Sportowe towarstwa na amaterskej runinje su tež wot koronakrizy potrjechene. Dokelž so sobustawske přinoški njepłaća a pjenjezy sponsorow pobrachuja, maja kluby ćeže z financami. Profikoparjej ze zwjazkoweje ligi staj so na swoje korjenje dopomniłoj a pomhataj nětko SC Boreji Drježdźany. Na homepage Boreje pisaja zamołwići: „Tež pola SC Boreje je korona swoje financielne slědy zawostajiła. Sponsorojo maja ćeže, podruže so njepłaća, koparske campy so njepřewjedu a nowi sobustawojo startuja z treningom město po jutrach nanajzašo w lěću.“ Ale płaćenje honorarow za trenarjow a nazwučowarjow je znajmjeńša za dwaj měsacaj zawěsćene, a to dźakowano dwěmaj profikoparjomaj, kiž staj w Drježdźanach hrałoj, a kiž staj nětko konkurentaj. Staj to Toni Leistner a Tony Jantschke. Rodźeny Wojerowčan Jantschke je mzdy za měsac měrc přewzał a w krajnej stolicy Sakskeje rodźeny Leistner mzdy za apryl.