Wo gymnaziju w RBB

Freitag, 20. Januar 2017 geschrieben von:
Choćebuz (SN). Ćežišćo januarskeho delnjoserbskeho magacina Łužyca jutře w 13.30 hodź. w RBB budźe dźeń wote­wrjenych duri na Delnjoserbskim gymnaziju w Choćebuzu. Jedne z prašenjow je: „Kelko serbskeho šula znjese?“ W satiriskim přinošku domownika Šybalika póńdźe wo potajne kontakty do USA.

Serbja njepřezjedni?

Freitag, 13. Januar 2017 geschrieben von:
Budyšin (SN). Štó smě nowelěrowanje šulskeho zakonja Sakskeje sobu postajeć? Dotal běše to stajnje Serbske šulske towarstwo. Nětko chce tež Domowina słowčko sobu rěčeć. Štó pak bój za sebje rozsudźi? Wo to dźe w serbskim magacinje Wuhladko jutře, 14. januara, wot 11.45 hodź. w telewiziji MDR. Dalša tema januarskeho wusyłanja je Drježdźansko-Mišnjanski biskop Heinrich Timmerevers, kiž je po 105 dnjach w słužbje prěni raz Serbow wopytał. Što su woni wot biskopa wočakowali, a što je wón w Serbach dožiwił, zhoniće we Wuhladku. Wutoru, 17. januara, w 5.45 hodź. wusyłanje na MDR wospjetuja.

Jednaćel we Wuhladku

Freitag, 02. Dezember 2016 geschrieben von:
Dlěje hač 20 lět je Bjarnat Cyž mjeztym jednaćel Domowiny. Kónc lěta poda so Nowojasčan na wuměnk. W swojim přichodnym wusyłanju jutře, 3. decembra, w 11.30 hodź. na MDR zhladuje hornjoserbski telewizijny magacin Wuhladko na jeho wjelelětne skutkowanje a přewodźa Cyža na jednym z jeho poslednich terminow jako jednaćel Domowiny. Dale rozprawjeja we wusyłanju wo atomowych raketach za čas NDR w Tuchorskim lěsu, wo serbskich ratarjach a hodownych husycach a wo pisanym programje na schadźowance.

Załožba 25 lět

Freitag, 04. November 2016 geschrieben von:
Budyšin (SN). 19. oktobra 1991 załožichu we Łazowskej cyrkwi Załožbu za serbski lud. Běše to jónkrótny historiski a politiski podawk, kotryž njeje tež po 25 lětach na wuznamje popušćił. Hač do dźensnišeho je załožba kruty „financny rjap“ dwurěčneje Łužicy. Wo tym a wo swjedźenskim zarjadowanju 22. oktobra w Choćebuzu rozprawja magacin Wuhladko w swojim nowemberskim wusyłanju, a to jutře, 5. nowembra, w 11.30 hodź. w telewiziji MDR. Dalša tema je oratorij „Serbski rekwiem“, kotryž přednjesechu spočatk oktobra w Chróšćanskej cyrkwi pod nawodom Judith Kubicec.

Trjebaja Serbja sejm?

Freitag, 30. September 2016 geschrieben von:
Iniciatiwna skupina za Serbski sejm bě njedawno na diskusiju wo wobsahach swojeje politiki prosyła. Na 65 zajimcow bě do Kamjentneho domu w Budyšinje přišło. Mjez nimi běštaj Budyski wyši měšćanosta Alexander Ahrens (njestronjan) a intendant NSLDź Lutz Hillmann. Hač do kónca lěta 2017 chce iniciatiwa wšitke tři přisłušace organy wolene abo zestajane měć, tak zo móže Serbski sejm abo parlament dźěłać. Tola kak ma sejm wupadać a změjemy w přichodźe tež serbskich ministrow? To je jedna z temow magacina jutřišeho Wuhladka, a to w 11.30 hodź. w telewiziji MDR.

Biskop we Wuhladku

Freitag, 02. September 2016 geschrieben von:
Heinrich Timmerevers rěka nowy biskop Drježdźansko-Mišnjanskeje diecezy. Kónc awgusta bu 63lětny oficialnje do noweho zastojnstwa zapokazany. Tola štó nowy biskop je a što wo Serbach wě? Dwě prašeni to, na kotrejž chcedźa jutře, 3. septembra, we wusyłanju serbskeho tele­wizijneho magacina Wuhladko w 11.30 hodź. w telewiziji MDR wotmołwić. Dalša tema septemberskeho wudaća je přinošk wo žnjenskej krónje. Žně su nimale wotzamknjene. Za čłonow Chróšćanskeho towarstwa Domizna je to prawy čas, so zetkawaš a lětušu žnjensku krónu wić. Hižo trójce je so próca wudaniła a króna je sej stajnje prěnje městno na krajnej domchowance zawěsćiła. Budźe tež lětsa zaso wuspěšna? Filmowcy su wušiknym rukam při wiću přihladowali.

