HZ Hórnikecy
– Sokoł Ralbicy/Hórki II 1:1 (1:1)
Zestawa hosći: Měškank – M. Matka, Šěn, Kobalc, Bogusz, Woko, T. Matka, Róbl (89. Serbin), Budar, Cyž (46. J. Matka), Kurjat
Koparska rezerwa Sokoła Ralbicy/Hórki njenastupi we wonkownej hrě z optimalnej zestawu. Zranjenjow dla tójšto hrajerjow falowaše. Přećiwniske domjace mustwo měješe samsne problemy. Při optimalnych wuměnjenjach mějachu hosćićeljo optimalny start (10.). Wólny kop zadyri njedźeržomnje w Měškankowych wrotach. Chowancy delanskeje trenarskeje dwójki Šnajder/Zynda skomdźichu žadanu taktiku přesadźić. Počasu so hra změrowa a wotměwaše so mjez šěsnatkomaj. Niwow pak běše jara słaby. Hosćo njenamakachu prawy hrajny system, zo bychu ćišć wukonjeli. Hakle krótko do změny zaknihowachu woni wjacore šansy. Jedna wjedźeše k wurunanju (40.). Wróblowy třěleny wólny kop docpě w centrumje stejaceho Kobalca, a tón njewostaji wrotarjej přećiwnika Scheunerej žanu šansu.