Flensburg. Poprawom je so lěta 2015 wšitko derje započało nastupajo poměr mjez Němcami a Danami. W měrcu wo­swjećichu w Berlinje 60. róčnicu podpisanja Bonnsko-Kopenhagenskich zrěčenjow, z kotrymiž bě so 1955 wujednanje mjez woběmaj narodnosćomaj po lětach konfliktow a wojerskich rozestajenjow zahajiło. Tehdy buchu rozsudźace prawa kruće zapisane, kotrež wot toho časa w Němskej sydlacej mjeńšinje Danow zmóžnichu, swójske šule, dźěćace dnjowe přebywanišća, cyrkwje, sportowe a wólnočasne kluby po danskim wašnju wobhospodarjeć.

Tola přiwótřaceje so situacije ćěkancow dla hroža znowa njepřihódnosće a zwada w němsko-danskej pomjeznej kónčinje. Po tym zo bě humanistiska Šwedska počała w naležnosći nuzowe spinadło ćahać, liča nětkole kóždy čas tež w Flensburgu z přewšo njerjanymi a politisce wobmyslomnymi sćěhami toho.

Wuslědki naprašowanja předleža

Donnerstag, 10. Dezember 2015 geschrieben von:

Abonenća a dalši zajimcy wo wudźěłkach Ludoweho nakładnistwa Domowina zdźěla kontrowersnje diskutowali

Mjez hornjoserbskimi wobdźělnikami naprašowanja je institut DIMA třoch dobyćerjow tankowanskeho dobropisa w hódnoće 25 eurow wulosował. Su to:

Monika Kralowa, Boranecy

Joachim Nowak, Wojerecy

Wendelin Šram, Drježdźany.

Redakcija gratuluje!


Dobyćerjo wulosowanja

W nadawku Ludoweho nakładnistwa Domowina je Mannheimski institut­ DIMA-wične slědźenje wot septembra do nowembra 2015 naprašowanje­ mjez čitarjemi přewjedł. Mjez druhim chcyše wědźeć, što so jim na hornjo- a delnjoserbskich knihach, nowinach a nowych medijach lubi, z čim njejsu spokojom a što sej za přichod přeja. Wuslědki­ nětko předleža. Chcemy tuž zjawnosć wo nich informować.

Koncert serbskeje hudźby

Montag, 30. November 2015 geschrieben von:

Slepo (JoS/SN). 11. adwentny koncert rozhłosoweho sćelaka RBB je wčera ně­hdźe 150 wopytowarjow do Slepjanskeho Serbskeho kulturneho centruma přiwabił. Dwě hodźinje začuwaše publikum dobru symbiozu akterow mjez lubosću k hudźbje a domiznje. Wočiwidnje su sej organizatorojo tójšto młódšich hudźbnikow přeprosyli. „Serbski adwentny koncert RBB ma dobru tradiciju“, rjeknyštaj moderatoraj Anne Holzschuhojc a Christian Matthée, kotrajž wobaj za delnjoserbski program RBB w Choćebuzu dźěłataj.

Porjedźenka W přinošku „Jubilejej aktiwnje podpěrać“, wozjewjenym 17. nowembra w Serbskich Nowinach, je so awtorej zmylk stał. W přinošku předstajenej projektaj ke klětušimaj jubilejomaj stotych narodnin Jurja Brězana a dwustotych narodnin Jana Arnošta Smolerja njejstej projektaj Wojerowskeje serbskeje přirady, kaž mylnje wozjewjene, ale zarjadowani župy „Handrij Zejler“ Wojerecy. Regionalna rěčnica za Wojerowski region Christina Šołćina je jej­ na zašłym posedźenju přirady předstajiła. Prosymy wo wodaće. SN

Serbske Nowiny so čitarjow naprašuja

Freitag, 04. September 2015 geschrieben von:

Lube čitarki, lubi čitarjo,

redakcija Serbskich Nowin a Ludowe nakładnistwo Domowina stej wćipnej: Je Wam naš wječornik swěrny přewodźer po serbskim a łužiskim žiwjenju abo rozsudźa proste wuhotowanje nowiny wo tym, hač přinoški čitaće? Što so Wam wobsahowje lubi, što mjenje rady čitaće? Kotre informacije parujeće a kotre maće snano samo za zbytne?

To wšo ma naprašowanje w němskej rěči DIMA Marktforschung z Mannheima w septembrje a oktobrje wuslědźić. Za to wužiwaja rozmołwy w małym kruhu w Budyšinje abo telefoniske napra­šowanje. Wobdźělenje je dobrowólne a ano­nymne. Institut je hižo před pjeć lětami­ čitanske zadźerženje abonentow a njeabonentow Serbskich Nowin přepytował. Zakonske zakłady za tajke naprašowanja nakładnistwu njedowoleja, na wosobu poćahowane daty abonentow institutej DIMA dale dawać.

