W runje wotewrjenej Wětošowskej hrodowej remizy su wčera lětuši program Serbskeho ludoweho ansambla na tamnišich swjedźenskich hrach w parku hrodu 20. a 21. junija předstajili.

Wětošow (PBe/SN). „Loni, składnostnje swětowych koparskich mišterstwow, bě Brazilska tematiske ćežišćo. Lětsa ma to Italska być. Chcemy wopytowarjow sobu wzać na – nadźijomnje miłu – mediteranu lětnju nóc“, připowědźi wčera intendantka Serbskeho ludoweho ansambla Milena Vettrainowa. SLA je so wo pro­mi­nentnu podpěru dweju wuměłcow po­sta­rał, kotrajž chcetaj Wětošowčanow z arijemi a duetami Verdija, Rossinija a Puccinija zawjeselić. Wienska sopranistka Bibiana Nwobilo pochadźa z Nigerije, je w Korutanskej wotrostła a spěwaše jako solistka mjez druhim we Wienskim koncertowym domje. Španiski tenor Pablo Camaselle, kiž započa so w Argentinskej na spěwarja wubkubłać, je často na italskich jewišćach słyšeć. Spektakularne běchu­ jeho wustupy w ródnym měsće Gioachina Rossinija Pesarje.