Aus der aktuellen Ausgabe vom Mittwoch, 13 Oktober 2021

190 infekcijow w Hornjej Łužicy

Budyšin. W Hornjej Łužicy natyk­njenja z koronawirusom zaso chětro přiběraja. Budyski wokrjes informowaše wčera wo 120 w běhu 24 hodźin, Zhorjelski wo 70. Ličbje wotbłyšćujetej so zdobom w incidency, kotruž Roberta Kochowy institut dźensa podawa. Wona je we wokrjesu Budyšin 105 a we wokrjesu Zhorjelc 95,4.

Chcedźa wotnožki institucijow

Wojerecy. Nowe předsydstwo župy „Handrij Zejler“ je so wčera we Wojerecach skonstituowało. Županka Gabriela Linakowa a župan Marcel Brauman staj gremij wo konkretnym stawje jednanjow z městom wo kooperaciji při projektach we wobłuku změny strukturow informowałoj. Župne předsydstwo wočakuje, zo wšitke serbske institucije z hłownym sydłom w Budyšinje přichodnje tež wotnožku we Wojerecach wudźeržuja.

Přećiwo šćežce po wjerškach

Nastupajo spěšny internet Budyski wokrjes nětko w lize gigabitow

Njeswačidło (SN/at). Směrodajne předewzaće Budyskeho wokrjesa su po połtřeća lěće wčera w Njeswačidle wotzamknyli. Hromadźe ze zwjazkowym ministrom za wobchad a digitalnu infrastrukturu Andreasom Scheuerom (CSU) zakónčichu sakski ministerski prezident Micheal Kretschmer, Budyski krajny rada Michael Harig (wobaj CDU), za wulkoprojekt zamołwita přirjadnica krajneho rady Birgit Weber (njestronjanka) kaž tež społnomócnjeny předsydstwa Telekom za šěrokopasmowu kooperaciju w Němskej dr. Dido Blankenburg projekt, kotryž ­maja nastupajo wutwar ze škleńčnoni­ćowym kablom za tuchwilu najwjetši ­Europy.

Wotnětka maja ludźo koronatesty płaćić.­ Wuwzaća postaja testowanski porjad Zwjazka, kotryž je wčera płaćiwosće nabył. Što Serbja wo tym mysla?

Kira Hrjehorjec z Noweje Wjeski: Zo njejsu koronowe testy wjace darmotne, je w porjadku. Wšako móže so kóždy šćěpić dać. Nimo toho je logiske, zo dyrbja testy jednotliwe wosoby płaćić, kotrež je trjebaja, a zo njewotćahnu kóšty za nje město toho wot dawkow cyłkowneje ludnosće.

Bogusz Bujnowski z UIma: Myslu sej, zo je w porjadku, hdyž ma nětko jednotliwc kóšty za testy přewzać. Při tym pak mam za wažne so tež zawěsćić, zo jenož ći płaća, kotřiž to woprawdźe tež zamóža. Dale měli na to dźiwać, zo potrjecheni jenož test zapłaća a nic ludźi, kotřiž je přewjedu. W normalnym padźe test sam štyri do pjeć eurow płaći. Za ludźi, kotřiž maja na přikład wjac hač 2 000 eurow kónc měsaca w kapsy, je to akceptabelne. Hdyž pak tajki test za dźěło trjebaš, dyrbi so na kóždy pad dźěłodawar wo to starać.

Budyski Serbski ludowy ansambl njeje na dźiwadłowych wikach „Inthega“ w Bielefeldźe jeno za sebje a za swoje programy wabił, ale tež za Serbow a łužiski region. Kaž medijowy rěčnik SLA Stefan Cuška na naprašowanje zdźěli, su ansamblowcy wopytowarjow wikow „předewšěm hladajo na klětušu 70. róčnicu załoženja SLA ­jako kulturny pósłanc wo Serbach a Łužicy informowali. Wothłós na serbske po­skitki bě jara dobry.“ Jednaćelka Diana Wagnerec, sobudźěłaćerka Choćebuskeje wotnožki SLA Jana Krygarjowa a disponent Mario Spanninger su ansambl na ­wikach zastupowali. Foto: SLA/Stefan Cuška

Chrósćicy (SN/JBo). Dołho je hudźbna skupina Holaski, kotrejž přisłušeja Donatec bratřa Józef, Michał, Bosćan a Tadej z Chrósćic kaž tež Kito Mark z Noweho Łusča, za logom pytała. Nětko su so za jedne rozsudźili.

Na zjawne wupisanje, zdźěłać tajke logo­ za skupinu, je hudźbny cyłk tójšto wothłosa žnjał a cyłkownje 21 naćiskow dóstał. Rozsudźili su so skónčnje za ideju Lucije Škodźineje z Wotrowa. Při tym bě ru­nje jednorosć loga čłonow skupiny přeswědčiła. „Zwjeseliła je nas kreatiwna ideja wo zapřijeću pjeć wosmičkowych notow, kotrež přez wěste wjazby zdobom tež na wosebitosć pokazuja, zo su w našej kapale štyrjo bratřa“, 23lětny Józef Donat­ na naprašowanje Serbskich Nowin wuswětla. Wužiwane indiwidualne pismo město standardneho kompjute­roweho pisma bě dalši faktor, rěčacy za namjet Wotrowčanki.

