Po porjadnej hrě znowa bjez dypka

Donnerstag, 11. Mai 2017 geschrieben von:

FSV Budissa Budyšin

– FC Schönberg 1:3 (0:1)

Zestawa domjacych: Große – Heppner, Hausdorf, Iliadis (79. Baudis), Kolan, Hoßmang, Rosendo (46. Žuljević), Kloß, Müller (46. Němec), Barth, Herrmann

Torsten Gütschow, trenar Budissy Budyšin, chcyše hru přećiwo FC Schönbergej wězo dobyć. Bohužel pak dyrbješe so wosom koparjow wzdać. Přećiwnik, kotryž so po sezonje z regionalneje ligi wróćo sćehnje, pokaza angažowanu partiju. Hižo zahe wón přez wrota Masamija Okady z 1:0 (6.) nawjedowaše. Po tym měješe Budissa někotre dobre móžnosće. Třělwa Ezequiela Horacija Rosenda pak prasny do žerdźe. Dalše wrota hosći sudnik nimohry dla njepřipózna. Wuběrnu šansu k wurunanju spřihotowa Max Herrmann za Daniela Bartha, tón pak zwrěšći z krótkeje distancy na wrotarju.

Kontrahent runohódny był

Mittwoch, 10. Mai 2017 geschrieben von:

ST 1922 Radwor

– ST Lubuš 3:1 (2:0)

Zestawa domjacych: Šěrak – Henka, Zähr, Omran, von Karwin, Nuk, Winar, Mark (59. Buša), Wjeńka, Kurjat (85. Hančik), Schulze (22. Bejmak)

Radworscy koparjo wočakowachu njedźelu sylne mustwo z Lubuša. Hižo prěni nadběh bě po přećach domjacych. Daniel Nuk pósła Franca Winarja z rjanej přihrawku na puć. Swobodnje před wrotarjom so jewjo Winar wěsće k 1:0 přetwori (3.). Hosćo z Lubuša, kotřiž běchu swoju wuběrnu formu w druhej hrajnej dobje přeco zaso wobkrućili, mějachu w prěnim połčasu samo wjacore dobre móžnosće. Te pak móžeše Chrystof Šěrak hromadźe ze zadnim mustwom zmištrować. W 37. min. mějachu domjacy zbožo, zo sudnik na ominozny dypk njepokaza. Nadběhowar hosći dósta w šěsnatce wěsty „impuls“ wotzady. Slědowacy nadběh Radworčanow přinjese zwyšenje mje­zywuslědka na 2:0 (39.). Matej Wjeńka zakónči krasnu přihrawku Křesćana Bejmaka­.

Młodźi běharjo w crossu wuspěšni

Mittwoch, 10. Mai 2017 geschrieben von:

Při přijomnym wjedrje wotměchu so kónc apryla za šulerjow a šulerki wokrjesa Budyšin crossowe běhi. Bohužel bě wobdźělenje zakładnych šulow w Budyskim Humboldtowym haju snadne. Najwjetši dźěl běharjow a běharkow startowaše za Montessorisku šulu Budyšin, za Zakładnu šulu Wjelećin a za Budysku Serbsku zakładnu šulu.

Młodźi crossowi běharjo njedachu so wottrašić a absolwowachu čaru z połnej paru. Najmłódši sportowc Serbskeje zakładneje šule Budyšin William Jochmann doby w starobnej klasy M7 (650m) złotu medalju. Trójny wuspěch swjećachu holcy w starobnej klasy W8 (950m). Złoto wubědźi sej Jitka Schade, slěbro Luisa Neterec­ a bronzu Julia Lehmannec. Tohorunja trójny wuspěch poradźi so holcam w starobnej klasy W9 (950m). Tam přesadźi so Maja Lodni před Hannu a Hildu Woschickec. Dalše wuspěchi: 1. městno Georg Kochan (M9), 3. městno Sebastian Rentsch (M10), 1. městno Cora Dutschmannec (W10) a 3. městno Vincent Reimann (M11).

Rododendrony za najlěpšich

Dienstag, 09. Mai 2017 geschrieben von:

Pastwina hora w Kamjencu je daloko znata za swoju nalětnju pychu. We wšěch barbach kćěje rododendron w meji a njewabi jenož k wuchodźowanju. Tudyše sportowe towarstwa a město Kamjenc su hižo dołho spóznali, zo sportowe wubědźowanje před tajkej rjanej kulisu mnohich přiwabja. Tuž přeprosychu minjenu njedźelu hižo 19. raz na swój kćenjowy běh. Zo pak njebychu jenož běharjo přišli, wotměwaja tam hišće wjace wurisanjow. Łužiske kolesowanje a hórski dua­tlon – potajkim kombinacija wobeju sportoweju družin – stej tohorunja hižo něšto lět kruty wobstatk tohole wubědźowanskeho dnja.

