Aus der aktuellen Ausgabe vom Dienstag, 11 Januar 2022

Genf (dpa/SN). Zastupowacy wonkowny minister Ruskeje Sergej Rjabkow je jednanja ze zastupnikami USA nastupajo konflikt na Ukrainje profesionalne mjenował. „Rozmołwy běchu wobćežne, ale jara profesionalne, hłuboko sahace a konkretne“, rjekny Rjabkow po něhdźe wosom hodźin trajacych jednanjach wčera wječor na nowinarskej konferency w Genfje, kotruž je statna agentura Tass originalnje wusyłała. W rozmołwach bě Ruska ameriskej stronje potwjerdźiła, zo žadyn wojerski nadpad na Ukrainu njeplanuje. Zdobom pak wot NATO wočakuje, zo so dale na wuchod njerozšěri.

Zwjazk zastojnikow žada sej modernizaciju zjawneje słužby w Němskej

Berlin (dpa/SN). Zwjazk zastojnikow Němskeje (dbb) wobswědča Zwjazkej a zwjaz­kowym krajam zahubne wuswědčenje nastupajo krizowy management w koronapandemiji. Ludźo buchu ze „so spřećiwjacymi a bjezzmysłowymi naprawami zawjerćani“, rjekny předsyda dbb Ulrich Silberbach wčera na lětnym zjězdźe w Berlinje. Při tym nasta po jeho słowach zaćišć, „zo su w tutym kraju kóžde dźěćace narodniny lěpje organizowane hač statny krizowy management“.

Silberbach politice wumjetuje, zo so w swojim dźěle wotpohladnje dliji a zo so za „čorne nule“ hori. Tohodla su lěta dołho zapasli, zarjadnistwa na krizy přihotować. Tak so tež nichtó dźiwać njesmě, „hdyž ma Marokko šćěpjenje lěpje w horšći hač my“.

Zo maja Zeleni w nowym zwjazkowym knježerstwje naročne plany nastupajo škit klimy, nikoho njepřekwapja. A zo jim tuchwilna „energijowa změna“ přepomału dźe, tež ničo nowe njeje. Nětko chce zeleny minister za škit klimy Habeck z połnej paru startować a wěc skónčnje zrjadować. Štož mi w debaće pobrachuje – je wěcownosć. Podźěl wobnowjomnych energijow ma so w běhu přichodnych dźesać lět na 80 procentow podwojić. Jeničce z wětrnikami a ze solarom to njepóńdźe. W tych dźesać lětach chcedźa tež ličbu elektro­awtow na našich dróhach na 15 milionow powjetšić. To je 50 króć wjace hač dźensa. Samsny čas wotpinjemy atomowe a brunicowe milinarnje, kotrež nas dotal spušćomnje zastaruja. To sym wćipny, kak maja ludźo potom baterije swojich elektroawtow nabiwać, hdyž wětřik njeduje a w nocy słónco njeswěći. Ludźo njebudu tež přihladować, hdyž na kóždym róžku nowe wětrniki nastajeja. Zelena euforija nam njepomha. Marko Wjeńka

Delnja Hórka (UM/SN). Tež druhe koło tarifowych jednanjow za stejnišćo předewzaća Bofrost w Malešanskej gmejnje je so bjez wuslědka zakónčiło. Po informacijach posłužboweho dźěłarnistwa ver.di njeje ze stron dźěłodawarja poskitk předležał. Ver.di žada sej připóznaće płaćiwych tarifowych zrěčenjow za wulko- a wonkowne wikowanje Sewjerorynsko-Westfalskeje tež na sakskich stejnišćach zwoprawdźić. Nimo stejnišća Malešanskeho wjesneho dźěla Delnja Hórka stej tež zawodaj w Delitzschu a rudnohórskim Adorf­je potrjechenej. Šoferojo, kotřiž produkty Bofrost hnydom z awta předawaja, zasłužeja w Sakskej wob měsac něhdźe 400 eurow mjenje hač kolegojo na zapadźe Němskeje, kaž dźěłarnistwo informuje.

Praha (dpa/SN). Tysacy ludźi su minjeny kónc tydźenja w Čěskej přećiwo naprawam w zwisku z koronawirusom demonstrowali. W Praze je předwčerawšim njedźelu něhdźe 4 000 wobdźělnikow winowatostne šćěpjenje pře koronawirus wotpokazało. Na transparentach stejachu hesła kaž „Njejsmy zwólniwi k eksperimentam“ abo „Chcemy dialog“. Hižo sobotu bě so něhdźe 2 000 ludźi w druhim najwjetšim měsće Brnje k protest­nemu zarjadowanju zhromadźiło.

