Po překwapjacym wuslědku prezidentskich wólbow w Pólskej
Hladajo na wuslědk prezidentskich wólbow minjenu njedźelu su Polacy přeco hišće dospołnje překwapjeni. Kandidat opozicije Andrzej Duda bě ze 34,76 procentami hłosow dotalneho prezidenta Bronisława Komorowskeho porazył, kiž dósta 33,77 procentow.
Nichtó w Pólskej njebě tónle wuslědk wočakował. Wšitke slědźenske instituty wěšćachu Komorowskemu jasne dobyće. Byrnjež nahladnosć prezidenta wot 62 procentow w januaru na runje hišće 40 procentow bjezposrědnje do wólbow widźomnje spadnyła, zdawaše so wotstawk k tamnym kandidatam wulki dosć. Hotowa sensacija bě tež wuslědk třećeho kandidata Paweła Kukiza, rockoweho hudźbnika z dosć radikalnymi nahladami. Wón nažnja nimale 21 procentow hłosow. Něhdźe štyri miliony předewšěm młodych Polakow běchu jeho wolili. Hišće w februaru zdawaše so wón z runje štyrjomi procentami bjez kóždeje šansy.