Budyšin (SN/bn). Po Serbskim instituće (Serbske Nowiny rozprawjachu) je so ­wčera tež třěšny zwjazk serbskich towarstwow Domowina oficialnje přećiwo planowanemu nowopostajenju pomnika bywšeho kanclera Němskeho reicha Otta von Bismarcka při Čornobóskej bawdźe wuprajił. W zjawnym stejišću Domowiny k tomu rěka: „Rozsud hłowneho wuběrka měšćanskeje rady Budyšin wobžarujemy. Bismarck so na Čornobóh wróći – kajki je to signal w dobje zjednoćeneje Europy? Najebać wšitke napjatosće wšědny dźeń su so europske ludy ze zmyslenjom Bismarcka, zo je wójna dźěl politiki, bohudźak rozžohnowali. Tohodla nochcemy Bismarcka ani hižo darjeneho měć. Mamy z měrliwej rewoluciju a přewrótom 1989/1990 mjeztym lěpši zakład za ‚jednotu Němskeje‘. Chcemy-li nowe pomniki stajeć, potom prošu wosobinam, kotrež so za runohódne wobchadźenje z ludźimi wšelakeho pochada zasadźeja – Bismarck pak běše njepřećel čłowjeskich prawow, kaž su wone mjeztym z měritkom za towaršnosć.

Schwerin (dpa/SN). Połtřeća tydźenja po wólbach krajneho sejma w Mecklenburgsko-Předpomorskej je dobyćerka Manuela Schwesig (SPD) sonděrowanske rozmołwy wotzamknyła. Dźensa wječor planuje předsydstwo SPD posedźenje, hdźež chce ministerska prezidentka a krajna předsydka strony wuslědki sonděrowanja předstajić. Wozjewić wona tež chce, z kim koaliciske jednanja zahaja. Móžna je koalicija z CDU a Lěwicu. Tež ze Zelenymi a FDP je Schwesig rěčała.

Wopominaja zasadźenje

Berlin (dpa/SN). Němski zwjazkowy sejm a knježerstwo wopominatej dźensa zasadźenje Zwjazkoweje wobory w Afghanistanje. Popołdnju chcychu za 59 muži wěnc połožić, kotřiž su w Afghanistanje žiwjenje přisadźili. Na paradnym naměsće zwjazkoweho zakitowanskeho ministerstwa je centralny kónčny apel předwidźany, na kotryž wočakuja zwjazkoweho prezidenta Franka-Waltera Steinmeiera a kanclerku Angelu Merkel (CDU).

Hladanski wobłuk polěpšić

Choćebuski wyši měšćanosta Holger Kelch (CDU) wužiwaše wčerawšu nowinarsku rozmołwu za to, wuswětlić, čehodla njebudźe za najwyše zastojnstwo města znowa kandidować. Wosebje strowotniskich přičin dla so wón wróćo sćehnje. A Choćebuz trjeba hladajo na přichod w zwisku ze strukturnej změnu ludźi, kotřiž su 50 do 60 hodźin wob tydźeń z cyłej mocu zasadźomni. ­Oficialnje kónči so hamtska doba 54lětneho klětu 30. nowembra. Foto: Michael Helbig

Hač drje su so lamy a alpaki do starownje w Rudolstadće zadobyli?, drje so někotryžkuli prašeše, kiž bě minjeny štwórtk blisko tamnišeje starownje. Město łoža spytachu hladarjo šěsć tajkich skoćatow do lifta dóstać. Jich cil bě štwórta etaža domu, hdźež su přede­wšěm dementni a na łožo sputani zaměstnjeni. Lamy drje so spjećowachu z liftom sobu jěć. ­Alpaki pak móžachu so tak wo wotměnu ­postarać, štož je so jim tež ­widźomnje lubiło. A tak nóžkowachu Hector, Hardes, Pepe a Oskar po chódbach a wćipnje do jstwow hladachu. ­Lamy a alpaki wšak mjeztym často za pućowanja a najwšelakoriše terapije zasadźeja, štož je po hladarjach skotu jeno z wjelelětnym treningom móžno.

Berlin (dpa/SN). Nimale kóždy dźesaty na intensiwnej staciji na koronawirus lěkowany pacient wot awgusta do septembra bě dospołnje šćěpjeny. To wuchadźa z wotmołwy na naprašowanje zapósłanče frakcije Lěwicy w zwjazkowym sejmje Sahry Wagenknecht. Kaž strowotniski minister Jens Spahn hižo spočatk septembra zdźěli, pak je 90 procentow pacientow na intensiwnych stacijach nješćěpjenych. Jeho ministerstwo skedźbnja na tydźensku rozprawu Roberta Kochoweho instituta (RKI), w kotrejž su tež pady wozjewjene, hdźež su ludźo najebać šćěpjenje pře wirus na koronu schorjeli.