Wosebita přehladka z dźewjeć modelemi architektury „Via Regia en miniature“ wabi wopytowarjow do Kamjenskich měšćanskich zběrkow w Słodarni. Modele cyrkwjow, radnicow, wobornych připrawow, synagogow a hrodow su we wobłuku socialneho projekta „Modelotwar w Kinsporku“ nastali. Wšitke steja w zwisku ze starej europskej wikowanskej, wojerskej a kulturnej dróhu kaž tež z Hornjołužiskim zwjazkom šesćiměstow. Eksponaty su hač do 22. januara 2017 widźeć. Foto: Linda Garten

Při słodarni, při smolerni a na dworje Kamjenskeho Muzeja zapadneje Łužicy wita wopytowarjow jutře wot 14 do 23 hodź. a njedźelu wot 13 do 20 hodź. wosebity flair. Za adwentny spectaculum přeměni so ležownosć na bajkojtu kulisu. Na srjedźowěkowskim hermanku změje Kevin Schneider swójsku budku, w kotrejž předawa mjez druhim horce wino a słódny punš. Foto: Linda Garten

Wosebity programna adwentnym koncerće

Freitag, 09. Dezember 2016 geschrieben von:

Budyšin. Chór 1. serbskeje kulturneje brigady přeprošuje wšitkich lubowarjow hudźby na swój tradicionalny, tola wurjadny adwentny koncert jutře za tydźeń, 17. decembra, w 17 hodź. do Budyskeje Michałskeje cyrkwje.

W lěće 1996 přewza cyrkwinski hudźbny direktor Friedemann Böhme chór na Serbskim gymnaziju. Po 20 lětach nasta přeće, woblubowany adwentny koncert z wosebitym programom wuhotować. Tak zaklinči Čěska hodowna mša wuznamneho komponista Jakuba Jana Ryby (1765–1815), kotruž naši susodźa wosebje rady spěwaja. Byrnjež mša po liturgiskej formje natwarjena była, wotbłyšćuja swobodnje zbasnjene teksty a ludowa hudźba hłuboku zwjazanosć Ryby z ludom. Z chórom brigady zaspěwaja solisća-studenća Akademije muziskich wuměłstwow z Prahi Tereza Hořejšová, Petra Vondrová, Ahmad Hedar a Jan Líkař. Hudźi­ orchester Serbskeho ludoweho ansambla a na pišćelach hraje Gina Hentsch. Cyłkowny wuměłski nawod ma Friedemann Böhme. Zastup je darmotny, wo pjenježny dar so prosy.

„Što šubut wě?“ rěka dźěćacy musical, kotryž předstaji Serbski ludowy ansambl jako překwapjenku k swj. Mikławšej wutoru, 6. decembra, w 17 hodź. na žurli SLA. W hrě šubut druhim ptačkam pomha, w zymnym lěsu přežiwić. Foto: Matthias Hultsch

Kak so derje škitać?

Mittwoch, 30. November 2016 geschrieben von:
Budyšin (SN). Pod hesłom „Kak kriminelna je Sakska? Poručenja k škitej přećiwo zadobywarjam“ wotměje so póndźelu, 5. decembra, we 18 hodź. přichodne čitanje w tuchwilnym semestrje Budyskeje powołanskeje akademije na Lubijskej dróze. Referent wječora je kriminalny hłowny komisar Rolf Kasper ze Zhorjelskeje policajskeje direkcije. Wón porěči wo móžnosćach moderneje zawěs- ćenskeje techniki, kotraž móže wulkemu dźělej pospytanych zadobyćow do bydlenjow zadźěwać. Přizjewjenja za čitanje njejsu trěbne, zastup je darmotny.

Adwentny koncert SLA

Dienstag, 29. November 2016 geschrieben von:
Budyšin. Chór, orchester a solisća Serbskeho ludoweho ansambla skića swojim připosłucharjam móžnosć, hektiskemu dohodownemu časej wućeknyć. Po zwučenym wašnju wopřijima adwentny koncert lětsa tež zaso mjezynarodne twórby a zaklinči hnydom dwójce w adwenće na žurli SLA w Budyšinje. Šarmantna moderatorka Kristina Nerad powjedźe po programje a překwapi tež z tej abo tamnej hodownej stawizničku. Premjera zaklinči štwórtk, 1. decembra, w 19.30 hodź. na žurli SLA. Dalše předstajenje tam budźe 18. decembra w 16 hodź.

Jutře wječor změje kruch „Wir sind keine Barbaren“ premjeru w Budyskim NSLDź. Za mandźelstwowu komediju Philippa Löhle, kotraž so ze strachami srjedźneje woršty před ćěkancami rozestaja, je režiser a wyši hrajny nawoda NSLDź Stefan Wolfram wobydlerski chór ze 17 ludźimi zestajił. Foto: Mirosław Nowotny

Wobrazy a hudźba

Donnerstag, 24. November 2016 geschrieben von:
Berlin. Finisaža wustajeńcy „Fern und nah“, w kotrejž su mjez druhim wobrazy Budyšanki Ulriki Mětškoweje widźeć, je jutře­, pjatk, w 20 hodź. w Berlinskej galeriji F92 na Fehrbellinskej 92. Při tej składnosći wotměje so tam komorny koncert z twórbami Jura Mětška, kotrež zanjese orchester Berlinskeje Komiskeje opery.

Rozšěrjena přehladka „Wotmolowane – Mit Licht gemalt“ je nětko w Serbskim muzeju přistupna. Nimo fotow priwatnych požčowarjow je galerija fararjow Klětnjanskeje ewangelskeje cyrkwje widźeć. Rjad wuwědomja, kak je so ateljejowe fotografowanje w běhu lětdźsatkow přeměniło. Na wulkej wobrazowce hodźi so w priwatnych fotowych albumach na přikład Łušćanskec swójby z Njebječic wokoło 1910, młodowučerja Jurja Kubaša-Worklečana abo wo poswjećenju Zejlerjoweho pomnika we Łazu listować. Widźeć je dale dźěl diasoweje serije wo žiwjenju w klóštrje Marijinej hwědźe w 1920tych lětach. Foto: Jürgen Maćij

Reje w bróžni

Donnerstag, 17. November 2016 geschrieben von:
Ralbicy. Ralbičanski młodźinski klub přeprošuje na kermušne reje, a to jutře, pjatk, wot 21 hodź. do Ralbičanskeje bróžnje. Reje wotměja so lětsa prěni raz pjatk a nic kaž hewak sobotu. Při tačelach budźe DJ Guido stać, zastup płaći tři eura. Bróžeń budźe wutepjena.

Anzeige