Wo šulskim zběžku

Freitag, 05. August 2016 geschrieben von:

Rukopisna sada w Budyskej chronice z lěta 1534 je skerje nakromna noticka, ze serbskeho wida pak je wuznamna: Wona móhła najstarši dotal znaty serbski pisomny dokument scyła być. Wědomostnica Madlena Malinkec je ju namakała, slědźo w Budyskim tachantskim archiwje. Wo tym rozprawja telewizijny magacin Wuhladko w swojim awgustowskim wusyłanju, a to jutře, sobotu, w 11. 30 hodź. na sćelaku MDR.

Dalša tema magacina je „Chróšćan zběžk“. Wón běše najsylniša akcija serbskeho ludu w boju wo zachowanje narodneje identity a zajimow Serbow a bě zdobom najwobšěrniša akcija zwonka parlamenta w nowych zwjazkowych krajach – šulski zběžk w Chrósćicach. Dnja 8. awgusta 2001 docpě wón swój wjeršk z jednej z najwjetšich protestowych demonstracijow we Łužicy. Hižo měsac pozdźišo Chróšćansku srjedźnu šulu doskónčnje zawrěchu.

Wubrance we Wuhladku

Freitag, 03. Juni 2016 geschrieben von:
Budyšin. Europeada wot 18. do 26. junija w Južnym Tirolu budźe jedna z temow hornjoserbskeho telewizijneho magacina Wuhladko jutře, sobotu, w 11.30 hodź. na sćelaku MDR. Prjedy hač so Serbskej koparskej wubrance na puć hotujetej, staj jeju trenarjej kadraj oficialnje prezentowałoj. Štó smě sobu do Južneho Tirola, štó je so podarmo nadźijał? Wuhladko mustwje žonow a muži předstaji. Dale rozprawjeja we wusyłanju wo serbskim programje na 100. zjězdźe katolikow w Lipsku, hdźež bě wosrjedź města serbske jewišćo. Nimo toho dopominaja na Akciju Koslow, prěnju zhromadnu akciju serbskich młodostnych po Druhej swětowej wójnje.

„Nowy“ we Wuhladku

Freitag, 06. Mai 2016 geschrieben von:
Budyšin. Kak chce nowy direktor Załožby za serbski lud Jan Budar dźěło załožby a tamnych serbskich institucijow pozitiwnje wobwliwować, budźe jedna z temow přichodneho hornjoserbskeho te- lewizijneho magacina Wuhladko jutře, sobotu, w 11.30 hodź. na sćelaku MDR. Dale zaběraja so we wusyłanju z Ra­dworskim hrodom a z prašenjom, kak chce jeho wobsedźer kulturu w Radworju šěrić. Nimo toho je Wuhladko wowčerja wopytało a jeho při wšědnym nalětnim dźěle wobkedźbowało. Wusyłanje wo­spjetuja wutoru, 10. meje, w 5.50 hodź. na MDR a sobotu, 14. meje, w 13.30 hodź. na RBB.

Křižerjo we Wuhladku

Freitag, 01. April 2016 geschrieben von:
Budyšin. Serbscy křižerjo a jich konje budu­ jedna z temow přichodneho hornjoserbskeho telewizijneho magacina Wuhladko jutře, 2. apryla, w 11.30 hodź. na sćelaku­ MDR. Mjez druhim budźe widźeć, kak su so při wobstaranju konjow prawe přećelstwa a lětdźesatki trajace styki z wobsedźerjemi konjow wuwili. Dale zaběraja so we wusyłanju z koparskej europeadu a kak cyłe swójby swój lětuši dowol na tónle podawk wusměrjeja. Prašenje pak je, što budźe z dźěćimi, kotrež dźě maja w tym času hišće šulu. Nimo toho wopytaja spisowaćela a basnika Bena Budarja, kiž je njedawno 70. narodniny swjećił, a předstaja zajimawostki wo zwonach Smječkečanskeje ewangelskeje cyrkwje. Wuhladko wospjetuja wutoru, 5. apryla, w 5.50 hodź. na MDR a sobotu, 9. apryla, w 13.30 hodź. na RBB.

Seite 2 von 2

Anzeige

  • Spěchowanski kruh za serbsku ludowu kulturu je 16. a 17. měrca mjeztym 28. serbske jutrowne wiki w Budyskim Serbskim domje wuhotował. Wiki běchu jara wuspěšne, tež nastupajo ličbu wopytowarstwa. Tule smy wam někotre fotowe impresije z wikow zestajeli