Aus der aktuellen Ausgabe vom Dienstag, 27 Juli 2021

Incidenca nimale stabilna

Zhorjelc/Budyšin. W Hornjej Łužicy wostawa incidenca dale pod hódnotu pjeć, tež, hdyž je w Zhorjelskim wokrjesu mjeztym po podaću RKI na 1,6 postupiła. Tam su kaž w Budyskim wokrjesu dwě dalšej koronainfekciji zwěsćili. Za Budyšin poda RKI dźensa z 3,3 tróšku nišu inci­dencnu hódnotu.

Wjace ludźi na Hrodźe móžnych

Budyšin. Němsko-Serbske ludowe dźiwadło informuje, zo rozšěrja přihladowarsku kapacitu za inscenaciju „Sherlock Holmes a paski Beatlesow“ na Budyskim hrodźe. Hač do 1. awgusta změja na kóždym předstajenju 135 přidatnych městnow. Dale z NSLDź rěka, zo „małe lětnje dźiwadło“, klankowa hra „Verfitzt und zuge­näht“, na zahrodźe wulkeho domu kónc tydźenja schorjenja dla wupadnje.

Materielne swědstwa zwěsćić

Poskitki dźěćom w katolskich kaž tež ewangelskich wosadach

Chrósćicy/Lejno (hš/SN/JaW). W Radworju su dźensa lětuše nabožne prózdninske dny zahajili. Njewěsteje situacije koronapandemije dla njebě dołho jasne, hač je scyła přewjedu. Skónčnje pak su so zamołwići wosady tola k tomu předrěli, je nětko hač do pjatka přewjesć. Zahajili su dny dźensa rano ze zhromadnej snědanju, štož tež přichodne tři dny tak činja. Za pjatk je zhromadny wulět planowany, rěka k tomu z farskeho zarjada.

Dohromady 6. króć lětsa, ale prěni raz wosobinsce su so wčera čłonojo dźěłoweho kruha „Serbski kulturny turizm Złokomorowsko-Grodkowskeje kónčiny“ w Prožymskim kulturnym domje zetkali. Dźěłowa skupina je dźěl wědomostneho předewzaća „Hódnoćenje imaterielneho kulturneho namrěstwa Delnjeje Łužicy w němsko-serbskim konteksće“(IKN) Serbskeho instituta.

Prožym (SN/CoR). Nimale dwaceći ludźi wobdźěli so na programje, w kotrymž njesteješe jenož wosobinske mjezsobne zeznaće w srjedźišću, ale tež wodźenje po Prožymskim Starym młynje a po Archeotechniskim centrumje Wjelcej. Wobě stejnišći słušatej k dźěłowemu kruhej. „Bě to jara intensiwne zetkanje, snano tróšku přezmužite předewzaće“, rjekny sobudźěłaćer projekta IKN Gregor Schneider.

Choćebuz (SN). Nowa twornja za hla­da­nje ćahow typa ICE w Choćebuzu je prěnje wulke předewzaće, financowane na zakładźe zwjazkoweho zakonja wo skru­ćenju strukturow. Předstejićel Němskeje železnicy (DB) Richard Lutz a předsyda wotrjada DB za infrastruk­turu Ronald Pofalla staj wotpowědne plany dźensa w Choćebuzu předstajiłoj. Wosebitaj hosćej prezentacije běštaj zwjazkowy minister za financy Olaf Scholz a ministerski prezident Braniborskeje Dietmar Woidke (wobaj SPD).

Prěnja lětnja filmowa akademija, wuhotowana z podpěru serbsko-němskeje syće Łužycafilm wot filmoweje kooperatiwy Ost a předewzaća Konturprojekt Filmproduktion, je zakónčena. Něhdźe dwaceći filmowcow je so w tym wobłuku na dźěłarničkach wobdźěliło a tam nastate paski minjenu sobotu zjawnje předstajiło.

Zhorjelc (CSTN/SN). Ćežišća akademije, kotruž su w minjenymaj tydźenjomaj w Zhorjelskej bywšej chłódźerni wotměli, běchu mjez druhim filmowa teorija kaž tež dźěłarničce „Serbska kultura a filmowa scena“ a „‚Görliwood‘ a łužiska filmo­wa scena“. Nimo toho wěnowachu so serbscy, němscy a pólscy wobdźělnicy koncipowanju a zwoprawdźenju paskow w dohromady pjeć žanrach, štož běchu dokumentariski krótkofilm, eksperimentalny film, informaciski film, hrajny krótkofilm a hudźbne widejo.

