Jako minjenu sobotu wječor w kabinje Viktorije Worklecy dźewjeć muži serbsku „Sławu“ zanjese, bě wona najprjedy kapitanej tamnišich volleyballistow Ludwigej Eckertej wěnowana, kiž bě krótko do toho 30. narodniny swjećił. Ze spěwa pak bě tež wusłyšeć wjeselo nad dobyćomaj, z kotrymajž móžeše sej Viktoria druhe městno w tabulce zaso wróćo zdobyć. W hodźinach do toho běchu přihladowarjo sydom bojowniskich sadźbow widźeli.
Viktoria Worklecy
– Módro-běli Wojerecy II 3:0
(25:21, 27:25, 25:15)
W sportowni Wojerowskeje powołanskeje šule je so mjezykoło halowych wokrjesnych koparskich mišterstwow młodźiny D přewjedło. Mjez wobdźělnikami běchu tež Radworčenjo a Kulowčenjo. Wobaj cyłkaj chcyštej na kóždy pad do kónčneho koła, štož so jimaj tež poradźi.
wuslědki mjezykoła:
1. ST 1922 Radwor 12:0 12 dypkow
2. Módro-běli Kulow 9:2 9 dypkow
3. Biskopičanske KT II 7: 9 6 dypkow
4. Budissa Budyšin III 5:8 3 dypki
5. Liegau-Augustusbad 1:15 0 dypkow
Finalne koło koparskeje młodźiny D budźe sobotu, 21. januara, wot 14 hodź. w sportowni při Kamjenskim lětanišću. Werner Müller
Na staflowym posedźenju Sewjerowuchodneho koparskeho zwjazka NOFV su so zamołwići na dalše hrajne terminy a časy zakopow dojednali. Budissa Budyšin hraje na sćěhowacych terminach (D=doma, W=wonka):
05.02. 13:30 W ST Babelsberg
11.02. 13:00 W FC Carl Zeiss Jena
17.02. 18:00 D Union Fürstenwalde
26.02. 13:30 W TSG Neustrelitz
05.03. 13:30 D Berlinski AK
12.03. 13:30 W Hertha BSC II
19.03. 13:30 D FC Energija Choćebuz
31.03. 19:00 W FSV Luckenwalde
09.04. 13:30 D Wacker Nordhausen
Kilian Hrjehor
Hižo šesty raz su w Kulowje blidotenisowy turněr za wólnočasnych sportowcow přewjedli.
W Kulowje a na wokolnych wsach zetkawaja so přeco zaso blidotenisowe hobbyjowe mustwa k wólnočasnym turněram. Tak zrodźichu před třomi lětami ideju, dwójce wob lěto ludosportowej turněraj přewjesć. Spočatk januara je stajnje blidotenisowa skupina DJK Módro-běłych Kulow zamołwita, w lěću TTV Hózk-Kulow. Na turněrje wobdźěleja so jenož ludowi sportowcy. Za šěsć blidami hraja woni wot 18 do 23 hodź., doniž njeje dobyćer jasny.
Na šestym wurisanju je so nětko jědnaće teamow ze stajnje třomi sportowcami wobdźěliło. Hosćićel Módro-běli Kulow nastupi z třomi mustwami, Mučow a Spale z dwěmaj, po jednym mustwje pósłachu Kulowc, Židźino, Dubrjenk a Róžant. Naposledk mjenowany cyłk hraješe z Róžeńčanomaj Tilom a Titusom Žurom a Kulowskim fararjom Gabrišom Nawku. Farar Nawka drje wobsedźi hrajersku licencu blidotenistow w Hózku, přiwšěm su jemu wobdźělenje na ludosportowym turněrje dowolili.
Kónčny staw: 1. Kulowc, 2. Róžant, 3. Dubrjeńk, 4. Kulow II, 5. Mučow.
Serbski Sokoł je přizjewjenske woknješko za 35. volleyballowy turněr wo pokal Domowiny 1. apryla hišće raz wotewrěł, a to hač do kónca januara. Spočatk lěta je so hišće cyłk z Choćebuza (ze zapozdźenjom) přizjewił. Nimo toho je tež hišće dalše mustwo zajim signalizowało. Změje-li Sokoł hač do 31. januara dwaceći přizjewjenjow, móže turněr potom město 16 z 20 mustwami přewjesć.
Přizjewjene cyłki:
Mustwo 1296
Serbski dom Budyšin
Skupina Brodatych
ST 1922 Radwor
SGB – wučerjo
Rapaki
Dom biskopa Bena
Los Blockos
SJ Chrósćicy
Sokoł Budyšin
Dźiwje micki
Handicap
Bratrowstwo Róžant
Měrkowske wnučki
Škit Budyšin
12. lětnik SGB Jurij Bjeńš
Awtor dźensa
Tadej Cyž
Na polu zymskeho sporta jewja so tučasnje mnohe zajimawe, spektakularne a wažne wubědźowanja. Skrótka – zymska sportowa sezona je w horcej fazy. W alpinskim sněhakowanju bliži so klasikar w awstriskim Kitzbühelu. Tež swětowe mišterstwa w spěšnosněhakowanju w šwicarskim St. Moritzu steja před durjemi. Za sportowcow w nordiskim sněhakowanju (skakanje a sněhakowanje na dołhich čarach) zakónči so sezona z nordiskimi swětowymi mišterstwami w finskim Lahtiju. Tam chce potom Eric Frenzel swój titul z němskim mustwom zakitować.
Za někotrych atletow budu wubědźowanja wosebje napjate. Woni chcedźa po dołhej přestawce zaso wo medalje a wo dobyće wojować. Anna Veith (spěšnosněhakowanje, rodźena Fenninger), Gregor Schlierenzauer (sněhakowarske skakanje) a Marit Bjørgen (sněhakowanje na dołhich čarach) swjeća swój comeback. Přičiny přestawki, kotruž běchu tući třo w profesionelnym sportowanju zapołožilu, su wšelakore.
W regionalnym volleyballowym finalu wubědźowanja „Młodźina trenuje za olympiju“ wuwojowachu sej holcy 8. a 9. lětnika Serbskeho gymnazija Budyšin (SGB) slěbornu a hólcy samsneje staroby bronzowu medalju.
FSV Budissa Budyšin je mjeztym 18. halowy koparski turněr piwarnje Landskron přewjedła. Jako zakitowar pokala startowaše regionalny koparski ligist FC Hornja Łužica Neugersdorf. Prěni raz přewjedźechu wšitke hry w dwěmaj połčasomaj.
520 přihladowarjow dožiwi napjate partije, při kotrychž wosebje přiwisk Budissy swoje mustwo wuběrnje pohonjowaše. Wona je tež jako prěnja přećiwo Woclej Riesa nastupiła a 3:0 dobyła. Po druhej skupinskej hrě Budissy přećiwo Biskopičanam, kotraž skónči so njerozsudnje 3:3, dyrbješe poslednja hra skupiny A wo skupinskim dobyću rozsudźić. Wocl Riesa so přećiwo Biskopičanskemu KT 08 wobaraše a zaruči z wuslědkom 3:4 skupinske dobyće Budissy. W skupinje B přesadźi so FC Hornja Łužica Neugersdorf suwerenje přećiwo Jednoće Kamjenc (2:0) a ST Hnašecam-Dobruši (3:1). Druhe městno zawěsći sej krajny ligist Jednota Kamjenc z dobyćom 3:1 přećiwo Hnašecam-Dobruši.