudnistwo dźensa falšowanja dokumentow dla na lěto a dźewjeć měsacow do jastwa pósłało. Je to prěnja pokuta za 27lětneho, kiž pak ma hišće dalše jednanja na šiji.