Waršawa (dpa/SN). Zastupowacy ministerski prezident Pólskeje Jarosław Kaczyński wotpokazuje rozprawy, po kotrychž je jeho knježerstwo israelsku wuskušowansku software Pegasus přećiwo opoziciji zasadźiło. By špatne było, njeby-li pólska tajna słužba tajki srědk wuskušowanja měła, rjekny Kaczyński w rozmołwje z nowinarjemi. „Móžu pak jenož potwjerdźić: Powědanja opozicije, zo smy Pegasus za politiske zaměry zasadźili, su dospołny njezmysł.“
Praha. W Čěskej je incidencna hódnota ze 7 336 dalšimi natyknjenjemi na 420 woteběrała, to je 2 000 pozitiwnych padow mjenje hač tydźeń do toho. Wjace hač połojca nowoinfekcijow pak zwisuje z wariantu koronawirusa omikron. Fachowcy liča tuž w přichodnych tydźenjach z nowej žołmu wšědnje hač do 50 000 natyknjenjow.
Julian Nyča z Prěčec přispomnja slědowace ke komentarej „Mój wid“ w našim wječorniku ze 7. januara:
Zo su politiske komentary w Serbskich Nowinach nastupajo rusku wonkownu politiku do wulkeje měry jednostronske, na to sym so mjeztym zwučił. Wočiwidnje njeńdźe dawno hižo wo diferencowany wid na zapadne postupowanje abo na podawki w Ukrainje, ale ruskeho prezidenta mjeztym wotewrjenje chwalimy – a jeničce jeho. Njech je, kaž je, dyrbjeli pak při faktach wostać.
Zo maja w komunach měšćanske a gmejnske rady, je powšitkownje znate. Zo pak maja we Wojerecach dosć aktiwnu młodźinsku měšćansku radu, je wosebitosć nimale cyłeho wokrjesa.
Wojerecy (SN/MWj). Z młodźinskim angažementnym mytom su tele dny młodźinsku měšćansku radu města Wojerec wuznamjenili. Myto spožčiła je pjeć wosobow wopřijaca młodźinska jury, kotraž bě myto hromadźe ze syću za dźěćace a młodźinske dźěło do žiwjenja zwołała.
Loni móžachu so angažowane młodźinske skupiny a organizacije wo myto požadać, štož su z wida Christopha Sempera z mjenowaneje syće „derje wužiwali“. Ze 14 zapodatych próstwow wuzwoli młodźinska jury sydom dobyćerjow. Dźěło Wojerowskeje młodźinskeje měšćanskeje rady je jurorow najbóle přeswědčiło. Tónle gremij zastupuje młodych ludźi w měsće, žada sej prawo soburěčenja a zasadźa so za politiske zarjadowanja a akcije na dobro wobydlerjow.
Budyšin (SN/MWj). Nimale dwaj měsacaj dyrbjachu lubowarjo kinowych předstajenjow na tónle wokomik čakać. Tehdy stupaceje incidencneje hódnoty dla je sakske statne knježerstwo srjedź nowembra tak mjenowany kulturny lockdown wobzamknyło. Nětko smě tež Budyske kino wot zajutřišeho, 14. januara, zaso wočinić, na čož so sobudźěłaćerjo z połnej paru přihotuja.
„Njemóžemy wšitke skomdźene filmy w Budyšinje nachwatać. Přiwšěm je naš angažowany team wotměnjawy program zestajił“, zdźěli nawoda Budyskeho kina Andreas Schneider. K wjerškam prěnjeho tydźenja słušeja nimo produkcijow „Spider-Man – No Way Home“ a „The King’s Man: The Beginning“ tež swójbne, kaž „Encanto“ a „Lauras Stern“. Dołho wočakowane pokročowanje rjadu „Matrix“ steji z „Matrix Resurrections“ tohorunja na hrajnym planje. „Sing 2“ drje startuje 20. januara. Tónle pask pak pokazaja w Budyskim kinje jako předpremjeru hižo njedźelu, 16. januara, w 14.30 hodź. Je to perfektne předstajenje za cyłu swójbu. A to najlěpše je, zo dorosćeni, kotřiž dźěćo přewodźeja, tohorunja jeno dźěćacy zastupny lisćik zapłaća.
Slepo (AK/SN). W procesu strukturneje změny chce gmejna Slepo wažne słowčko sobu rěčeć a swoje zajimy zastupować. To podšmórny wjesnjanosta Jörg Funda (CDU) na wčerawšim posedźenju tamnišeje gmejnskeje rady. W lisće wón noweho społnomócnjeneho zwjazkoweho knježerstwa za wuchodne zwjazkowe kraje Carstena Schneidera (SPD) přeproša, wot hórnistwa potrjechene regiony Łužicy wopytać a sej swójski wobraz wo połoženju na městnje tworić.
Wjelelětny bywši gmejnski radźićel Bernd Juskowiak we wobłuku wobydlerskich naprašowanjow napominaše łužiskich zapósłancow zwjazkoweho sejma sylnišo sobu zapřijeć, zo by Slepjanski region w procesu strukturneje změny słyšeć był. „Puć pohórškow dyrbi wotdeleka horje skutkować“, Juskowiak zwurazni. „Dyrbimy zmužići wostać.“