Ryćer dale na čole
Bóšicy. Stanij Ryćer wostanje Bóščanski wjesnjanosta. 282 wobydlerjow, kotřiž su wolili, hłosowaše za njeho, štož wučinja 92,5 procentow. Wólbne wobdźělenje bě z 49,9 procentami snadne – 315 ze 631 wólbokmanych je woliło –, dźesać hłosow bě njepłaćiwych. Na lisćikach běchu wolerjo štyrjoch dalšich kandidatow namjetowali, mjez druhim Měrćina Šołtu z Noweje Jaseńcy, kiž dósta 15 hłosow.
Incidenca snadnje přiběra
Budyšin. Incidenca snadnje přiběra. Roberta Kochowy institut je dźensa za Budyski wokrjes hódnotu 209,4 a za Zhorjelski 212,7 podał. Minjeny pjatk informowachu w Budyskim wokrjesu wo 108 dalšich infekcijach z koronawirusom a wo 13 smjertnych padach. We wokrjesu Zhorjelc zličichu samsny dźeń 67 natyknjenjow. Ličba w zwisku z koronu zemrětych je tam wo dwanaće rozrostła.
LernSax nětko tež serbsce
Budyšin/Wojerecy (SN/bn/CoR). Po wolóženju naprawow hygieny k zamjezowanju koronapandemije přez knježerstwo Sakskeje (Serbske Nowiny rozprawjachu) je kónc tydźenja kulturne žiwjenje w swobodnym staće znowa zaběžało. Filmowy palast Budyšin je něhdźe dźesać tydźenjow trajacu předstajensku přestawku z dohromady jědnaće mjezynarodnymi produkcijemi zakónčił. „Cyłkownje smy z kóncom tydźenja přewšo spokojom“, zjima sobudźěłaćer kina Christian Hoyer. Wosebje požadane běchu „wězo cyle nowe paski, kaž na přikład ‚Matrix Resurrections‘. Tež produkcije kaž ‚House of Gucci‘, kotrež běchu druhdźe hižo běželi, chcychu mnozy zajimcy rady na wulkej płachće widźeć.“ Jako najwjetši publikumowy magnet pak wukopa so předpremjera noweho Disney-filma „Sing 2“. Wčera dyrbjachu za nju w Budyšinje přidatnu žurlu wote-wrěć, dokelž bě naprašowanje tak wulke.
Budyšin (pdź/SN). Towarstwo Serbska murja přewjedźe wot 1. februara cyłolětne kwisowe wubědźowanje. Wo tym informuja młodostni w socialnych syćach. Přewjesć chcedźa swoju akciju na instagramje. „Krótko po hodźoch smy w Jasčan ‚Bjesadźe‘ hłownu zhromadźiznu přewjedli a smy wo projektach za lěto 2022 rozmyslowali“, praji městopředsydka towarstwa Kira Hrjehorjec. „Dokelž tuchwilu zmysła nima swjedźenje abo spěwne wječory dołhodobnje planować – předpisy korony dla dźě so wobstajnje měnjeja –, chcemy přez cyłe lěto online-wubědźowanje na zakładźe našeje aplikacije QuizSerb zarjadować. Tak njejsmy na hygienowe postajenja wjazani.“ 21lětna studentka mediciny so wjeseli, zo zamó z dalšimi čłonami Serbskeje murje hišće loni samsny wječor koncept za projekt wuwić.
Slědźenje za proweniencu, to rěka prašenje za pochadom objektow w muzejach, je tež tema w Sakskej. Z direktorku etnologiskich muzejow w Lipsku, Drježdźanach a Ochranowje Léontine Meijer-van Mensch je so kulturnopolitiska rěčnica sakskeje frakcije Zelenych dr. Claudia Maicher na njedawnym zjawnym digitalnym zarjadowanju rozmołwjała.
Berlin (dpa/SN). Zwjazkowy kancler Olaf Scholz (SPD) je so dźensa na prěnju wukrajnu jězbu lěta do Španiskeje podał. W Madridźe wočakowaše jeho ministerski prezident Pedro Sánchez, z kotrymž chcyše wo boju přećiwo koronapandemiji rěčeć. Španiska je po Francoskej, Pólskej a Italskej štwórty kraj, kotryž Scholz po nastupje zastojnstwa jako němski zwjazkowy kancler wopyta. Nimo toho bě so wón w decembru w Brüsselu Europskej uniji a NATO předstajił.
Baerbock na Ukrainje
Kijew (dpa/SN). Wonkowna ministerka Annalena Baerbock je so dźensa k zahajenju swojeho nastupneho wopyta na Ukrainje w Kijewje ze zastupnikami tamnišeje wobkedźbowanskeje misije organizacije za wěstotu a zhromadne dźěło w Europje zetkała. Po tym chcyše politikarka Zelenych pomnik za „Njebjesku stotku“ na Majdanje wopytać. Tam wopominaja mortwych proeuropskeje rewolucije lěta 2014. W běhu dnja wočakowaštaj ju wonkowny minister Dmytro Kuleba a prezident Wolodimir Zelenskij.
Socialna njesprawnosć přiběra
Jednotliwu stronu comicoweho zešiwka su w USA za wjace hač tři miliony dolarow přesadźowali. Originalna rysowanka strony 25 wuměłca Mikea Zecka z lěta 1984 wušłeho comica „Secret Wars No. 8“ je 3,4 miliony dolarow (něhdźe tři miliony eurow) wunjesła, kaž awkciski dom Heritage Auctions w texaskim Dallasu zdźěli. Je to najdróša hdy přesadźowana strona comicoweho zešiwka.
Najebać koronapandemiju su so statysacy indiskich wěriwych w rěce Ganges kupali, zo bychu sej hrěchi wotmyli. Mnozy njewužiwachu w zwjazkowym staće Uttar Pradesh žane škitne nahubniki a stejachu wusko hromadźe. Do toho dyrbjachu wšitcy wobdźělnicy negatiwny PCR-test předpołožić. Lěkarjo běchu podarmo spytali swjatočnosć sudnisce zakazać dać. Ličby natyknjenjow z koronu w Indiskej zaso přiběraja.
Budyšin (WL/SN). Hornjołužiska předewzaćelska iniciatiwa wopřijima něhdźe 30 předewzaćow najwšelakorišich branšow a wulkosćow. Jich zhromadnosć je ta, zo na samsnym městnje skutkuja, w Budyskim wokrjesu. Nimo toho zasadźeja so wšitcy zhromadnje za dobre žiwjenje, za přichod swojeje domizny a přećiwo wotchadej fachowcow do metropolow. Tónle nadawk je hladajo na planowany kónc zmilinjenja brunicy hač do lěta 2038 a na přepołoženje termina přez nowe zwjazkowe knježerstwo na lěto 2030 čim nuzniši.