Bywše knježerstwo ministerskeho pre­ziden­ta Andreja Babiša bě winowatostne šćěpjenje přećiwo koronawirusej za wšitkich wobydlerjow nad 60 lětami a za wšelake powołanske skupiny wobzamknyło. Zakoń ma wot měrca płaćić. Nowe liberalno-konserwatiwne knježerstwo pod ministerskim prezidentom Petrom Fialu njeje hišće rozsudźiło, hač zakoń přesadźi abo hač winowatostne šćěpjenje zaso wotstroni. W Čěskej su po in­formacijach strowotniskeho zarjada Europ­skeje unije 62,4 procenty wšeho woby­dlerstwa dospołnje pře koronu šćěpjene. To je mjenje hač w přerězku EU. Incidenca natyknjenjow wučinja 431.

Zetkanje oldtimerow lětsa jako turu po wšelakich gmejnach přewjedli

Hora (FR/SN). Trubjenje bě daloko słyšeć, jako nastaji so z Hory blisko Noweje Jaseńcy dołha kolona wozydłow do směra na Bóšicy. Přećeljo a lubowarjo oldtimerow, předewšěm tajkich, kotrež su trěbne za dźěło w ratarstwje, w lěsach abo na dróhach, su so předwčerawšim sedmy króć zetkali. Organizowało bě zarjadowanje wospjet Horjanske towarstwo přećelow wlečakow. Porno dotalnym zetkanjam pak njemóžachu sej zajimcy jězdźidła wobhladać na ležownosći, na kromje wsy, kaž je to hewak z wašnjom. Korona bě sej žadała wo tym rozmyslować, hač bě scyła móžno přewjesć zarjadowanje, kotrež je tradicionalnje kóždu druhu njedźelu januara. Tuž zrodźichu entuziasća wokoło Roberta Ryćerja ideju, jěć z twarskimi mašinami, traktorami, wlečakami (Schlepper), awtami a dalšimi wozydłami do blišeje wokoliny. Wola, swoje jězdźidła prezentować a z nimi po pu­ću być, bě wjetša hač wobmyslenja.

Dotal bě za přihłosowarjow płaćiwych koronowych postajenjow ćežko swoje měnjenje w zjawnosći zwuraznić, bjez toho zo bychu z wonymi postajenjemi do konflikta přišli. W Kamjencu su nětko­ wupuć namakali.

Kamjenc (UM/SN). Je sobotu dopołdnja před Kamjenskej radnicu. Jenož hdys a hdys raz něchtó přez torhošćo dźe. Z Hasy Rosy Luxemburg bliži so horstka ludźi, w rynku jedyn po druhim z nahubnikom a ze stólcom w ruce. Napřećo radnicy so woni sydnu, tak zo nastanjetej połkruhaj z wotstawkom dźesać metrow.

Runja njeličomnym druhim wosadam běchu hwězdni spěwarjo minjene dny tež w Kulowje ducy. Předrasćeni jako třo kralojo a z hwězdu kaž tež z přewodźerjemi ćehnjechu woni dom wot domu a přejachu wobydlerjam žohnowanje za nowe lěto. Při tym wuprosychu sej darik za dźěći na swěće, kotrymž so tak derje njeńdźe kaž pola nas. Lětuša akcija hwězdnych spěwarjow wěnuje so strowotniskemu zastaranju dźěći w Africe. Jeničce w Kulowje bě minjeny kónc tydźenja 13 skupin dźěći po puću. Dohromady je so tam na hwězdnym spěwanju něhdźe sto holcow a hólcow wob­dźěliło. Foto: Gernot Menzel

Awće do so zrazyłoj

Horni Wujězd. Ćežke wobchadne nje­zbožo sta so wčera krótko po 17 hodź. na statnej dróze S 101 mjez Hornim Wujězdom a wotbóčku do Jědlicy. Wodźerka wosoboweho awta typa Seat je tam w křiwicy kontrolu nad swojim jězdźi­dłom zhubiła a frontalnje do napřećo přijěduceho Hondy zrazyła. Zražka bě tak mócna, zo so motor jednoho awta roztorha. Wobě wodźerce so při tym ćežko zraništej, tak zo dyrbjachu jej do chorownje dowjezć.

Budyšin. K podpěrje šćěpjenskich poskitkow w ambulantnym wobłuku wobsteji wot 14. januara móžnosć, dźěći a młodostnych w klinice za dźěćacu a młodźinsku medicinu Budyskeje chorownje přećiwo koronawirusej šćěpić dać. Za to maja zajimcy na kóždy pad termin dojednać. Poskitk měri so předewšěm ­na dźěći a młodostnych z chroniskimi schorjenjemi, za kotrež wosebite šćěpjenske poručenje wobstaji. Tež za wšitkich druhich je poskitk wuraznje wo­te­wrjeny. Dalše informacije wo šćěpjenju a wo dojednanju termina nadeńdu zajimcy na internetnych stronach chorownje pod adresu .