Budyšin (CRM/SN). Znate hity dujerskeje hudźby „Charleston Selection“ Jeana Trevesa, popularny „Rock around the clock“ a runje tak woblubowany „Kingston Town“ słušeja do repertoira Młodźinskeho dujerskeho orchestra Budyšin, kotryž swjeći lětsa 50. róčnicu wobstaća. Pod dirigatom Alexandera Herrmanna wuhotowachu młodźi hudźbnicy zawčerawšim w hali na Budyskim Třělnišću swój nalětni koncert, a to zhromadnje z trubkarskimi rjadownjemi Philippa Melanchthonoweho gymnazija Budyšin a Ewangelskeje srjedźneje šule Huska. Do dalšich akterow słušeše skupina fletistkow Serbskeje zakładneje šule Budyšin. Wosebity barbny akcent pak stajichu rejwarki Budyskeho towarstwa TanzSzene a majoretki Smetanky z čěskeho Chocerady njedaloko Benešova, z kotrymiž haja tudyši hudźbnicy hižo přez lěta dobre partnerske styki.