Lětsa prěnju poražku poćerpjeli

Dienstag, 09. Mai 2017 geschrieben von:

TSV Połčnica

– Sokoł Ralbicy/Hórki 1:0 (1:0)

Zestawa hosći: Ch. Gloxyn – Rawš, Zynda, Korjeńk, Lulak (55. Šěn), D. Gloxyn, S. Bjeńš, Wowčerk, B. Bjeńš, Kurjat (71. J. Bjeńš), Bejma

Zo so koparjo Sokoła Ralbicy/Hórki z Połčnicy bjez dypkow nawróća, z tym fachowcy zawěsće ličili njejsu. Znowa falowaše trenarjej Tomašej Henčlej kopica stajnych hrajerjow. Nimo toho bě trawnik jara špatny, a sudnik njeměješe swój najlěpši dźeń. Najwjetši problem pak bě, zo njemějachu Sokoljo před wrotami domjacych tónkróć trěbne zbožo. Při natwarje hry zhubichu woni njetrjebawši bul, a nadobo běžachu třo přećiwniscy hrajerjo na wrota. Fabian Korjeńk njezamó jich w tym wokomiku jako jenički defensiwny hrajer dodźeržeć a hižo steješe 1:0 za Połčnicu. Pomału so delanscy koparjo zhrabachu a přez křidle strašnje do šěsnatki flankowachu. Přeco pak běchu­ škitarjo hosćićela krok spěšniši a hdys­ a hdys­ jich wrotar derje wotwobara. Najčasćišo pak dźěchu pospyty pódla abo wyše wrotow.

Z wjeselom při wysokim saku

Dienstag, 09. Mai 2017 geschrieben von:

Składnostnje wobnowjenja a dotwara sportoweje hale we Worklecach přeprosychu sej pedagogojo tamnišeje šule „Michał Hórnik“ wučerjow dalšich serbskich kubłanišćow na zhromadny volleyballowy turněr.

Wučer Křesćan Bejmak wotewrě turněr serbskich pedagogow-volleyballistow 26. apryla w rjanej Worklečanskej sportowni. Štyri mustwa běchu přitomne, a kóžde hraješe přećiwo kóždemu dwě sadźbje hač do 15 dypkow. Po skoro dwuhodźinskim boju přesadźichu so wučerjo Budyskeho Serbskeho gymnazija, kotřiž běchu wšitke partije z 2:0 dobyli. Volleyballisća z Pančic-Kukowa, z Ralbic a z Worklec prezentowachu so na hrajnym polu jara wurunani. Wšitke duele při wysokim saku skónčichu so njerozsudnje 1:1. Dobyli­ su na kóncu wšitcy, dokelž mějachu, pohibujo so při wysokim saku, wjele wjesela. Turněrej přizamkny so lóštna zabawa při kołbasce a napoju. Dźak słuša Worklečanskej šuli „Michał Hórnik“, kotraž je pora­dźeny wječor wuhotowała a sponserowała. Měrko Korjeńk

Próca so zaso raz njewudaniła

Dienstag, 09. Mai 2017 geschrieben von:

Sokoł Ralbicy/Hórki II

– Wojerowski FC II 0:3 (0:2)

Zestawa domjacych: Cyž – M. Matka, T. Matka, Schneider, Čornak, Jakubaš, Šěn, Kobalc, Serbin, Gerlich, J. Matka

Po lětach we wokrjesnej lize póńdźe za koparsku rezerwu Sokoła Ralbicy/Hórki lětsa zaso dele do wokrjesneje klasy. Po dypkach drje dotal zestupiła njeje­, realistisku šansu, so hišće raz wuswobodźić, pak wjac nima. Z jenož jěd­naćomi su Sokoljo tež tónkróć nastupili. Zranjenja, dźěła, dowola a wotchadow dla njeje so personalne prašenje dotal hišće rozrisać dało. Tuž chwalba wšitkim, kotřiž na­jebać ćežke połoženje dale za mustwo wojuja­.

Šansow su sej Sokoljo tež tónraz dosć nadźěłali, bul pak nochcyše prosće do wrotow. Na tamnym boku pak worachu přewjele zmylkow a škit je so přelochce wuhrać dał. Tak tež při zastatku w 21. min., jako přećiwniski hrajer k 0:1 trjechi. Jednora flanka w 42. min. bu do wrotow domjacych zhłójčkowana. Rozsudne třeće wrota hnydom po połčasu běchu rjany wuspěch Wojerowčanow.

