Ferialny kurs zakónčeny
Budyšin. Z wudawanjom wopismow wo wobdźělenju wšitkim kursistam a kursistkam je so pjatk w awli Budyskeho Serbskeho gymnazija lětuši mjezynarodny ferialny kurs serbšćiny Serbskeho instituta zakónčił. 13 wobdźělenych zdoby sej z pruwowanjemi certifikat po mjezynarodnym referencnym ramiku w stopnjach wot A1 hač do B2.
Intendantka RBB wotstupiła
Berlin. Patricia Schlesinger njeje hižo intendantka sćelaka RBB. Kaž powěsćernja dpa zdźěla, je wona zastojnstwo wčera złožiła. Prawdźepodobnje je wona mjez druhim wysoke poradźowanske zrěčenja wotzamkowała a sej sama nadměrnu mzdu popřała. Dźensa wuradźowaše rozhłosowa rada RBB kak měło dale hić. Wumjetowanja dadźa tuchwilu eksternje pruwować. Schlesinger bě wot 2016 intendantka RBB.
Podpěruja wučomnikow
Miłoćicy (SN/bn). Swjećić bjez wobmjezowanja a zdobom palace towaršnostno-politiske wužadanja wobkedźbować – tak hodźał so lětuši festiwal Meta Solis jaknje zjimać. Dohromady něhdźe 200 wopytowarjow dožiwi minjeny kónc tydźenja při Miłočanskej skale zarjadowanje, na kotrymž cyłkownje dźesać serbskich, němskich a mjezynarodnych DJjow nimale dospołny spektrum aktualneje elektroniskeje hudźby – mjez druhim house, psytrance, jungle, EBM (electronic body music), IDM (intelligent dance music), „klasiski“ techno a downbeat, na analognymaj tačelakomaj runje tak zwoprawdźene kaž z pomocu najnowšeje digitalneje techniki na přikład wot Idy Bux, Tak-a-Tak, Knytla, Gamze Ya, Ignomusa, Luoka a Zikade –, wjacore dźěłarnički a diskusiji nastupajo brunicu a z njej zwisowacu strukturnu změnu.
Drježdźany (SN/MiR). W Budyskej wotnožce sakskeho krajneho zarjada za šulu a kubłanje LaSuB pytaja dale za wučerjemi. Wšako je na statnych šulach w Hornjej Łužicy hišće tójšto městnow za wučerjow njewobsadźenych. Za region w zamołwitosći LaSuB je aktualnje wjace hač 200 městnow swobodnych. Dotal njeje so ani třećina zajimcow za nje přizjewiła. Byrnjež so wuměnjenja za wuwučowanje na šulach polěpšili, pytaja młodźi wučerjo skerje za móžnosću we wulkich městach, kaž w Drježdźanach a Lipsku, wuwučować. Tomu wotpomhać chce Sakske ministerstwo za kultus (SMK) z online-portalom LEO.SAX. Kaž SMK zdźěli, je so poradźiło po tymle puću dotal w Sakskej 5 000 nowych wučerjow přistajić. „Online-portal nas přewšo derje při zwoprawdźenju wšelkich programow a paketa naprawow sakskeho knježerstwa k zdobywanju wučerjow podpěruje“, rjekny sakski statny minister za kultus Christian Piwarz (CDU), „chcemy postupować zhromadnje ze statnej kencliju Sakskeje a dale wuwiwać portal kaž tež digitalizaciju postupowanja zarjadnistwa.
Budyšin (CS/SN). Njezwučeny koncert je wčera w Budyskim Serbskim muzeju přewšo dobry wothłós žnjał. Njezwučeny tohodla, dokelž su hudźbnicy wokoło Budyskeho gitarista Matteja Hórnika hišće jara młodźi a přiwšěm maja hižo wysoki wuměłstwowy niwow. Kaž wón su tež jeho přećeljo Felix Koch (pozawna), Marlin Flagmansky (husle), Jakob Pepelmann (fleta) a Arnold Maklezow (akordeon) zahe jako dźěćo započeli, hudźić wuknyć. Zeznali su so na Weimarskim hudźbnym gymnaziju Hród Belvedere, na kotryž bě Matteo Hórnik jako 12lětny přišoł. Do toho bě hižo někotrežkuli wubědźowanja dobył.
Swoju pasiju za hudźbu su młodźi hudźbnicy publikumej na połnje wobsadźenej žurli dale dali. Raz solistisce, raz jako ansambl interpretowachu młodźi hudźbnicy dohromady dźewjeć kruchow znatych a mjenje znatych komponistow wšelakorych dobow.
Berlin (dpa/SN). Drastisce zwyšenych płaćiznow energije a žiwidłow dla hrozy Němskej „socialna katastrofa“ z chutnymi strachami za demokratiju. Towaršnosći bliži so „perfektny wichor“, rjekny přesyda Lěwicy Martin Schirdewan wčera wječor w sćelaku ARD. Hdyž njemóža sej ludźo přichodne měsacy žiwidła wjace dowolić, hrozy „strašna kriza demokratije“. Lěwica chcyła nazymu protesty organizować, zo by knježerstwo SPD, Zelenych a FDP namołwjała, jednać.
Pólscy putnicy znjezbožili
Zagreb (dpa/SN). Při ćežkim wobchadnym njezbožu w Chorwatskej je sobotu rano dwanaće ludźi žiwjenje přisadźiło. 34 zranjenych dyrbjachu do chorownje dowjezć. Bus z Pólskeje bě po puću do putniskeho města Medźugorje. Njezbožo sta so 60 kilometrow sewjerozapadnje stolicy Zagreba. Přičina njezboža njebě spočatnje jasna. Policija z toho wuchadźa, zo bě sej šofer za wodźidłom wusnył. We Waršawje mjeztym zdźělichu, zo běchu w busu pólscy staćenjo.
Bamž eksport žita witał
Dospołnje přećeženej nakładnej awće je policija na awtodróze A 2 pola Hamma našła. Kaž rěčnik policije zdźěli, transportowaštej awće šokolodu. Jedyn wóz wažeše dźesać tonow, tamny wjace hač dwanaće, byrnjež byštej najwjace 7,5 tonow wozyć směłoj. Transportna firma dyrbješe třeće awto organizować a šokolodu překładować. Předewzaću hrozy pjenježna pokuta 300 eurow.
Jenož krótke bě wjeselo 14lětneho, po tym zo bě na hermanku w delnjofrankskim Marktheidenfeldźe pistolu-hrajku dobył. Policija jemu hrajku wotewza. Do toho bě sobudźěłaćer hermanka pachoła namołwjał, bróń hakle doma wupakować. 14lětny pak tole ignorowaše a z brónju, kotraž wupada kaž prawa pistola, po swjedźenišću běhaše. Wón smě sej bróń na policajskej straži wotewzać. Předawarjow proša, tajke hrajki wjace njepředawać.