Nimo Lubija je Kamjenc jeničke hornjołužiske město, kotrež so kóžde lěto 21. junija na Fête de la musique wobdźěla. Na 15 městnach hudźachu wčera najwšelakoriše kapały a solisća. Mjez nimi bě Handrij Henčl. Wón je připosłucharjam serbsku měchawu a šotiske dudy Great Highland Bagpipe rozłožił a na nich wězo tež hrał. Foto: Feliks Haza

Wo knihach a kniharni (22.06.18)

Freitag, 22. Juni 2018 geschrieben von:

Prózdniny steja před durjemi, čas wodychnjenja a wočerstwjenja, čas pućowanja a nadźijomnje tež čas čitanja. W LND je dypkownje k spočatkej prózdnin nowa kni­ha za čitarjow wot 14 lět wušła: „Łó­jerjo sonow“ rěka fantastiska stawizna z pjera Jěwy-Marje Čornakec. Awtorka je sej­ tak tež sama són wo swójskej knize za dorosćacych čitarjow spjelniła. Štóž jeje tworjenje sćěhuje, wě, zo je rozestajenje z dóńtom čłowjeka, z jeho duchom a dušu tema, kotraž ju zaběra a so w jeje tworićelskim dźěle wotbłyšćuje. W nowej stawiznje chce Čornakec předewšěm čitarjow narěčeć, kotřiž maja žiwjenje před sobu, a jim nastorki k rozmyslowanju wo tym dać, kak wowliwujomny čłowjek je a kotre wuskutki jeho jednanje ma. Za to je sej napjatu stawiznu wumysliła. Figurje Krabata a Čorneho młynka, kotrejž spiso­waćelku wot dźěćacych lět přewodźatej a fascinujetej, zbudźa wona na přewšo wušikne wašnje k nowemu žiwjenju.

Hišće hač do jutřišeje soboty, 23. junija, pokazuja we Wojerowskim Łužiskim centeru na Łužiskim naměsće přehladku najlěpšich nowinarskich fotow z cyłeje Sakskeje. Cyłkownje je 228 wobrazow wot dohromady 53 wšelakich fotografow wustajenych. Su to zwobraznjenja z najwšelakorišich žanrow, na přikład ze sporta, a portrety. Mjez nimi su tež dźěła fotografow, kotřiž za redakciju Serbskich Nowin dźěłaja. Zajimcy smědźachu samo z hłosowanskim lisćikom mjez wustajenymi nowinarskimi fotami najrjeńši wuzwolić. Foto: Gernot Menzel

Wot pismika ke knize

Donnerstag, 21. Juni 2018 geschrieben von:

Na dnju wotewrjenych duri wo dźěle w serbskim nakładnistwje zhonili

Lětuša 60. róčnica załoženja Ludoweho nakładnistwa Domowina bě ćežišćo dnja wotewrjenych duri 9. junija. W schodźišću wisachu fotografije, kotrež chronologisce za LND wusahowace wosobiny – mjez druhim běchu to spisowaćel Jurij Brězan, basnik a něhdyši šefredaktor časo­pisa Płomjo Beno Budar abo lektorka a wudawaćelka Ingrid Juršikowa – minjenych šěsć lětdźesatkow pokazachu. Někotremužkuli wopytowarjej bě nimo toho nowosć, zo je skupina Czerwone Gita­ry 1981 redakciju tehdyšeho dźenika Nowa doba wopytała. Wabjenske plakaty za publikacije nakładnistwa wotbłyšćowachu wobšěrny spektrum knihow, kotrež su w LND wušli.

Wuswědčenja dóstali a hudźili

Donnerstag, 21. Juni 2018 geschrieben von:
Na wčerawšim koncerće k zakónčenju šulskeho lěta w Budyskim NSLDź su hudźbnym šulerkam a šulerjam Budyskeje wokrjesneje hudźbneje šule lětuše wuswědčenja přepodali. Zdobom wuznamjenichu najlěpšich z přidatnym prezentom. Młodźi hudźbnicy dóstachu tak hišće raz składnosć, swoje zamóžnosće na instrumenće zjawnosći prezentować. Nimo němskich a jendźelskich titlow na dudach, pozawnach a wot Cecilije Neterec na klawěrje přednjesenych kruchow běchu tež serbske zynki słyšeć. Wiebke Vogel a Georg-Wilhelm Jatzke zanjeseštaj jako duwo pěseń Bjarnata Krawca na tekst Jakuba Barta-Ćišinskeho „Na łukach“. Foto: SN/Maćij Bulank

