Na 36. Wopačanskim Běłobóskim běhu (Oppacher Bielebohlauf) po tamnišej hórskej krajinje je so mjez 314 wobdźělnikami tež dźesać serbskich sportowcow wuspěšnje dračowało. Wuměnjenja při najwjetšej horcoće tydźenja njedźelu běchu tuž podobnje kaž we Łazu na olympiskej abo sprintowej distancy wubědźowanja KnappenMan. Jednotliwe distancy běchu 1,5 km/4,9 km/12 km a 20 km a wjedźechu po pódlanskich pućach, lěsnych, łučnych a pólnych šćežkach. Wosebje naročnej najdlěšej čarje 12 a 20 km wjedźeštej přez wjeršk 500 metrow wysokeho Běłobóha.