Z planom naprawow sćěhuje Braniborska pominanje Europskeje rady
Podstupim (SN/at). Krajny sejm Braniborskeje je wčera w Podstupimje plan naprawow za delnjoserbšćinu do nadawka dał. Z tym sćěhuje kraj pominanje ministerskeho komiteja Europskeje rady nastupajo delnjoserbšćinu. Po debaće na temu „Wjacerěčnosć a mnohotnosć rěčow w Braniborskej rozšěrić“ přihłosowachu přitomni zapósłancy jednohłósnje namjetej koaliciskeju frakcijow Lěwicy jako iniciatorki a SPD. Połdra lěta po schwalenju noweho Serbskeho zakonja zaběraše so braniborski sejm w plenumje znowa ze serbskej tematiku.
Jednansku potrjebu zwěsći zapósłanča Lěwicy Kathrin Dannenberg předewšěm na kubłanskim polu při serbskim šulskim postajenju. „Smy wot lěta 2000 krok po kroku delnjoserbske šulstwo natwarjeli, bjez toho zo mamy za to zakład.“ Z widom na nowy Serbski zakoń Roswitha Schier (CDU) zwěsći, zo dyrbi so w tym nastupanju „tež hinaše wědomje w zarjadach wutworić“.