22. Budyski měšćanski běh z tójšto serbskimi wobdźělnikami
Lětuši Budyski měšćanski běh bě z 1 333 wobdźělnikami jasnje pod rekordnymaj ličbomaj 1 507 w lěće 2013 a 1 491 loni. Najwjace bě jich tónkróć šulerjow do 19 lět, kotřiž so sobotu na wjacore čary podachu. Hłowna přičina mjenje běharjow móhł startowy pjenjez być, kotryž wučinja za šulerjow dale tři eura. Wobdźělnicy ze Serbskeje zakładneje šule Budyšin na přikład njejsu na 22. Budyskim měšćanskim běhu zhromadnje za swoje kubłanišćo startowali, ale jako jednotliwcy. Sportowi wučerjo běchu hižo loni startowy pjenjez třoch eurow jako njewoprawnjeny kritizowali a sej nišu płaćiznu žadali. Dotal bě mjenujcy spěchowanske towarstwo serbskeje zakładneje šule kompletnu sumu zapłaćiło, lětsa pak dyrbjachu šulerjo swój podźěl sami płaćić.
Nimo běha za cyle małe dźěći poskićichu zarjadowarjo šulerske běhi, prěni raz swójbny běh a k tomu hišće hłownej na distancy 5,6 a 9,3 kilometrow. Zamołwići běchu čaru w měšćanskich zelenišćach při dźiwadle wo někotre metry skrótšili, zo njeby tam k njezbožam dóšło.