W zbywacych hrach sezony póńdźe dale wo to, sej snano hišće tón abo tamny dypk wuwojować a so hłowu wěšejo z ligu njerozžohnować. Jurij Bjeńš

Wuslědki (09.05.17)

Dienstag, 09. Mai 2017 geschrieben von:

Wokrjesna wyša koparska liga

Połčnica – Ralbicy/Hórki 1:0 (1:0)

Ćisk – Bukecy1:0 (1:0)

Kulow – Hory 0:1 (0:0)

Wojerecy – Kinspork/Łužnica 0:0 (0:0)

Wjelećin – Kumwałd3:0 (0:0)

1. ST Ćisk 25 87  : 18 61

2. Rakečanske ST 25 66  : 41 51

3. Sokoł Ralbicy/Hórki 25 63  : 31 49

4. ST Hnašecy-Dobruša 25 49  : 39 45

5. SC Großröhrsdorf 25 36  : 29 38

6. LSV Hory  25 56  : 44 35

7. Póst Germ. Budyšin 25 44  : 50 34

8. ST Kinspork/Łužnica 25 44  : 39 32

9. Motor Kumwałd 25 44  : 60 31

10. Wojerowski FC 25 50  : 47 29

11. Módro-běli Kulow 25 40  : 47 26

12. Drohotka Ramnow 25 35  : 52 26

13. ST Wjelećin 25 48  : 81 25

14. TSV Połčnica  25 42  : 61 24

15. Zeleno-běli Bukecy 25 40  : 74 22

16. FV Ottendorf-Okrilla  25 35  : 66 21

krajna liga – žony

1. RB Lipsk 22  115 : 10 64

2. FC Silesia Zhorjelc 22 78  : 33 50

3. Biskopičanske KT 23 54  : 32 45

4. Kamjeničanski FC 23 54  : 45 36

5. 1. FFC Wacker Lipsk 23 40  : 43 36

6. TSV Spitzkunnersdorf 23 51  : 45 30

7. Přezjednota Lipsk-juh 22 39  : 35 29

Viktoria Worklecy w top 16 Sakskeje

Montag, 08. Mai 2017 geschrieben von:

Benjamin Grutka ze sportoweho towarstwa Viktoria Worklecy wobdźěli so srjedź měrca w Döbelnje na tak mjenowanym dypkowym hódnoćenskim turněrje, na kotrymž startowaše 16 najlěpšich blidotenistow starobneje klasy U11 Sakskeje. Po dźewjeć napjatych a napinacych hrach wobsadźi młody Sernjančan wulkotne 11. městno a je najsylniši hrajer swojeje starobneje klasy w sewjerowuchodnej Sakskej. Kedźbyhódny talent pokaza wón hižo w minjenej hrajnej dobje, jako zamó so samo přećiwo jasnje staršim přećiwnikam přesadźić. Za Viktoriju Worklecy je tónle wuspěch zasłužba intensiwneho dorostoweho dźěła. Wokomiknje nastupi towarstwo ze šěsć hrajerjemi w dorostowej klasy; jich načolny hrajer je, njehladajo na swoju młodosć, Benjamin Grutka.

Kónc zašłeje sezony su štyrjo młodostni wot dorosta k mužam Viktorije přešli a žnějachu hižo tón abo tamny naspomnjenjahódny wuspěch. Nimo toho trenuje tučasnje hišće dźesać dalšich dźěći z celuloidowym bulikom, zo bychu so prjedy abo pozdźišo tež z druhimi w dypkowych hrach měrić móhli.

Věchet štwore wrota třělił

Montag, 08. Mai 2017 geschrieben von:

SJ Chrósćicy

– Čerwjeno-běli Mužakow 4:1 (1:0)

Lubi čitarjo a lube čitarki, kajka bě to hra wčera na Chróšćanskim kopanišću? Přećiwnik z Mužakowa bě jako faworit přijěł a wotjědźe bjez jeničkeho dypka. Při tym wupadaše do zahwizdanja wšitko za tym, zo budźe to skerje šěre hač słónčne popoł­dnjo za domjacych. Wosom hrow bjez poražki, 22 dobytych (!) z dohromady 24 móžnych dypkow – statistika přećiwnika čitaše so nimale kaž smjertny wukaz. Štož pak so na to w přichodnych 90 mjeńšinach sta, je woprawdźe wozjewjenja hódne. Přetož štyri razy Radim Věchet do wrotow trjechi a tuž zaso jónu dopokaza, čehodla jeho w Chrósćicach tak lubuja.

Serbska debata

Neuheiten LND