Na wopyće pola Franca Čornaka w Chrósćicach
Čornakec kowarnja wosrjedź Chrósćic je zetkanišćo wjesneje młodźiny, ale tež staršich muži. Dźensa dopołdnja knježi tam měr. Jenož 29lětny Franc Čornak a jeho nan Beno rjedźitaj swójbnu kowarnju. „Přihotuju so na wječornu internu knižnu prapremjeru z přiwuznymi a někotrymi přećelemi. Chcu jim swoju runje wušłu knihu w němskej rěči ,Franz im Glück‘ předstajić a wo swojim třilětnym pućowanju jako wandrowski po Němskej a wukraju rozprawjeć“, powěda mi młodźenc z čerstwym hłosom a wjesołym mjezwočom.
Hižo titulne foto knihi – tu je Franc Čornak w tradicionalnej drasće wandrowskeho a z cylindrom na hłowje widźeć – hnydom wabi. Kölnske nakładnistwo Bastei Lübbe AG je Chróšćana zhromadnje ze žurnalistom Rainerom Schäferom prosyło wo pućowanskich dožiwjenjach Serba pisać. Tak nasta 221 stron wopřijace wudaće.