Namjety za změny kriterijow spěchowanja na klawsurje zdźěłane
Rogozno (SN/JaW). Serbscy zastupjerjo rady Załožby za serbski lud su so kónc tydźenja intensiwnje ze spěchowanskimi směrnicami załožby zaběrali a namjety za změny zdźěłali. Na klawsurje w Rogoznje pola Choćebuza wobdźěli so tež wjednistwo załožboweho zarjada.
Kaž předsyda załožboweje rady Jan Budar zdźěli, su spěchowanske směrnicy wšitkich wobłukow přešli a wo změnach rozmyslowali. „Sobudźěłaćerjo zarjada rozłožichu nam njejasnosće, zo bychmy směrnicy tež prawje rozumili“, Budar rjekny. Zdobom woni rozkładźechu, kak w praksy ze směrnicami wobchadźeja, hdźe su ćeže. Klawsura bě spomóžna. „Směrnicy su z 1990tych lět a buchu jeničce 2003 kusk změnjene, tuž mějachmy nimale wšudźe namjety za změny“, předsyda załožbowje rady rozłoži.