Porjedźenka

Donnerstag, 21. Juni 2018 geschrieben von:
W rozprawje „SCS swoju prěnju CD předstajił“, we wudaću Serbskich Nowin ze 4. junija, jewitej so zmylkaj. Prawje ma rěkać: „Sydom spěwarjow … zanjese wšitke na zynkonošaku zwěčnjene pěsnje, kotrež su zwjetša wobdźěłanja ... kaž tež swójske a cuze kompozicije kaž drje najznaćiši hit ćělesa ‚Jen běły šwon‘.“ W předposlednjej sadźe měło stać: „Spisałoj staj pěsnje mjez druhim Jan Cyž a Tadej Nawka.“ Awtor prosy wo wodaće za misnjenje. redakcija SN

Žiwa hudźba, reje a kabaret w busu

Donnerstag, 21. Juni 2018 geschrieben von:

9. a 10. junija je wuměłstwowy bus lětsa­ pjeć stacijow w Budyšinje – tu měšćan­ski muzej a kulturnu milu w Strowotnej Studni –, w Pomorcach, Koporcach a Korzymju zwjazał.

W Serbach rozšěri so zrudźaca powěsć, zo je 6. junija zemrěł Jan Domaška, zasłužbny nawoda rejwanskich skupin. 2. měrca 1933 bě so wón w Jitku pola Rakec­ serbskej burskej swójbje narodźił. Spočatk lěta 1952 přistaji jeho intendant SLA Jurij Winar w runje załoženym serbskim powołanskim ansamblu jako rejwarja. Tak słušeše njeboćički do prěnich wosom rejwanskich porow, kotrež za­počachu 15. měrca 1952 program SLA zwučować. „Jan Domaška bě sobuzałožer SLA a prěni jara talentowany powołanski serbski solowy rejwar“, praji jeho kolegina prěnjeje hodźiny SLA Leńka Šołćina. 21. decembra 1952 je wón prěni wulkoprogram SLA w Choćebuskim Statnym dźiwadle sobu wuhotował.

Wojerecy (AK/SN). Po třoch lětach při­hota su we Wojerowskim měšćanskim muzeju njedźelu dalši dźěl moderneje, znowa zarjadowaneje trajneje wustajeńcy wotewrěli. Wobłuk „powučenjahódny“ (LehrReich) je do šěsć wobłukow rozrja­dowany. Nowy slěduje na hižo wote­wrjeny wobłuk „dožiwjenjahódny“ (ErlebnisReich). „Smy tójšto stawiznow do małych rumnosćow hroda zaměst­ni­li“, wuzběhny nawodnica muzeja Kerstin Noack.

Jeho hudźba klinči dale w našich wutrobach

Dienstag, 19. Juni 2018 geschrieben von:

Budyšin (SN/at). Na hnujace wašnje su so swójbni, přećeljo, bywši kolegojo a serbska zjawnosć z Delnjeje a Hornjeje Łužicy wčera na Budyskim Tuchorju z komponistom a hudźbnym wědomostnikom Detlefom Kobjelu rozžohnowali, kiž bě 18. meje w 75. žiwjenskim lěće zemrěł.

Žarowansku swjatočnosć w štyrjoch rěčach zemrěteho – jeho delnjoserbskej maćeršćinje, hornjoserbskej a němskej dźěłowej rěči kaž tež hudźbnej jako rěči wutroby – swjećeše farar Cyril Pjech w Tuchorskej cyrkwi. W prědowanju rysowaše wón Detlefa Kobjelu jako nana serbskeje swójby, kiž je „wšitko činił, zo by­ wam lochko było“. A „jeho hudźba klinči dale w našich wutrobach“. Jeho wutroba bě doma w Delnjej Łužicy, hdźež je jako syn pjekarja wotrostł.

Nimale 150 kruchow najwšelakorišeho razu wučinja kompozitoriske tworjenje njeboćičkeho. Wone „słušeja do manifestneho wobstatka serbskeho hudźbneho tworjenja“, hódnoćeše komponist Juro Mětšk.

Anzeige