Lětušu sezonu łapanja kokotow su minjenu sobotu w Barbuce (Bärenbrück) zahajili. Tam je šěsć młodych muži na konju po starodawnym wašnju na wosebitym krosnje wisaceho kokota wottorhnyć spytało. Hłowu honača wottorhnył a sej tuž dobyće zawě­sćił je Elia Bastian. Hač do srjedź septembra chcedźa na 14 dalšich wsach tra­dicionalny žnjowy nałožk Delnich Serbow hajić. Na wjacorych wsach pak so toho njewěsteho połoženja koronapandemije dla lětsa znowa wzdadźa. Přichodne łapanje kokota ­budźe 7. julija w Turjeju. Sezonu zakónča z tak mjenowanym „super­kokotom“ – ­wubědźowanjom wšěch dobyćerjow łapanja –, kotrež wotměja 25. septembra ­w Nowej Niwje. Foto: Jill-Francis Ketlicojc

Berlin (dpa/SN). Kanclerski kandidat SPD Olaf Scholz přilubja w padźe wólbneho dobyća stabilny rentowy niwow. SPD chce to samo garantować, štož CDU ­a CSU w swojim wólbnym programje porno tomu njenaspomnjatej. Olaf Scholz tematiku kołowokoło renty wuraznje wuzběhuje. Wot lěta 2030 změje Zwjazk za zawěsćenje rentoweho niwowa wjac wudawkow. SPD ma hižo konkretny plan, kak chcyła je wurunać. „Stabilna renta je móžna – wšo druhe je na zajimy wusměrjena ideologija“, Scholz měni.

Měli so korony dla bórze zetkać

Berlin (dpa/SN). Berlinski knježacy měšćanosta Michael Müller (SPD) wupraja so za zetkanje ministerskich prezidentow ze zwjazkowej kanclerku Angelu Merkel (CDU) w běhu přichodneju tydźenjow. Tuchwilny předsyda konferency ministerskich prezidentow starosći so přiběraceje ličby infekcijow z koronawirusom w zwisku z nawróćacymi so dowolnikami. „Dyrbimy spěšnje jednać“, Müller dźensa w Berlinje potwjerdźi. Tež braniborski premier Dietmar Woidke (SPD) sej tajke zetkanje z kanclerku žada.

Liča z hišće wjace eksportami

Folklorna unija Słowakskeje wuwoła wčerawšu póndźelu jako dźeń narodneho žarowanja za cyłu swójbu interpretow a přiwisnikow folklorneho tworjenja rozžohnowanja z Jurajom Kubánku dla. Jeho žiwjenje a skutkowanje su w jimacej žarowanskej swjatočnosći w Słowakskim narodnym dźiwadle w Bratislavje hódnoćili. Zasłužbny wuměłc a choreograf bě 19. julija 92lětny zemrěł. Poslednju česć wopokazachu jemu ze serbskeje strony Kornel Kolembus (nalěwo), zastupjerjo Serbskeho folklorneho ansambla Wudwor, komponist Jan Cyž a Tobias Rucha (naprawo) z SLA, kiž je so do kondolencneje knihi zapisał. Maćij Bulank

Wosebitu narodninsku lekciju „dyrbješe“ nowoseelandska ministerska prezidentka Jacinda Ardern nazhonić. Na prašenje šulerjow za swojej starobu je wona jich hódać dała. Město 41 lět pak mějachu ju za 62lětnu. Kaž Ardern nětko na Facebooku z posměwkom piše, wona nikomu njeradźi swoju starobu trochować dać. Mnozy wužiwarjo sej jeje humor chwala.

Prawdźepodobny třělc bu w Texasu sam wopor. Z třělbu wobrónjeny muž bě so póndźelu w nocy na swjedźenju z druhimi zwadźił a znajmjeńša jednoho natřělił. Na to kamjenje na njeho mjetachu. Při tym wón znowa třěli a jednoho z přesćěhanych smjertnje trjechi. Tež wón ­zranjenjam podleža. Policija warnuje, zo njeměli amaterojo wobrónjenych přesćěhać, ale to policiji přewostajić.

Pomhaja powětrowe filtry na šulach škit před koronu powjetšić? Tójšto je so wo tym hižo diskutowało. Po nowšim poručenju wobswětoweho zwjazkoweho zarjada móža tajke nastroje znajmjeńša w špatnje přewětrjenych rumnosćach wunošne być. Wšohojenski srědk pak wone njejsu, měni minister.

Drježdźany (dpa/SN). Powětrowe filtry w rjadowniskich stwach njejsu po měnjenju sakskeho kultusoweho ministra Christiana Piwarza na kóždy pad trěbne. Z widom na nowe šulske lěto pak chce wón jich zasadźenje pruwować. „Wšohojenski srědk, kaž bychu to někotři rady chcyli, wone njejsu“, rjekny politikar CDU powěsćerni dpa a zaborzdźi tak přewulke wočakowanja. Nimo toho warnowaše před inwesticijemi milionow eurow, kotrež hodźeli so na hinašim městnje zmysłapołnišo zasadźić. „Smy přeco prajili, zo je jednore přewětrjenje rjadowniskich rumnosćow wo tójšto efektiwniše hač wužiwanje tajkich nastrojow.“