Porjedźenka

Montag, 27. Juli 2015 geschrieben von:
Porjedźenka W přiłoze Serbskich Nowin „Kultura a wuměłstwo“ ze 24. julija je so awtorej por­treta wo Friedemannu Böhmje zmylk stał. W přinošku naspomnjeny znaty braška njeje Jurij Rjenč z Chrósćic, ale Jan Rjenč. Prosymy wo wodaće za misnjenje. SN

Serbska hudźba po přeću připosłucharjow

Donnerstag, 25. Juni 2015 geschrieben von:
Budyšin (SN). Za zajutřišim, sobotu, je sej Serbski rozhłós něšto wosebite wumyslił, mjenujcy „dźeń serbskeho spěwa“. To chcedźa raz bjezwuwzaćnje jeno serbsku hudźbu we wšěch třoch wusyłanskich hodźinach hrać, wot ranja w šesćich hač do dźewjećich, a to štučki, kotrež sej słucharjo přeja. Tak njech lubowarjo serbskeje hudźby sobotu rano do Serbskeho rozhłosa pod telefonowym čisłom 03591/ 37 400 zazwonja a moderatorej Štefanej Pašce praja, što bychu rady słyšeli a čehodla. W studiju spěw potom po móžnosći spěšnje wupytaja a zahraja. Přez Facebook abo e-mailnje móža sej jón připosłucharjo hižo nětko skazać. Facebookowa­ strona rěka „MDR Serbja“, internetna adresa je www.mdr.de/serbski-program. Serbscy rozhłosownicy su na hudźbne přeća jara wćipni.

MDR wusyła třinarodnje

Freitag, 19. Juni 2015 geschrieben von:
Drježdźany (SN). Tři kraje, tři sćelaki – jedne zhromadne wusyłanje. Pod hes­łom „Hej, susodo“ hlada MDR 1 Radijo Sakska wotnětka jónu wob tydźeń zhromadnje z Čěskim rozhłosom a Radijom Wrócław poł hodźiny přez mjezy, zdźěla MDR. Mo­derator Roman Nuk chce so z kolegomaj Peterom Kumpfu z Libereca a Tomaszom Sikoru z Wrócławja wo tym rozmołwjeć, wo čimž w susodnymaj krajomaj runje rěča, so směja abo diskutuja. Premjera třinarodneho wusyłanja budźe njedźelu we 18 hodź. „Chcemy z prěnim prawi­dłownym mjezy překročacym roz­hło­sowym wusyłanjom w MDR swoju rólu jako kompetencny centrum za rozprawnistwo z pomjezneho regiona dale zesylnić“, wuzběhny direktor Sakskeho kraj­neho rozhłosa Sandro Viroli. Hižo wot spočatka lěta wusyła MDR Sachsenspiegel kóždu njedźelu powěsće „Naši suso­dźa“ w kooperaciji z čěskej a pólskej telewiziju. Dźěl wusyłanja „Hej susodo“ ma być rěčny přinošk. „‚Dobry dźeń‘ a ‚dźakuju so‘ dyrbi kóždy w rěči susoda rjec móc“, měni moderator Roman Nuk.

SN najlěpše byli

Donnerstag, 18. Juni 2015 geschrieben von:

Drježdźany/Budyšin (SN/at). Nowiny ze Sak­skeje su při lětušej akciji Zwjazka žurnalistow Němskeje (DJV) „Fotografojo maja mjeno“ dosć derje wotrěznyli. „Najlěpše po cyłym Zwjazku běchu Serbske Nowiny“, podšmórny předsyda facho­weho wuběrka fotowi žurnalisća Jürgen Männel wčera na posedźenju předsydstwa DJV Sakskeje w Drježdźanach.

DJV je 26. měrca 116 wudaćow dźe­nikow w Němskej analyzował. Serbske Nowiny běchu tón dźeń jako wosomstronske wušli. Po 94 procentach bě pola wozjewjenych wobrazow mjeno fotografa po­date, jeno při jednym nic. Redakciji SN je to připóznaće za swědomite dźěło. Wšako maja čitarjo narok na to, zhonić awtora fota, kaž sej to zakoń wo awtorskich prawach žada.

Na 2. městnje slědowaše Welt Kompakt (87%), na třećim junge Welt (85%). W nimale pjećinje přepytowanych wudaćow bě jenož po sydom do 25 procentach wobrazow mjeno fotografa podate. Po słowach předsydy DJV Michaela Konkena je hišće dosć potenciala, zo by prawje wjele redakcijow dźěło fotografow připóznało a tak zakonjej wotpowědowało.

Anzeige