Budyšin (CRM/SN). Z Wolfgangom Rögnerom měješe něhdy orchester Němsko-Serbskeho ludoweho dźiwadła a po tym tež přez lěta Serbski ludowy ansambl zamóžliweho a zasłužbneho dirigenta. Zawčerawšim nawječor předstaji so wón znowa Budyskemu publikumej, a to w beneficnym koncerće tudyšeho Lionoweho kluba w Marje-Marćinej cyrkwi. Rögner dirigowaše Nowy komorny orchester Drježdźany, kotryž wobsteji ze zamóžliwych młodych hudźbnikow, njeje pak jako tajki w tradicionalnej hudźbnej scenje sakskeje stolicy kruće etablěrowany. W Lipsku dóstanje dirigent nětko dlěšodobniši wjetši nadawk.
Wolfgang Rögner sam je njedźelu po programje wjedł. Ze znatymi a woblubowanymi twórbami Georga Philippa Telemanna, Johannesa Sebastiana Bacha a Antonija Vivaldija předstaji so połny błyšć baroka. K tomu přida so z „Adagi- jom w g-moll“ Tomasa Albinonija trochu bóle njeznata twórba za swój čas jara připóznateho italskeho komponista, kotrehož sej pozdźišo tež Vivaldi a Bach wažeštaj.